An Chomhairle Gnóthaí Eachtracha (Trádáil), 27/05/2019, 27 Bealtaine 2019

Na príomhthorthaí

Athchóiriú EDT agus an chaibidlíocht atá ar siúl san eagraíocht féin

Tá dúshláin mhóra roimh EDT i dtaca le dlisteanacht agus le cumas na heagraíochta feidhmiú go héifeachtach: ní mór dom a bheith soiléir – dochar seachas sochar atá i ndán dúinn má ghéillimid. Ní mór dúinn aghaidh a thabhairt ar athchóiriú cuimsitheach a dhéanamh ar chóras EDT, lena n-áirítear réiteach eatramhach ar ghéarchéim an Bhuanchomhlachta Achomhairc, ionas go mbeidh ar ár gcumas ábharthacht EDT i saol na linne seo a chinntiú. Stefan Radu Oprea, Aire Timpeallachta Gnó, Trádála agus Fiontraíochta na Rómáine

Phléigh an Chomhairle an staid mar atá faoi láthair maidir le hathchóiriú EDT agus an chaibidlíocht atá ar siúl san eagraíocht féin. Go sonrach, chuir an Coimisiún na hairí ar an eolas i dtaca leis na tionscnaimh is déanaí uaidh chun cur chuige cuimsitheach an Aontais Eorpaigh a chur chun cinn i dtreo nuachóiriú a dhéanamh ar phríomhfheidhmeanna EDT: ceapadh rialacha, faireachán agus réiteach díospóide.

Maidir le géarchéim an Bhuanchomhlachta Achomhairc, chomhaontaigh an Chomhairle gur cheart don Aontas teagmháil a dhéanamh le baill eile EDT d'fhonn teacht ar réiteach eatramhach a chaomhnóidh cineál ceangailteach EDT agus an dá leibhéal atá ag córas WTO um réiteach díospóidí breithniú a dhéanamh.

Ina theannta sin, ghlac an Chomhairle treoracha caibidlíochta d'fhonn seasamh an Aontais Eorpaigh a leagan síos agus gníomhaíocht an Choimisiúin maidir leis an gcaibidlíocht iltaobhach i dtaobh na ríomhthráchtála in EDT a threorú.

• An ríomhthráchtáil: Sainordú forlíontach glactha ag an gComhairle don chaibidlíocht le EDT (preaseisiúint, 27 Bealtaine 2019)

Caidreamh trádála idir an tAontas Eorpach agus Stáit Aontaithe Mheiriceá

Is díol sásaimh don Chomhairle an cinneadh a rinne na Stáit Aontaithe taraifí ar charranna allmhairithe a chur ar athlá go ceann 180 lá, ach diúltaíonn sí scunscan don choincheap gur bagairt náisiúnta do na Stáit Aontaithe é onnmhairiú carranna ón Aontas Eorpach. Táimid muiníneach gur féidir teacht ar réiteach a bheidh chun tairbhe an dá thaobh agus i gcomhréir le EDT le comhaontú trádála teoranta ar earraí tionsclaíocha, bunaithe ar ráiteas mhí Iúil 2019. Tá an tAontas Eorpach faoi réir agus toilteanach tabhairt faoi chainteanna cuiditheacha. Stefan Radu Oprea, Aire Timpeallachta Gnó, Trádála agus Fiontraíochta na Rómáine

Chuir an Coimisiún an Chomhairle ar an eolas faoin méid is déanaí a tharla sa chaidreamh trádála idir an tAontas Eorpach agus Stáit Aontaithe Mheiriceá, go háirithe i dtaca le hobair Ghrúpa Oibre Fheidhmiúcháin an Aontais Eorpaigh agus Stáit Aontaithe Mheiriceá, mar aon leis an gcaibidlíocht leanúnach maidir le measúnú comhréireachta agus deireadh a chur le taraifí ar earraí tionsclaíocha.

Anuas air sin, thapaigh na hairí a ndeis barúil a thabhairt ar an gcinneadh a rinne na Stáit Aontaithe le gairid, is é sin taraifí ar charranna allmhairithe a chur ar athlá go ceann 180 lá, nó go ndéanfar comhaontú a chaibidil d'fhonn an tsaincheist faoi carranna as an Aontas a allmhairiú chuig na Stáit Aontaithe.

D'fhormheas an Chomhairle, i mí an Aibreáin 2019, sainorduithe don Choimisiún tús a chur leis an gcaibidlíocht leis na Stáit Aontaithe maidir le deireadh a chur le taraifí ar earraí tionsclaíocha agus maidir le measúnú comhréireachta, i gcomhréir leis an gcomhráiteas a rinne an tUachtarán Juncker agus an tUachtarán Trump, i mí Iúil 2018.

• Trádáil leis na Stáit Aontaithe: Caibidlíocht údaraithe ag an gComhairle ar dheireadh a chur le taraifí ar earraí tionsclaíocha agus ar mheasúnú comhréireachta (preaseisiúint, 15/04/2019)

Comhaontú saorthrádála agus comhaontú um chosaint infheistíochta idir an tAontas Eorpach agus Vítneam

Cuireadh in iúl don Chomhairle go bhfuil glacadh agus síniú do chomhaontú saorthrádála agus do chomhaontú um chosaint infheistíochta idir an tAontas Eorpach agus Vítneam beartaithe faoi dheireadh mhí an Mheithimh 2019.

Ábhair eile ar an gclár oibre

Le linn an lóin, phléigh na hairí an chaibidlíocht leanúnach ar thrádáil, le Mercosur, leis an Astráil, leis an Nua-Shéalainn, leis an tSile agus leis an Indinéis go háirithe.