Aċċessibbiltà għal prodotti u servizzi għall-persuni b'diżabilità u l-anzjani

Għaliex għandna regoli tal-UE dwar ir-rekwiżiti ta' aċċessibbiltà

L-UE għandha l-għan li tagħmel diversi prodotti u servizzi aktar aċċessibbli għal persuni anzjani u persuni b'diżabilità, filwaqt li tirrispetta l-prinċipju tat-trattament ugwali.

It-titjib tal-funzjonament tas-suq intern għal prodotti u servizzi aċċessibbli speċifiċi, ikopri kemm il-ħtiġijiet tal-industrija kif ukoll dawk tal-konsumaturi. Permezz ta' ambjent fejn il-prodotti u s-servizzi jkunu aktar aċċessibbli, jista' jkun hemm aktar inklużjoni u parteċipazzjoni taċ-ċittadini fis-soċjetà.

Ir-rekwiżiti ta' aċċessibbiltà nazzjonali attwali relatati ma' prodotti u servizzi speċifiċi huma differenti minn stat membru għal ieħor, li jwassal għal frammentazzjoni tas-suq uniku.

Id-domanda għall-prodotti u s-servizzi aċċessibbli diġà hija għolja u l-għadd ta' ċittadini b'diżabilità jew limitazzjonijiet funzjonali ser jiżdied b'mod sinifikanti hekk kif il-popolazzjoni tal-UE tixjieħ dejjem iktar.

Sabiex jiġu stabbiliti standards komuni ta' aċċessibbiltà, l-UE adottat żewġ direttivi:

• l-att Ewropew dwar l-aċċessibbiltà (2019), li jiddefinixxi rekwiżiti minimi ta' aċċessibbiltà għal prodotti u servizzi ewlenin
• id-direttiva dwar l-aċċessibbiltà għall-web tas-settur pubbliku (2016), li tiddefinixxi standards biex il-prodotti u s-servizzi diġitali jkunu aktar aċċessibbli għall-utenti kollha

Aċċessibbiltà għal prodotti u servizzi

L-att Ewropew dwar l-aċċessibbiltà jinkludi rekwiżiti ta' aċċessibbiltà għal prodotti u servizzi ewlenin bħal:

• telefowns, kompjuters, terminals ta' pagament jew terminals self-service għall-bejgħ ta' biljetti tat-trasport tal-passiġġieri
• servizzi bankarji għall-konsumatur
• servizzi ta' komunikazzjoni elettronika, inkluż pereżempju servizzi tat-telefown u tal-Internet
• telefonati fuq in-numru ta' emerġenza 112
• aċċess għal servizzi tal-media awdjoviżiva
• kotba elettroniċi
• kummerċ elettroniku

L-att Ewropew dwar l-aċċessibbiltà (id-direttiva 2019/882) ġie adottat fl-2019. Ir-regoli l-ġodda jġibu benefiċċji mhux biss lil għexieren ta' miljuni ta' Ewropej b'diżabilitajiet, iżda wkoll lil ħafna anzjani fl-UE.

Prodotti

Il-prodotti għandhom jirrispettaw dawn li ġejjin:

• rekwiżiti ta' aċċessibbiltà komuni fuq l-interfaċċa tal-utent u d-disinn funzjonali tal-prodotti
• rekwiżiti ta' aċċessibbiltà aktar speċifiċi għal xi tagħmir elettroniku għall-konsumatur
• l-imballaġġ, struzzjonijiet dwar l-istallazzjoni u informazzjoni oħra dwar prodotti għall-konsumatur għandhom ikunu aċċessibbli wkoll

Servizzi

Id-direttiva tinkludi wkoll xi rekwiżiti speċifiċi għal servizzi:

• rekwiżiti komuni b'mod partikolari fuq is-siti web
• is-servizzi ta' appoġġ għandhom ikunu aċċessibbli wkoll

Eżempji ta' rekwiżiti ta' aċċessibbiltà speċifiċi fit-terminals self-service, huma:

• magni tal-biljetti jew ATMs, ser ikollhom jipprovdu l-possibbiltà li jintużaw headsets personali sabiex persuni b'vista batuta jkunu jistgħu jsegwu struzzjonijiet bl-awdjo
• jekk terminal self-service jipprevedi modi viżwali ta' tħaddim, huwa għandu jipprovdi minn tal-anqas mod wieħed ta' tħaddim li ma jirrikjedix il-perċezzjoni tal-kulur min-naħa tal-utent

Inħaddmu r-regoli b'suċċess

L-att Ewropew dwar l-aċċessibbiltà huwa direttiva, li jfisser li jistabbilixxi għanijiet ta' aċċessibbiltà vinkolanti iżda jħalli f'idejn l-istati membri individwali biex jiddeċiedu kif iridu jilħquhom.

