Kunsill Affarijiet Barranin (Kummerċ), 27/05/2019, 27 ta' Mejju 2019

Riżultati ewlenin

Ir-riforma u n-negozjati tad-WTO

Id-WTO qed tiffaċċa sfidi serji għal-leġittimità tagħha u għall-kapaċità tagħha li tiffunzjona b’mod effettiv, iżda ppermettuli nkun ċar: jekk naqtgħu qalbna minnha aktar nitilfu milli niggwadanjaw. Jeħtieġ li nistinkaw għal riforma komprensiva tas-sistema tad-WTO, inkluż soluzzjoni interim għall-kriżi tal-Korp tal-Appell, biex inkunu nistgħu nkomplu niżguraw ir-rilevanza tad-WTO fid-dinja moderna. Ștefan-Radu Oprea, Ministru għall-Ambjent tan-Negozju, il-Kummerċ u l-Intraprenditorija tar-Rumanija

Il-Kunsill iddiskuta s-sitwazzjoni attwali fir-rigward tar-riforma tal-Organizzazzjoni Dinjija tal-Kummerċ (WTO) u tan-negozjati fi ħdanha. B'mod partikolari l-Kummissjoni għarrfet lill-ministri dwar l-aħħar inizjattivi tagħha għall-promozzjoni ta'approċċ komprensiv tal-UE għall-modernizzazzjoni tal-funzjonijiet prinċipali kollha tad-WTO: it-tfassil tar-regoli, il-monitoraġġ u s-soluzzjoni tat-tilwim.

Fir-rigward tal-kriżi tal-Korp tal-Appell, il-Kunsill qabel li l-UE għandha taħdem flimkien ma' membri oħra tad-WTO biex tinstab soluzzjoni interim li żżomm il-karattru vinkolanti u ż-żewġ livell ta' aġġudikazzjoni tas-sistema ta' soluzzjoni tat-tilwim tad-WTO.

Il-Kunsill adotta wkoll direttivi ta' negozjar biex jinkwadra l-pożizzjoni tal-Unjoni Ewropea u jiggwida l-azzjoni tal-Kummissjoni fin-negozjati plurilaterali dwar il-kummerċ elettroniku fid-WTO.

Relazzjonijiet kummerċjali bejn l-UE u l-Istati Uniti

Il-Kunsill jilqa' d-deċiżjoni tal-Istati Uniti li t-tariffi fuq il-karozzi importati jiġu posposti b'180 jum, iżda jiċħad bil-qawwa l-idea li l-esportazzjoni tal-karozzi tal-UE hija theddida għas-sigurtà nazzjonali tal-Istati Uniti. Aħna nemmnu li tista' tinstab soluzzjoni ta' benefiċċju reċiproku u kompatibbli mad-WTO permezz ta' ftehim kummerċjali limitat fuq prodotti industrijali, ibbażat fuq id-dikjarazzjoni ta' Lulju 2019. L-UE tinsab lesta u trid tinvolvi ruħha f'taħditiet kostruttivi. Ștefan-Radu Oprea, Ministru għall-Ambjent tan-Negozju, il-Kummerċ u l-Intraprenditorija tar-Rumanija

Il-Kunsill kien infurmat mill-Kummissjoni dwar l-aħħar żviluppi fir-relazzjonijiet kummerċjali bejn l-UE u l-Istati Uniti, b'attenzjoni partikolari għall-ħidma tal-Grupp ta' Ħidma Eżekuttiv tal-Istati Uniti u tal-UE, kif ukoll in-negozjati li għaddejjin bħalissa fuq il-valutazzjoni tal-konformità u l-eliminazzjoni tat-tariffi għall-prodotti industrijali.

Il-ministri ħadu wkoll l-opportunità biex jikkummentaw dwar id-deċiżjoni reċenti tal-Istati Uniti li tipposponi t-tariffi fuq il-karozzi importati b'180 jum, sakemm jiġi nnegozjat ftehim biex tkun indirizzata l-kwistjoni tal-importazzjoni mill-Istati Uniti ta' karozzi mill-UE.

F'April 2019, il-Kunsill approva l-mandati biex il-Kummissjoni tiftaħ in-negozjati mal-Istati Uniti dwar l-eliminazzjoni tat-tariffi għall-prodotti industrijali u dwar il-valutazzjoni tal-konformità, skont id-Dikjarazzjoni Konġunta ta' Lulju 2018 miftiehma mill-President Juncker u l-President Trump.

Ftehim ta' Kummerċ Ħieles bejn l-UE u l-Vjetnam u Ftehim ta' Protezzjoni tal-Investiment

Il-Kunsill ġie infurmat li l-adozzjoni u l-firma ta' ftehim ta' kummerċ ħieles u ta' ftehim ta' protezzjoni tal-investiment bejn l-UE u l-Vjetnam huma ppjanati li jseħħu sal-aħħar ta' Ġunju 2019.

Suġġetti oħra fuq l-aġenda

Waqt l-ikla ta' nofsinhar, il-ministri ddiskutew in-negozjati kummerċjali li għaddejjin bħalissa, b'mod partikolari mal-Mercosur, l-Awstralja, New Zealand, iċ-Ċilì u l-Indoneżja.