An Chomhairle Ceartais agus Gnóthaí Baile

Tá an Chomhairle Ceartais agus Gnóthaí Baile (Comhairle CGB) freagrach as saincheisteanna a bhaineann leis an gceartas, leis an tslándáil inmheánach agus leis an imirce.

Téigh chuig féilire na gcruinnithe

Oibrítear ar bheartais agus reachtaíocht maidir leis an gceartas, lena n-áirítear maidir leis an dlí sibhialta agus coiriúil, agus maidir le gnóthaí baile, lena n-áirítear maidir leis an imirce, an choireacht eagraithe a chomhrac, an tslándáil agus rialú teorann.

Tá sé d’aidhm aici freisin cearta bunúsacha agus cearta na saoránach a chosaint.

Íomhá cháiliúil de bhandia an chirt, an mheá ina bos, grafaic chiorclach le codanna ildaite, léarscáil den Eoraip ina bhfuil réaltaí, ina léirítear téamaí an cheartais agus lánpháirtiú na hEorpa.

Réimsí oibre na Comhairle Ceartais agus Gnóthaí Baile

Teorainneacha agus víosaí

Oibrítear i réimse an bhainistithe teorainneacha seachtracha a neartú agus i mbeartais víosaí an Aontais a chomhchuibhiú chun an tslándáil a chinntiú.

Imirce agus tearmann

Forbraítear agus glactar rialacha comhchoiteanna maidir le himirce agus tearmann ar mhaithe le prionsabal na comhroinnte córa freagrachta a chinntiú, chun iad siúd atá i ngátar a chosaint, agus chun an imirce a bhainistiú go héifeachtach ar fud na mBallstát uile.

An choireacht a chomhrac

Cuidítear leis an gcomhar breithiúnach a neartú ionas go mbeidh saoránaigh agus gnólachtaí in ann brath ar chórais cheartais chothroma éifeachtacha sna Ballstáit go léir.

An chibearshlándáil

Cuirtear borradh faoi athléimneacht an Aontais i leith cibearbhagairtí tríd an gcomhar a fheabhsú, trí phríomhrialacha cibearshlándála a chur chun feidhme, agus trí fhreagairtí ar mhórtheagmhais a neartú.

Cearta bunúsacha agus cearta na saoránach

Oibrítear chun cearta bunúsacha agus cearta na saoránach a chosaint trí dhlíthe a ghlacadh lena gcosnaítear an príobháideachas agus sonraí agus lena gcinntítear cóir chomhionann ar fud an Aontais.

A bhfuil i gceist leis an gComhairle Ceartais agus Gnóthaí Baile

Is iad airí na 27 mBallstát atá freagrach as an gceartas nó gnóthaí baile atá sa Chomhairle seo. Tagann siad le chéile in dhá chomhdhéanamh.

Ceartas

Sa Chomhairle Ceartais agus Gnóthaí Baile (Ceartas), dírítear ar chearta bunúsacha agus ar an gcomhar breithiúnach sa dlí sibhialta agus coiriúil.

Gnóthaí Baile

Sa Chomhairle Ceartais agus Gnóthaí Baile (Gnóthaí Baile), dírítear ar an imirce, ar bhainistiú teorann agus ar chomhar póilíneachta. Is iad atá freagrach freisin as cosaint shibhialta an Aontais.

Is gnách go dtagann na hairí le chéile sa Chomhairle Ceartais agus Gnóthaí Baile ceithre huaire sa bhliain, ar a laghad. Glacann coimisinéirí ábhartha an Choimisiún Eorpaigh páirt sna cruinnithe freisin.

Meithleacha agus coistí faoi leith – ar a bhfuil saineolaithe náisiúnta na mBallstát – agus Coreper II, a ullmhaíonn cruinnithe na Comhairle Ceartais agus Gnóthaí Baile.

Clár Oibre Uachtaránacht na hÉireann

Tríd an gComhairle Ceartais agus Gnóthaí Baile, cuirfidh uachtaránacht na hÉireann cur chuige cuimsitheach chun cinn maidir le tearmann agus imirce atá cothrom, daingean agus riailbhunaithe.

I réimse na slándála, díreoidh an uachtaránacht ar theorainneacha a dhaingniú, ar an gcoireacht thromchúiseach eagraithe a chomhrac agus ar fhreagairt do bhagairtí nua agus do bhagairtí atá ag teacht chun cinn.

Díreofar freisin ar luachanna an Aontais, ar chearta bunúsacha agus ar an smacht reachta trí aghaidh a thabhairt ar fhoréigean teaghlaigh, gnéasach agus inscnebhunaithe, idirdhealú in aghaidh mionlach a chomhrac, agus cearta an linbh a chosaint agus a chur chun cinn.