An Chomhairle Gnóthaí Eachtracha, 19/06/2017, 19 Meitheamh 2017

Na príomhthorthaí

An ghéarchéim sa Mhurascaill

Phléigh airí gnóthaí eachtracha an Aontais an ghéarchéim reatha i réigiún na Murascaille.

Mhol airí an Aontais go ndéanfaí an ghéarchéim a dhíghéarú trí leas a bhaint as idirphlé agus as idirbheartaíocht. Chuir siad in iúl go dtacaíonn siad go hiomlán leis na hiarrachtaí idirghabhála i gCuáit.

"Chuir na hairí in iúl go láidir aontacht agus diongbháilteacht an Aontais maidir le tacaíocht a thabhairt do na hiarrachtaí idirghabhála i gCuáit. Tá tacaíocht an Aontais de dhíth orthu agus táimid ullamh chun cabhair a thabhairt dóibh."

Federica Mogherini, Ardionadaí an Aontais do Ghnóthaí Eachtracha agus don Bheartas Slándála

Chuir na hairí i dtreis go bhfuil réiteach ar an ngéarchéim ag teastáil go práinneach agus go bhfuil tábhacht le haontacht sa Mhurascaill don Aontas agus do chobhsaíocht an réigiúin chomh maith céanna.

Mheabhraigh an tArdionadaí go gcuireann an tAontas an-tábhacht leis an gcaidreamh déthaobhach atá aige leis na páirtithe uile lena mbaineann agus ar an gcaidreamh atá aige le Comhairle Comhair na Murascaille freisin.

Comhar idir an tAontas agus ECAT

Phléigh na hairí gnóthaí eachtracha an comhar idir an tAontas agus ECAT le Leas-Ardrúnaí ECAT, Rose Gottemoeller. Is bunaithe ar an tuarascáil chomhpháirteach ar dhul chun cinn ó Ardionadaí an Aontais agus ó Ardrúnaí ECAT a bhí an plé sin. Ghlac an Chomhairle na conclúidí maidir leis an tuarascáil, agus ba dhíol sásaimh di an dul chun cinn a rinneadh i ndáil le tacar coiteann de mholtaí a chur chun feidhme. Is mian léi go leanfaí den obair sin.

• An comhar AE-ECAT: Is díol sásaimh don Chomhairle an dul chun cinn a rinneadh (preasráiteas 19/06/2017)
• Comhar AE maidir leis an tslándáil agus leis an gcosaint (cúlra faisnéise)

An fhrithsceimhlitheoireacht

Bhí díospóireacht ag na hairí gnóthaí eachtracha faoi ghnéithe seachtracha na frithsceimhlitheoireachta, rud is tráthúil i bhfianaise na n-ionsuithe a rinneadh san Aontas agus níos faide i gcéin le déanaí. Chuir siad i dtreis gurb í an fhrithsceimhlitheoireacht an tosaíocht slándála is mó atá ag an Aontas. Ghlac an Chomhairle conclúidí maidir leis an bhfrithsceimhlitheoireacht.

• Gníomhaíocht sheachtrach an Aontais i dtaca leis an bhfrithsceimhlitheoireacht: conclúidí glactha ag an gComhairle
• An tAontas ag dul i ngleic leis an sceimhlitheoireacht (cúlra faisnéise)

An Iaráic

Phléigh an Chomhairle an Iaráic, agus dhírigh sí ar na forbairtí is déanaí, go háirithe i gcúigí Mosul agus Nineveh, agus ar chobhsaíocht na tíre sa todhchaí. Ghlac an Chomhairle na conclúidí.

• An Iaráic: Conclúidí glactha ag an gComhairle

An Imirce

Phléigh na hairí eachtracha gnéithe seachtracha na himirce, mar ullmhúchán don Chomhairle Eorpach a bheidh ar siúl ar an 23-23 Meitheamh. Bhreithnigh siad an dul chun cinn a rinneadh i dtaca leis an gCreat Comhpháirtíochta.

Chuir na hairí in iúl go dtacaíonn siad fós leis an gcur chuige reatha agus go síleann siad gur cheart é a threisiú chun torthaí níos mó a bhaint amach i bhfianaise líon na ndaoine a chailltear ar bhealach na Meánmhara Láir. Ba cheart an comhar le tíortha comhpháirtíochta a atreisiú chun dul i ngleic le gáinneálaithe, líon na n-imirceach mírialta chuig an Aontas a laghdú agus filleadh agus athligean isteach a áirithiú. Is cuspóir tábhachtach don Aontas é freisin tacaíocht a thabhairt do bhainistiú ar imirce sa Libia chun imircigh agus dídeanaithe a chosaint.

• An Creat Comhpháirtíochta maidir leis an imirce: tuairisc ón gCoimisiún faoi thorthaí agus faoi cheachtanna na bliana atá caite, preaseisiúint dar dáta 13 Meitheamh 2017

Straitéis Dhomhanda an Aontais Eorpaigh

Bhí plé ag an gComhairle maidir le straitéis dhomhanda an Aontais a chur chun feidhme bunaithe ar thuarascáil a chuir an tArdrúnaí i láthair maidir leis an gcéad bhliain den chur chun feidhme.

Ba dhíol sásaimh do na hairí gnóthaí eachtracha an tuarascáil agus chuir siad béim ar an obair thábhachtach a rinneadh le linn na bliana, ní hamháin i réimse an chomhair slándála agus cosanta ach maidir le teacht aniar a chothú sna stáit agus sna sochaithe san Iarthar agus sa Deisceart agus maidir le cur chuige comhtháite do choinbhleachtaí agus do ghéarchéimeanna a fhorbairt.

Ba dhíol sásaimh dóibh an obair leanúnach ar na straitéisí réigiúnacha agus ar na straitéisí téamaí a nuashonrú agus a chruthú. Sa chomhthéacs seo, ghlac an Chomhairle conclúidí maidir le slándáil mhuirí dhomhanda.

• Tuarascáil bhliana maidir le tuarascáil chur chun feidhme na Straitéise Domhanda
• Conclúidí glactha ag an gComhairle maidir leis an tslándáil mhuirí dhomhanda