Il-Kunsill jaqbel rigward il-pożizzjoni dwar ir-regoli diġitali ġodda

Fil-25 ta' Novembru 2021, il-Kunsill qabel dwar approċċ ġenerali għall-Att dwar is-Servizzi Diġitali (DSA) u l-Att dwar is-Swieq Diġitali (DMA) żewġ fajls leġiżlattivi ewlenin biex jgħinu fil-ħolqien ta' spazju diġitali sikur u miftuħ għaċ-ċittadini u n-negozji tal-UE.

Att dwar is-Servizzi Diġitali

Il-proposta tal-Att dwar is-Servizzi Diġitali għandha l-għan li ċ-ċittadini tal-UE jinżammu sikuri minn oġġetti, kontenut jew servizzi illegali u li jiġu protetti d-drittijiet fundamentali tagħhom online, skont il-prinċipju li dak li huwa illegali offline għandu jkun ukoll illegali online.

L-Att jiddefinixxi wkoll responsabbiltajiet ċari u akkontabilità għall-media soċjali u s-swieq online, u ladarba jiġi adottat ser jipprovdi qafas ta' governanza modern u li jibqa' validu fil-futur.

• Dak li huwa illegali offline għandu jkun illegali online: il-Kunsill jaqbel fuq il-pożizzjoni rigward l-Att dwar is-Servizzi Diġitali (stqarrija għall-istampa, 25 ta' Novembru 2021)

Att dwar is-Swieq Diġitali

Il-proposta tal-Att dwar is-Swieq Diġitali għandha l-għan li toħloq kondizzjonijiet ekwivalenti ta' kompetizzjoni għan-negozji tal-UE billi tirregola t-teknoloġija kbira. Il-proposta għandha l-għan li tiżgura settur diġitali kompetittiv u ġust bil-ħsieb li jiġu promossi l-innovazzjoni, prodotti u servizzi diġitali ta' kwalità għolja, prezzijiet ġusti, u kwalità għolja u għażla fis-settur diġitali.

Hija mmirata primarjament lejn pjattaformi online kbar, hekk imsejħa "gwardjani", li jikkontrollaw is-servizzi ewlenin ta' pjattaforma bħas-swieq, app stores u magni tat-tiftix online.

• Regolamentazzjoni tat-"teknoloġija kbira": il-Kunsill jaqbel dwar it-tisħiħ tal-kompetizzjoni fl-isfera diġitali (stqarrija għall-istampa, 25 ta' Novembru 2021)

Il-passi li jmiss

L-approċċ ġenerali li ntlaħaq dwar l-atti jikkompleta l-pożizzjoni ta' negozjar maqbula mill-Kunsill u jagħti mandat lill-Presidenza tal-Kunsill għal aktar diskussjonijiet mal-Parlament Ewropew, li huma skedati għall-2022.

Aktar tagħrif

• Futur diġitali għall-Ewropa (informazzjoni ġenerali)