An Chomhairle Gnóthaí Ginearálta, 20 Feabhra 2024

Na príomhthorthaí

An smacht reachta sa Pholainn

Arna iarraidh sin do thoscaireacht na Polainne, rinne an Chomhairle a marana ar na forbairtí maidir le nós imeachta Airteagal 7(1) CAE i ndáil leis an bPolainn.

Chuir Adam Bodnar, Aire Dlí agus Cirt na Polainne, an Chomhairle ar an eolas faoi na hathchóirithe atá déanta agus atá beartaithe ag rialtas na Polainne chun aghaidh a thabhairt ar na saincheisteanna a ardaíodh faoi nós imeachta Airteagal 7. Chuir sé i bhfios go láidir go bhfuil rún ag an rialtas nua na bearta is gá a dhéanamh chun go bhféadfar an nós imeachta sin a dhúnadh.

Chuir an Coimisiún na hairí ar an eolas freisin maidir leis na forbairtí a bhí ann ón 15 Samhain 2023 i leith, tráth a ndearna an Chomhairle an staid sa Pholainn a mheas go deireanach.

Príomhthosaíocht d’Uachtaránacht na Beilge is ea an smacht reachta agus an urraim don daonlathas. Ar deireadh, is iad na luachanna sin luachanna bunaidh an Aontais seo againne. Is díol sásaimh dúinn é gur mhol an Pholainn féin go n-éistfí lena plean athchóirithe agus tá an meon dearfach sin le brath go forleathan i measc na mBallstáit freisin. Déanfaimid obair leantach ar na hathchóirithe iarbhír a luaithe a chuirfear chun feidhme iad. Hadja Lahbib, Aire Gnóthaí Eachtracha agus Gnóthaí Eorpacha na Beilge

Seoladh nós imeachta Airteagal 7(1) CAE maidir leis an bPolainn an 20 Nollaig 2017 nuair a d’fhoilsigh an Coimisiún a thogra réasúnaithe ina raibh sraith moltaí maidir le hathchóiriú ar an gceartas agus neamhspleáchas breithiúnach sa Pholainn. Ó shin i leith, bhí an nós imeachta ar chlár oibre na Comhairle go tráthrialta agus tionóladh sé éisteacht leis an bPolainn.

Coinneoidh an Chomhairle súil ghéar ar an ábhar sin.

• Togra réasúnaithe maidir leis an smacht reachta sa Pholainn

  Níl an acmhainn seo ar fáil faoi láthair ach amháin sa teanga (sna teangacha) seo a leanas:

  EN BG ES CS DA DE ET EL FR HR IT LV LT HU MT NL PL PT RO SK SL FI SV
• Tuarascáil 2023 maidir leis an Smacht Reachta – Caibidil Tíre – an Pholainn
• An smacht reachta (eolas cúlra)

Comhairle Eorpach mhí an Mhárta

Chuir na hairí tús leis na hullmhúcháin don chruinniú den Chomhairle Eorpach a bheidh ar siúl an 21 agus an 22 Márta 2024 trí phlé a dhéanamh ar dhréachtchlár oibre anótáilte.

Ag an gcruinniú a bheidh acu i mí an Mhárta, tabharfaidh ceannairí an Aontais aghaidh ar an méid seo a leanas:

• cogadh foghach na Rúise i gcoinne na hÚcráine agus tacaíocht leanúnach an Aontais don Úcráin agus dá muintir
• slándáil agus cosaint, lena n-áirítear an gá le hullmhacht fhoriomlán na hEorpa don chosaint a mhéadú agus bonn teicneolaíoch agus tionsclaíoch cosanta na hEorpa a neartú a thuilleadh
• an staid sa Mheánoirthir
• ullmhúcháin don Chlár Oibre Straitéiseach nua

Iarrfar ar an gComhairle Eorpach freisin an moladh maidir le beartas eacnamaíoch an limistéir euro a fhormhuiniú.

Is é ionradh iomlán na Rúise ar an Úcráin is cúis le bás líon ollmhór daoine, fulaingt agus scriosadh ollmhór. Agus muid ag druidim le comóradh brónach 2 bhliain ó thosaigh an cogadh, tá an tAontas ag seasamh go daingean i gcónaí ar thaobh na hÚcráine agus ar thaobh mhuintir na hÚcráine. Ina gcomhrac, ní hamháin go bhfuil ceannasacht agus iomláine chríochach a dtíre á gcosaint ag muintir na hÚcráine, ach tá ár luachanna coiteanna agus slándáil na hEorpa ina hiomláine á gcosaint acu freisin. Tá rún daingean againn leanúint de thacaíocht láidir a chur ar fáil don Úcráin. Hadja Lahbib, Aire Gnóthaí Eachtracha agus Gnóthaí Eorpacha na Beilge

• Dréachtchlár oibre anótáilte

Chomh maith leis sin, ghlac an Chomhairle na míreanna a bhaineann le liostaí na míreanna ‘A’ reachtacha agus neamhreachtacha gan aon phlé a dhéanamh orthu.