Kunsill Agrikoltura u Sajd, 18/06/2018, 18 ta' Ġunju 2018

Riżultati ewlenin

Illum kellna diskussjonijiet kruċjali dwar il-futur tal-agrikoltura u s-sajd tagħna. Fis-snin li ġejjin iż-żewġ setturi ser ikollhom mhux biss jiżguraw is-sigurtà alimentari għall-Ewropa iżda wkoll jaffaċċjaw l-isfidi tas-sostenibbiltà, l-innovazzjoni u t-tiġdid ġenerazzjonali. Il-Kunsill irid jiżgura li ż-żewġ setturi jkunu mgħammra bl-għodda u r-riżorsi finanzjarji t-tajba biex jaffaċċjaw dawn l-isfidi. Rumen Porodzanov, ministru għall-agrikoltura, l-ikel u l-forestrija tar-Repubblika tal-Bulgarija u president tal-Kunsill.

Sajd

Fond Ewropew għall-Affarijiet Marittimi u s-Sajd

Il-Kummissjoni ppreżentat il-proposta tagħha għal Fond Ewropew għall-Affarijiet Marittimi u s-Sajd (EMFF) ġdid b'valur ta' €6.14 biljun għall-investiment fl-ekonomija marittima u għall-appoġġ tal-komunitajiet tas-sajd, u l-ministri kellhom l-opportunità li jirreaġixxu għall-proposta. Il-ministri laqgħu l-proposta u identifikaw is-simplifikazzjoni u l-flessibbiltà reali għall-istati membri bħala kwistjonijiet ewlenin.

Kontroll tas-sajd

Il-Kummissjoni ppreżentat lill-Kunsill il-proposta tagħha li tissimplifika u ttejjeb il-miżuri eżistenti dwar il-kontroll tas-sajd. Il-proposta għandha l-għan li tiżgura konformità sħiħa mal-Politika Komuni tas-Sajd u li jinkisbu l-objettivi tagħha.

Fl-interventi tagħhom, il-ministri enfasizzaw il-ħtieġa li tkun simplifikata s-sistema attwali mingħajr piż amministrattiv addizzjonali u semmew il-possibbiltà li jinkiseb appoġġ finanzjarju għas-soluzzjonijiet elettroniċi fil-proposta.

Opportunitajiet tas-sajd għall-2019

Il-Kunsill ingħata informazzjoni dwar komunikazzjoni tal-Kummissjoni dwar is-sitwazzjoni attwali tal-Politika Komuni tas-Sajd u l-konsultazzjoni dwar l-opportunitajiet tas-sajd għall-2019.

B'mod ġenerali l-istati membri laqgħu l-komunikazzjoni iżda enfasizzaw id-diffikultajiet marbuta mal-implimentazzjoni sħiħa tal-obbligu ta' ħatt l-art, b'mod partikolari fir-rigward tal-ispeċi bi kwota limitanti, u l-vulnerabbiltà tas-sajd fuq skala żgħira minkejja t-titjib ġenerali fil-prestazzjoni ekonomika.

Il-komunikazzjoni tal-Kummissjoni dwar l-opportunitajiet tas-sajd tagħti bidu għall-eżerċizzju annwali tal-istabbiliment tal-qabdiet totali permissibbli (TACs) u l-kwoti nazzjonali għas-sena ta’ wara. It-TACs għall-Baħar Baltiku ser jiġu stabbiliti f'Ottubru, għall-ispeċi tal-baħar fond f'Novembru, għall-Baħar tat-Tramuntana f'Diċembru 2018.

• Il-ġestjoni tal-istokkijiet tal-ħut tal-UE (informazzjoni ġenerali)

Agrikoltura

Pakkett ta’ riforma tal-PAK ta’ wara l-2020

Il-Kunsill kellu l-opportunità tal-ewwel skambju ta' fehmiet formali dwar il-proposti tal-Kummissjoni għar-riforma tal-Politika Agrikola Komuni wara l-2020. Il-proposti, ippreżentati fl-1 ta' Ġunju, jiddeskrivu mudell tal-implimentazzjoni ġdid għall-PAK fejn l-istati membri jkollhom aktar flessibbiltà biex ifasslu d-deċiżjonijiet tagħhom stess u jadattawhom għaċ-ċirkostanzi lokali.

Il-ministri laqgħu diversi elementi tal-proposti iżda esprimew tħassib dwar it-tnaqqis propost mill-Kummissjoni għall-baġit tal-PAK b'mod ġenerali u għall-iżvilupp rurali b'mod partikolari, u kienu xettiċi fir-rigward tal-kapaċità tal-PAK il-ġdida li tikseb simplifikazzjoni ġenwina għall-awtoritajiet nazzjonali u għall-bdiewa. Matul id-dibattitu l-ministru kienu infurmati wkoll dwar memorandum dwar il-baġit għall-PAK fil-kuntest tal-QFP li jmiss iffirmat minn bosta stati membri u dwar id-disponibbiltà dejjem inqas tal-ilma għall-agrikoltura f'Ċipru.

• Il-ġejjieni tal-PAK wara l-2020 (informazzjoni ġenerali)

Sitwazzjoni tas-suq

Il-Kummissjoni aġġornat lill-Kunsill dwar l-aħħar żviluppi fl-aktar swieq agrikoli importanti, b'mod partikolari s-suq tas-settur tal-ħalib, is-suq taz-zokkor u dak tal-laħam tal-majjal.

Il-ministri laqgħu s-sitwazzjoni u l-prospetti ekonomiċi ġeneralment pożittivi fis-setturi ewlenin tas-suq, iżda esprimew ukoll it-tħassib tagħhom fir-rigward tas-sitwazzjoni diffiċli fis-settur tal-laħam tal-majjal fil-Polonja u fl-UE inġenerali, il-livell għoli b'mod persistenti tal-ħażniet ta' intervent tal-UE tat-trab tal-ħalib xkumat, u d-dazji tal-importazzjoni imposti reċentement mill-awtoritajiet tal-Istati Uniti fuq iż-żebbuġ tal-mejda Spanjol.

Suġġetti oħra fl-aġenda

Il-ministri kienu infurmati wkoll dwar diversi suġġetti:

• il-parir tal-ICES dwar l-effetti ekoloġiċi u ambjentali tas-sajd bl-impulsi elettriċi fil-Baħar tat-Tramuntana
• il-protezzjoni tan-naħal u ta' pollinaturi oħra
• l-inizjattiva BIOEAST fil-qasam tal-agrikoltura, l-akwakultura u l-forestrija bbażati fuq l-għarfien fil-bijoekonomija