"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Vidjokonferenza informali tal-ministri għas-sajd, 22 ta' Frar 2021
Riżultati ewlenin
F'vidjokonferenza informali qasira, il-ministri għas-sajd kellhom skambju ta' fehmiet dwar il-konsultazzjonijiet bejn l-UE u r-Renju Unit dwar l-istabbiliment tal-opportunitajiet tas-sajd għall-2021 u, għall-istokkijiet tal-baħar fond, għall-2021 u l-2022. Is-sessjoni bdiet bil-Kummissjoni Ewropea tinforma lill-ministri dwar is-sitwazzjoni attwali u tirreferi għall-progress li sar wara l-ewwel żewġ ċikli ta' konsultazzjonijiet bejn l-UE u r-Renju Unit; ippreżentat ukoll fil-qosor il-proposta tagħha għal deċiżjoni tal-Kunsill dwar il-pożizzjoni li għandha tittieħed f'isem l-UE għal dawn il-konsultazzjonijiet.
Il-ministri rringrazzjaw lill-Kummissjoni għall-kooperazzjoni mill-qrib u tajba li kien hemm s'issa, filwaqt li enfasizzaw il-ħtieġa li tissokkta bl-istess pass. Il-ministri esprimew ukoll b'mod unanimu l-appoġġ qawwi tagħhom għal konklużjoni rapida tan-negozjati. Tennew it-talba tagħhom għal ftehim li jiggarantixxi kundizzjonijiet indaqs bejn il-flotot tas-sajd tal-UE u tar-Renju Unit u jirrispetta t-tliet pilastri tal-Politika Komuni tas-Sajd: dak soċjali, ambjentali u ekonomiku.
Qegħdin ilkoll f'baħar wieħed f'dak li għandu x'jaqsam mal-objettivi tan-negozjati bejn l-UE u r-Renju Unit dwar l-opportunitajiet tas-sajd: irridu niżguraw qafas ċar, sostenibbli u bbilanċjat li jkun ta' benefiċċju għas-sajjieda, il-konsumaturi u l-ibħra tagħna.
Ricardo Serrão Santos, Ministru għall-Baħar tal-Portugall
Matul il-laqgħa, diversi delegazzjonijiet esprimew l-appoġġ tagħhom għal konklużjoni rapida tan-negozjati bejn l-UE u n-Norveġja, li tippermetti lill-flotot Ewropej jidħlu fl-ilmijiet Norveġiżi.
Informazzjoni Ġenerali
Fi Frar 2021, il-Kummissjoni adottat proposta għal deċiżjoni tal-Kunsill dwar il-pożizzjoni li għandha tittieħed (f'isem l-UE) fil-konsultazzjonijiet bilaterali. Din il-pożizzjoni hija bbażata fuq l-għanijiet tal-Politika Komuni tas-Sajd, inkluż l-aspetti soċjoekonomiċi, billi tibbaża d-deċiżjonijiet fuq l-aqwa parir xjentifiku disponibbli, tiżgura kundizzjonijiet ekwi, u tiżgura r-rispett għall-obbligi internazzjonali. Il-presidenza Portugiża issa ser tikkonsolida l-kummenti, ipprovduti mill-Istati Membri, fi proposta ta' kompromess tal-Kunsill, biex tiġi adottata malajr fil-bidu ta' Marzu (permezz ta' proċedura bil-miktub).
Affarijiet oħra
Id-delegazzjoni Spanjola infurmat lill-ministri dwar it-tħejjija għas-Seba' Ċiklu ta' negozjati għat-tiġdid tal-Ftehim ta' Sħubija dwar is-Sajd Sostenibbli (SFPA) tal-UE mar-Repubblika Iżlamika tal-Mauritania. Diversi delegazzjonijiet appoġġaw it-talba lill-Kummissjoni Ewropea biex tiffinalizza n-negozjati malajr kemm jista' jkun.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Qegħdin ilkoll f'baħar wieħed f'dak li għandu x'jaqsam mal-objettivi tan-negozjati bejn l-UE u r-Renju Unit dwar l-opportunitajiet tas-sajd: irridu niżguraw qafas ċar, sostenibbli u bbilanċjat li jkun ta' benefiċċju għas-sajjieda, il-konsumaturi u l-ibħra tagħna.