Il-pajjiżi tal-UE għandhom sa Ġunju 2025 biex jinkludu l-linji gwida tad-direttiva fil-leġiżlazzjoni nazzjonali tagħhom.

L-UE ħalliet ukoll lok għal xi eċċezzjonijiet. Pereżempju, il-mikrointrapriżi b'inqas minn 10 impjegati u fatturat annwali ta' inqas minn €2 miljun li jipprovdu servizzi huma eżentati mid-direttiva u dawk li jipprovdu prodotti ser ikunu eżentati minn xi obbligi.

Aċċessibbiltà għall-web u l-apps

Id-direttiva dwar l-aċċessibbiltà għall-web tas-settur pubbliku (2016/2102), stabbiliet standards biex il-prodotti u s-servizzi diġitali jkunu aktar aċċessibbli għall-utenti kollha Stabbiliet ukoll mekkaniżmu ta' monitoraġġ kif ukoll introduċiet verifika tal-konformità.

Dawn l-elementi ġodda japplikaw għas-siti web u l-apps tal-mobile ta' amministrazzjonijiet, sptarijiet pubbliċi, qrati u korpi pubbliċi oħra.

Fil-prattika, dan ifisser li l-utenti ser ikunu jistgħu jitolbu informazzjoni speċifika jekk il-kontenut ma jkunx aċċessibbli u jirrapportaw kwistjonijiet ta' konformità sempliċiment billi jikklikkjaw fuq link ta' feedback.

Id-direttiva daħlet fis-seħħ f'Diċembru 2016.

• Siti web u apps aċċessibbli għal kulħadd: Il-Kunsill jadotta l-ewwel regoli ġodda għall-UE kollha (stqarrija għall-istampa, 18/07/2016)

Fil‑Kunsill

Wara li l-Kummissjoni ppreżentat il-proposta tagħha f'Diċembru 2015 il-Grupp ta' Ħidma tal-Kunsill dwar Kwistjonijiet Soċjali (SQWP) eżamina t-test fid-dettall.

Il-presidenza Slovakka avvanzat id-diskussjonijiet dwar id-direttiva u adottat approċċ gradwali biex jiġi emendat it-test, billi ffukat b'mod partikolari fuq li:

• jiġi ċċarat l-ambitu
• titjieb iċ-ċarezza ġuridika fit-test
• jiġu evitati duplikazzjonijiet jew kunflitti possibbli ma' leġislazzjoni eżistenti tal-UE

• Rapport ta' progress, 18 ta' Novembru 2016
• Grupp ta' ħidma dwar Kwistjonijiet Soċjali (informazzjoni ġenerali)

Waqt id-diskussjonijiet, kemm fil-livell tekniku kif ukoll f'dak politiku, il-presidenza Maltija ħejjiet suġġerimenti għall-abbozzar biex jiġi indirizzat xi tħassib mid-delegazzjonijiet, li fosthom kien hemm il-ħtieġa li:

• tingħata attenzjoni lil prodotti u servizzi magħżula
• ma jiġux stabbiliti rekwiżiti ta' aċċessibbiltà ġodda, fejn leġiżlazzjoni preċedenti tal-UE diġà tistabbilixxi rekwiżiti ta' aċċessibbiltà
• jintlaħaq qbil sabiex tinżamm l-istruttura kif proposta mill-Kummissjoni
• tiġi pprovduta aktar ċarezza rigward liema aspetti għandhom jiġu inklużi fid-direttiva dwar is-servizzi tal-media awdjoviżiva u liema għandhom jiġu inklużi fl-att dwar l-aċċessibbiltà
• jitħalla barra mmarkar speċifiku tal-aċċessibbiltà minħabba biża' li jkun hemm piżijiet amministrattivi u finanzjarji

Il-presidenza għamlet pass sostanzjali lejn pożizzjoni tal-Kunsill dwar id-direttiva.

