Kunsill Agrikoltura u Sajd, 12-13/12/2016, 12 u 13 ta' Diċembru 2016

Riżultati ewlenin

Agrikoltura, 12 ta' Diċembru

Tisħiħ tal-pożizzjoni tal-bdiewa fil-katina tal-provvista tal-ikel u l-indirizzar ta' prattiki kummerċjali inġusti

"Prattiki ġusti huma r-regola l-ġdida tas-sistema. Il-ġlieda kontra l-prattiki kummerċjali inġusti daħlet f'era ġdida. Illum saħħaħna l-ġlieda tagħna kontra l-prattiki kummerċjali inġusti. L-appoġġ unanimu mill-Kunsill ifisser li l-prattiki kummerċjali ser jiġu eżaminati mill-qrib fil-livell Ewropew. Il-Presidenza Slovakka laħqet b'mod sħiħ l-għan tagħha li tiżgura ambjent kummerċjali trasparenti u ġust għall-bdiewa Ewropej"

Gabriela Matečná, Ministru Slovakk għall-agrikoltura u l-iżvilupp rurali u president tal-Kunsill

Il-Kunsill adotta konklużjonijiet dwar it-tisħiħ tal-pożizzjoni tal-bdiewa fil-katina tal-provvista tal-ikel u l-indirizzar ta' prattiki kummerċjali inġusti.

Il-Kunsill jagħraf l-importanza ta' katina tal-provvista tal-ikel li taħdem tajjeb u juri tħassib dwar il-vulnerabbiltà tal-bdiewa f'dan il-kuntest, minkejja għadd ta' sforzi biex tittejjeb is-sitwazzjoni tagħhom. Il-konklużjonijiet jissuġġerixxu soluzzjonijiet li l-Kummissjoni u l-istati membri jistgħu jimplimentaw biex jiggarantixxu, fost affarijiet oħra, li jinqasmu r-riskji b'mod iktar ugwali tul il-katina tal-provvista, li tissaħħaħ il-konklużjoni tal-kuntratti, u li jitjiebu t-trasparenza tas-suq u l-ġestjoni tar-riskji.

Il-konklużjonijiet jitolbu wkoll lill-Kummissjoni tagħmel valutazzjoni tal-impatt bil-ħsieb li tipproponi qafas leġislattiv jew miżuri mhux leġislattivi oħra tal-UE biex jiġu indirizzati l-prattiki kummerċjali inġusti. Kull inizjattiva għandha tirrispetta l-prinċipju tas-sussidjarjetà u tħares is-sistemi nazzjonali li jaħdmu tajjeb.

• Konklużjonijiet tal-Kunsill dwar it-tisħiħ tal-pożizzjoni tal-bdiewa fil-katina tal-provvista tal-ikel u l-indirizzar ta' prattiki kummerċjali inġusti

Agrikoltura u tibdil fil-klima

Il-ministri kellhom skambju ta' fehmiet dwar l-aspetti agrikoli tal-proposti tal-Kummissjoni għal regolament dwar il-qsim tal-isforzi (ESR) u regolament dwar l-użu tal-art, il-bidla fl-użu tal-art u l-forestrija (ir-regolament LULUCF).

L-istati membri b'mod ġenerali laqgħu l-proposti tal-Kummissjoni u enfasizzaw il-kontribut li l-agrikultura tista' tagħti biex jittaffa t-tibdil fil-klima. Saħqu wkoll fuq l-importanza li tiġi ggarantita l-konsistenza bejn l-objettivi tal-ġlieda kontra t-tibdil fil-klima u l-iżgurar tas-sigurtà tal-ikel.

Xi ministri kkonċentraw ukoll l-intervent tagħhom fuq ir-rwol tal-ġestjoni sostenibbli tal-forestrija.

Suġġetti oħra fuq l-aġenda

Il-ministri ġew mgħarrfa dwar is-sitwazzjoni attwali tan-negozjati rigward ir-regolament propost dwar il-produzzjoni organika, u ta':

• id-drittijiet tan-nissiela tal-pjanti
• l-implimentazzjoni tar-regolament il-ġdid dwar miżuri protettivi kontra organiżmi ta' ħsara għall-pjanti
• ir-riżultati tal-laqgħa ta' tnedija tal-Pjattaforma tal-UE dwar il-ħela tal-ikel u t-telf tal-ikel

Sajd, 13 ta' Diċembru

 Il-limiti ta' qbid għall-2017 fl-Atlantiku u l-Baħar tat-Tramuntana 

"Is-sostenibbiltà kienet il-bażi tal-ftehim tal-lum: is-sostenibbiltà tal-istokkijiet tal-ħut tagħna, iżda wkoll dik tas-settur tas-sajd tagħna. Irnexxielna nirrikonċiljaw il-fehmiet differenti għall-ġid tal-partijiet kollha involuti, u ħloqna l-bażi għall-kisba tar-rendiment massimu sostenibbli"

Gabriela Matečná, Ministru Slovakk għall-agrikoltura u l-iżvilupp rurali u president tal-Kunsill 

Il-Kunsill laħaq qbil politiku dwar regolament li jikkonċerna l-limiti ta' qbid għall-2017 għall-istokkijiet ta' ħut kummerċjali ewlenin fl-Atlantiku, fil-Baħar tat-Tramuntana u f'attivitajiet ta' sajd internazzjonali li fihom jieħdu sehem bastimenti tal-UE.

Bis-saħħa tad-deċiżjoni tal-Kunsill, l-għadd ta' stokkijiet ta' ħut immaniġġati fil-livelli tar-rendiment massimu sostenibbli ser jiżdiedgħal 44 is-sena d-dieħla u x-xejra pożittiva b'rabta mal-istokkijiet f'limiti bijoloġiċi sikuri ser tissaħħaħ. Il-qbil jindirizza wkoll il-kwistjoni ta' speċijiet bi kwota limitanti f'sajd imħallat billi jipprovdi elementi ta' flessibbiltà.

Il-qbil ser japplika mill-1 ta' Jannar 2017 'il quddiem.

• Opportunitajiet tas-sajd fil-Grigal tal-Atlantiku għall-2017: ftehim tal-Kunsill