Kard Ewropea tad-diżabilità

Kard Ewropea tad-diżabilità

Prova ta' diżabilità

Il-persuni b'diżabilità spiss jindunaw li l-kards jew iċ-ċertifikati tad-diżabilità nazzjonali tagħhom ma jiġux rikonoxxuti meta jżuru jew jivvjaġġaw lejn pajjiżi oħra tal-UE.

Il-Kard Ewropea tad-diżabilità l-ġdida ser isservi bħala prova tal-istatus tad-diżabilità kullimkien fl-UE.

Kundizzjonijiet speċjali u trattament preferenzjali

Bl-użu tal-kard, il-persuni b'diżabilità għandu jkollhom aċċess għall-istess kundizzjonijiet speċjali u trattament preferenzjali bħar-residenti tal-pajjiż li jżuru.

Il-pajjiżi tal-UE normalment joffru kundizzjonijiet speċjali meta jużaw it-trasport pubbliku u trattament preferenzjali f'avvenimenti u attivitajiet kulturali, ta' divertiment u sportivi. Pereżempju meta jżuru mużew jew jattendu kunċert.

Il-vantaġġi huma differenti fost l-istati membri, u jistgħu jinkludu:

• dħul bla ħlas
• prezzijiet imnaqqsa
• aċċess prijoritarju
• assistenta personali
• gwidi bil-braille jew awdjogwidi
• għajnuniet għall-mobilità
• annimali ta' assistenza

Kriterji ta' eliġibbiltà

Il-kard Ewropea tad-diżabilità l-ġdida ser tinħareġ mill-awtoritajiet nazzjonali kompetenti f'kull stat membru. Il-pajjiżi tal-UE ser jibqgħu responsabbli biex jiddeterminaw il-kriterji ta' eliġibbiltà u l-proċedura għall-għoti tal-istatus ta' diżabilità.

Format

Il-kard ser tiġi offruta kemm f'format fiżiku kif ukoll f'format diġitali. L-istati membri ser ikunu jistgħu joħorġu karti bilingwi, li jinkludu kemm l-Ingliż kif ukoll il-lingwi nazzjonali tagħhom. Jistgħu wkoll jinkludu kodiċi QR fuq il-kards, bħala l-aktar għodda effettiva u b'implimentazzjoni faċli biex tiġi evitata l-frodi.

Kard Ewropea għall-parkeġġ għall-persuni b'diżabilità

Kard Ewropea għall-parkeġġ għall-persuni b'diżabilità teżisti diġà. Sfortunatament, il-kard attwali mhux dejjem tiġi rikonoxxuta fi stati membri oħra minħabba differenzi fil-format bejn il-pajjiżi.

Sabiex jiġu żgurati implimentazzjoni uniformi u rikonoxximent reċiproku madwar l-Unjoni, verżjoni mtejba tal-kard tal-UE għall-parkeġġ b'format komuni tal-UE ser tissostitwixxi l-kards nazzjonali.

Drittijiet u faċilitajiet preferenzjali għall-parkeġġ

Il-kard Ewropea għall-parkeġġ ser tiżgura li l-persuni kollha b'diżabilità rikonoxxuta jkollhom aċċess għad-drittijiet u l-faċilitajiet preferenzjali għall-parkeġġ tal-pajjiż li jżuru.

Bħalma huma:

• spazju estiż għall-parkeġġ
• postijiet ta' parkeġġ riżervati
• tariffa mnaqqsa għall-parkeġġ
• aċċess għal żoni ta' traffiku ristrett

Format

Il-kard Ewropea għall-parkeġġ ser tinħareġ mill-istati membri f'format fiżiku, bl-opzjoni li l-kard tiġi offruta b'mod volontarju f'format diġitali wkoll.

Benefiċċji

Il-kard Ewropea tad-diżabilità l-ġdida u l-kard Ewropea għall-parkeġġ għall-persuni b'diżabilità mtejba huma mistennija:

jissimplifikaw ir-rikonoxximent reċiproku tal-istatus ta' diżabilità

jiffaċilitaw il-moviment liberu madwar l-UE

jiffaċilitaw l-aċċess għall-istess kundizzjonijiet preferenzjali bħar-residenti tal-pajjiż ospitanti

​

Meta ser ikunu disponibbli l-kards?

F'Ottubru 2024, il-Kunsill adotta żewġ direttivi li jistabbilixxu l-kard Ewropea tad-diżabilità u l-kard Ewropea għall-parkeġġ għal persuni b'diżabilità.

Għaż-żewġ direttivi, l-istati membri tal-UE ser ikollhom sentejn u nofs biex jadattaw il-leġiżlazzjoni nazzjonali tagħhom u tliet snin u nofs biex japplikaw id-direttiva.

• Il-Kunsill u l-Parlament iwittu t-triq għal kard Ewropea tad-diżabilità u kard Ewropea għall-parkeġġ għall-persuni b'diżabilità (stqarrija għall-istampa, 8 ta' Frar 2024)
• Kard Ewropea tad-diżabilità u kard Ewropea għall-parkeġġ għal persuni b'diżabilità: il-Kunsill jadotta direttivi ġodda (stqarrija għall-istampa, 14 ta' Ottubru 2024)

Diżabilità fl-UE

Il-Kummissjoni Ewropea tistma li 30 miljun persuna fl-UE għandhom diżabilità rikonoxxuta u għalhekk jistgħu jibbenefikaw minn kundizzjonijiet speċjali u trattament preferenzjali.

Madankollu, l-għadd reali ta' persuni li jiddikjaraw li għandhom limitazzjonijiet fl-attivitajiet tas-soltu minħabba xi tip ta' diżabilità huwa stmat li huwa ħafna ogħla.

Id-data tal-Eurostat, mill-2024, turi li 24% tal-popolazzjoni tal-UE ta' 'l fuq minn 16-il sena jista' jkollha xi forma ta' diżabilità. Dan huwa ugwali għal 90 miljun persuna jew 1 minn kull 4 adulti fl-UE.

• Livell ta' diżabilità (limitazzjoni tal-attività) skont is-sess, l-età u l-kwintil tal-introjtu (Eurostat)

Faqar u esklużjoni soċjali

Teżisti firxa ta' inugwaljanzi bejn il-persuni b'diżabilità u l-persuni mingħajr diżabilità. Pereżempju, il-persuni b'diżabbiltà għadhom riskju ogħla ta' faqar u ta' esklużjoni soċjali. Fl-2024, 29% tal-persuni b'diżabilità kienu f'riskju ta' faqar jew esklużjoni soċjali, meta mqabbla ma' 18% tal-persuni mingħajr diżabilità.

Għal din ir-raġuni, il-pajjiżi tal-UE jridu jiffaċilitaw lill-persuni b'diżabilità biex jaċċessaw il-kundizzjonijiet speċjali li huma intitolati għalihom meta jivvjaġġaw madwar l-UE.

• Inabbiltà li wieħed iħallas għal ġimgħa btala fis-sena 'l bogħod mid-dar (Eurostat)

Il-persuni b'diżabbiltà huma f'riskju ogħla ta' faqar jew ta' esklużjoni soċjali

Din il-graff turi l-perċentwal ta' persuni b'diżabilità f'riskju ta' faqar jew esklużjoni soċjali, meta mqabbla ma' persuni mingħajr diżabilità (id-data tirreferi għall-2024).

• Persuni f'riskju ta' faqar jew esklużjoni soċjali skont il-livell ta' diżabilità, sess u età (Eurostat)