• Rapport ta' progress, 1 ta' Ġunju 2017

Wara diskussjonijiet intensi u abbozzar mill-ġdid, il-Kunsill qabel dwar il-pożizzjoni tiegħu (approċċ ġenerali) dwar id-direttiva dwar l-aċċessibbiltà waqt il-presidenza Estonjana. Waqt id-diskussjonijiet, id-delegazzjonijiet ikkummentaw fuq il-kopertura wiesgħa tal-proposta, diversi rabtiet ma' leġislazzjoni oħra tal-UE u lakuni fil-valutazzjoni tal-impatt.

L-aktar kwistjonijiet politiċi importanti ssolvew fl-aħħar trilogu, b'mod partikolari l-kamp ta' applikazzjoni tagħha f'oqsma bħal:

• it-trasport u t-turiżmu
• l-akkomodazzjoni
• is-servizzi tal-ikel
• l-ambjent mibni
• atti relatati tal-UE
• mikrointrapriżi

• Aċċessibbiltà għall-prodotti u s-servizzi: Il-Kunsill jilħaq qbil dwar il-pożizzjoni tiegħu (stqarrija għall-istampa, 7 ta' Diċembru 2017)

In-negozjati bejn il-Kunsill u l-Parlament Ewropew bdew f'Marzu 2018 u ntemmu bi qbil proviżorju f'Novembru 2018.

Il-Kumitat tar-Rappreżentanti Permanenti tal-Kunsill (Coreper) approva l-qbil proviżorju fid-19 ta' Diċembru 2018.

Il-Kunsill adotta l-att dwar l-aċċessibbiltà fid-9 ta' April 2019, wara l-adozzjoni tal-ewwel pożizzjoni tiegħu fl-ewwel qari mill-Parlament fit-13 ta' Marzu 2019.

Id-direttiva daħlet fis-seħħ f'Ġunju 2019.

• Titjib tal-aċċessibbiltà għal prodotti u servizzi għall-persuni b'diżabbiltà u l-anzjani: il-Kunsill jadotta l-att dwar l-aċċessibbiltà (stqarrija għall-istampa, 9 ta' April 2019)
• Prodotti u servizzi aktar aċċessibbli għaċ-ċittadini tal-UE: Il-Kunsill japprova l-qbil proviżorju mal-Parlament Ewropew (stqarrija għall-istampa, 19 ta' Diċembru 2018)

Il-politika tal-aċċessibbiltà għas-sit web tal-Kunsill

Barra minn hekk, dan is-sit web huwa sit web pubbliku, u s-Segretarjat Ġenerali tal-Kunsill jaħdem biex jiżgura li jkun faċli għall-utent. Dan huwa f'konformità mad-direttiva dwar l-aċċessibbiltà għall-web tal-UE (2016).

L-għan tal-aċċessibbiltà għall-web hu li t-testi, l-istampi, il-forom u n-navigazzjoni tal-web ikunu aċċessibbli u jistgħu jinftiehmu mill-pubbliku ġenerali.

Sabiex nissodisfaw il-kriterji ta' aċċessibbiltà għall-web li qed jevolvu, hija tieħu kont ta' aspetti bħal:

• 'alt tags' - deskrizzjonijiet tal-istampi li jgħinu lil utenti li jaħdmu b'qarrejja tal-iskrin biex jifhmu x'ifissru l-istampi
• kuntrast bejn test u sfond - li huwa aġġustat biex ikun jista' jinqara
• navigabbiltà - in-navigazzjoni permezz ta' kelma ewlenija hija disponibbli għal utenti li għandhom problemi jużaw il-maws

Qed naħdmu b'mod attiv biex inżidu l-aċċessibbiltà u l-użu tas-sit web tagħna. Għal iktar informazzjoni:

• il-politika tal-aċċessibbiltà għas-sit web tal-Kunsill
• Direttiva tal-UE dwar l-aċċessibbiltà għall-web (Ġurnal Uffiċjali tal-UE)