Diżabbiltà fl-UE: fatti u ċifri

Ħafna persuni b'diżabbiltà għadhom jiffaċċaw ostakli biex jaċċessaw il-kura tas-saħħa, l-edukazzjoni, l-impjiegi, attivitajiet rikreattivi, u biex jipparteċipaw fil-ħajja politika. Kważi nofs il-popolazzjoni tal-UE taħseb li d-diskriminazzjoni bbażata fuq id-diżabbiltà hija mifruxa f'pajjiżhom.

L-UE u l-istati membri tagħha qed jaħdmu biex jiżguraw li l-persuni kollha b'diżabbiltà:

• igawdu d-drittijiet tagħhom, inkluż il-moviment liberu
• jistgħu jipparteċipaw bis-sħiħ fis-soċjetà u fl-ekonomija
• ma jesperjenzawx diskriminazzjoni

Kemm-il persuna għandha diżabbiltà fl-UE?

Fl-2024, 24% tal-popolazzjoni tal-UE minn 16-il sena 'l fuq kellha xi forma ta' diżabbiltà.

Skont l-istimi tal-Eurostat, dan jammonta għal 90 miljunpersuna jew adult minn kull erbgħa fl-UE.

Perċentwal ta' persuni b'diżabbiltà f'kull pajjiż

Il-mappa ta' hawn taħt turi l-perċentwal ta' persuni b'diżabbiltà skont il-pajjiż (id-data ġejja mill-Eurostat u tirreferi għall-2024). Tista' tmur fuq iċ-ċrieki biex tiskopri l-perċentwali għal kull stat membru tal-UE. Il-Latvja għandha l-ogħla sehem ta' persuni b'diżabbiltà (41.2%), bil-Finlandja warajha (34.9%).

Aktar ma tikber, aktar hemm ċans li jkollok diżabbiltà

Din il-grafika turi s-sehem ta' persuni b'diżabbiltà skont il-grupp ta' età fl-2024.

Hemm aktar nisa b'diżabbiltà

Fl-2024, is-sehem ta' nisa b'diżabbiltà kien ogħla minn dak tal-irġiel fl-istati membri kollha. Fl-UE, bħala medja, 26.2% tal-popolazzjoni totali tan-nisa għandha diżabbiltà, meta mqabbla ma' 21.5% tal-popolazzjoni totali tal-irġiel.

L-isfidi li jiffaċċaw il-persuni b'diżabbiltà

1 minn kull 2 iħossuhom diskriminati

Ħafna persuni b'diżabbiltà jiġu ttrattati ħażin jew inġustament minħabba d-diżabbiltà tagħhom. Fl-2023, stħarriġ tal-Ewrobarometru żvela li 54% tal-persuni b'diżabbiltà jħossuhom diskriminati.

17.7% tal-persuni b'diżabilità fl-età ta' bejn l-20 u s-26 sena kienu qiegħda fl-2020, meta mqabbla ma' 8.6% tal-persuni mingħajr diżabbiltà mill-istess grupp ta' età. Dan jikkontribwixxi għal nuqqas ta' awtonomija finanzjarja għall-persuni b'diżabbiltà.

1 minn 3 jinsabu f'riskju ta' faqar jew esklużjoni soċjali

Fl-2024, 29% tal-persuni b'diżabbiltà kienu f'riskju ta' faqar jew esklużjoni soċjali, meta mqabbla ma' 18% tal-persuni mingħajr diżabbiltà.

1 minn kull 5 jitilqu mill-iskola qabel iż-żmien

Ir-rata ta' tluq mill-iskola qabel iż-żmien hija d-doppju għall-persuni b'diżabbiltà meta mqabbla mal-persuni mingħajr diżabbiltà. Ħafna żgħażagħ b'diżabbiltà jattendu skejjel speċjali u għandhom diffikultajiet biex jaċċessaw l-edukazzjoni u t-taħriġ ġenerali: 29% biss jiksbu lawrja terzjarja (edukazzjoni postsekondarja) meta mqabbla ma' 44% tal-persuni mingħajr diżabbiltà.

4 darbiet aktar probabbli li jkollhom ħtiġijiet tal-kura tas-saħħa mhux issodisfati

Kulħadd għandu d-dritt għal kura tas-saħħa preventiva u trattament mediku, iżda għall-persuni b'diżabbiltà l-kura tas-saħħa spiss tkun għalja wisq, 'il bogħod u soġġetta għal ħinijiet twal ta' stennija.

1 minn kull 5 huma vittmi ta' vjolenza

Il-persuni b'diżabbiltà, b'mod partikolari n-nisa, l-anzjani u t-tfal, huma f'riskju akbar li jġarrbu vjolenza u abbuż, kemm id-dar kif ukoll fl-istituzzjonijiet tal-kura: 17% tal-persuni b'diżabbiltà huma vittmi ta' vjolenza, meta mqabbla ma' 8% tal-persuni mingħajr diżabbiltà.

Ara wkoll

• Konvenzjoni dwar id-Drittijiet ta' Persuni b'Diżabilità (Nazzjonijiet Uniti)
• Strateġija dwar id-drittijiet tal-persuni b'diżabbiltà 2021-2030 (Kummissjoni Ewropea)