Kunsill Kompetittività, 28-29/05/2015, 28 u 29 ta' Mejju 2015

Riżultati prinċipali

Is-suq uniku diġitali: it-trasformazzjoni diġitali tal-industrija Ewropea

Il-Kunsill iddiskuta l-istrateġija l-ġdida tas-suq uniku diġitali u adotta konklużjonijiet dwar it-trasformazzjoni diġitali tal-industrija Ewropea. Ġew enfasizzati għadd ta’ aspetti importanti, inkluż l-importanza li jiġu mmirati l-oqsma li jeħtieġu azzjoni għat-trasformazzjoni diġitali tal-industrija u li jitħeġġeġ l-iżvilupp tal-intraprenditorija diġitali, speċjalment negozji li jkunu għadhom kemm jiftħu. 

Suq uniku diġitali ta' prestazzjoni għolja jista’ jikkontribwixxi aktar minn €400 biljun fis-sena għall-ekonomija Ewropea u joħloq mijiet ta’ eluf ta’ impjiegi ġodda. Dana Reizniece-Ozola, Ministru għall-Ekonomija tal-Latvja

Dana Reizniece-Ozola, Ministru għall-Ekonomija tal-Latvja, qalet li "suq uniku diġitali ta' prestazzjoni għolja jista’ jikkontribwixxi aktar minn €400 biljun fis-sena għall-ekonomija Ewropea u joħloq mijiet ta’ eluf ta’ impjiegi ġodda".

Pakketti tal-ivvjaġġar

Il-Kunsill laħaq qbil politiku dwar ir-regoli riveduti dwar il-vjaġġi kollox inkluż maħsubin biex jadattaw is-suq tal-ivvjaġġar għall-era diġitali u biex jindirizzaw aħjar il-bżonnijiet tal-konsumaturi u tan-negozji. Din il-biċċa leġislazzjoni ser issaħħaħ id-drittijiet tal-vjaġġaturi meta jagħmlu prenotazzjoni online u joffru benefiċċji għan-negozji, b’mod partikolari l-intrapriżi żgħar u ta' daqs medju (SMEs).

Kumpanija privata b'responsabbiltà limitata b'membru uniku  

Il-ministri laħqu qbil dwar approċċ ġenerali biex tiġi stabbilita forma ġdida ta’ kumpanija privata b’responsabbiltà limitata b’membru uniku.

Waqt li ppresediet il-laqgħa tal-Kunsill,Dana Reizniece-Ozola qalet li "dan id-dossier huwa eżempju konkret tal-vantaġġi li d-diġitalizzazzjoni tista’ twassal fis-suq uniku. Din toffri benefiċċji għal dawk li jixtiequ jiftħu l-kumpaniji tagħhom stess, għall-impjegati, għall-SMEs li qed ifittxu li jespandu, u lill-amministrazzjonijiet pubbliċi li ser isiru aktar diġitali. Din ser tħeġġeġ it-tkabbir u tgħin fil-ħolqien tal-impjiegi."

Żona Ewropea tar-Riċerka - Riċerka intensiva fid-data u organizzata f'netwerk - Xjenza miftuħa  

Il-Kunsill adotta konklużjonijiet dwar il-pjan direzzjonali taż-ŻER għall-2015-2020 u dwar l-istruttura konsultattiva taż-ŻER. Huwa adotta wkoll konklużjonijiet dwar riċerka miftuħa, intensiva fid-data u organizzata f'netwerk.

Il-ministri kellhom skambju ta’ fehmiet dwar l-iżvilupp ta’ Aġenda Ewropea għax-xjenza miftuħa.  

Wara l-laqgħa, Mārīte Seile, Ministru għall-Edukazzjoni u x-Xjenza tal-Latvja, qalet li "s-sisien tas-sistema ekonomika moderna u innovattiva fl-Ewropa teħtieġ l-iżvilupp taż-Żona Ewropea tar-Riċerka u l-Aġenda Diġitali Ewropea. Jeħtieġ li l-innovazzjoni trawwem il-prosperità u tkun ta' servizz għaċ-ċittadini tal-UE".

• Konklużjonijiet tal-Kunsill dwar il-Pjan Direzzjonali 2015-2020 għaż-Żona Ewropea tar-Riċerka
• Konklużjonijiet tal-Kunsill dwar ir-reviżjoni tal-istruttura konsultattiva taż-Żona Ewropea tar-Riċerka
• Konklużjonijiet tal-Kunsill dwar riċerka miftuħa, intensiva fid-data u organizzata f'netwerk, bħala mutur għal innovazzjoni aktar veloċi u mifruxa