Kunsill Kompetittività, 01/10/2015, 1 ta' Ottubru 2015

Riżultati ewlenin

Il-Ministri ddiskutew kwistjonijiet mikroekonomiċi urġenti u ddibattew dwar kif jinkiseb l-ikbar valur miżjud Ewropew billi jkun żgurat li r-regolamentazzjoni tal-UE tgħin biex jitneħħew l-ostakoli għas-Suq Uniku. Waqt ikla ta' ħidma informali, il-Ministri ddiskutew ir-riforma tal-iskema tal-UE għan-negozjar ta' emissjonijiet u l-ġrajjiet reċenti li jikkonċernaw il-kontrolli tal-emissjonijiet fis-settur tal-karozzi.

"Eżami" tal-kompetittività

Il-Presidenza Lussemburgiża varat metodu ġdid ta’ ħidma - l-“Eżami tal-kompetittività” - maħsub biex jindirizza kwistjonijiet importanti li jaffettwaw l-ekonomija reali. Id-diskussjonijiet iffokaw b’mod partikolari fuq il-ħtieġa għal regoli aktar ċari u aktar konsistenti fil-livell tal-UE biex tingħata spinta lill-attività kummerċjali.

Illum bdejna metodu ta’ ħidma innovattiv li jeżamina l-impatt konkret tad-deċiżjonijiet politiċi fuq l-ekonomija reali u b’hekk fuq il-ħajja ta’ kull negozju u kull ċittadin.” Etienne Schneider, Viċi Prim Ministru u Ministru għall-Affarijiet Ekonomiċi tal-Lussemburgu.

Matul l-“eżami” l-Ministri ddiskutew kif l-aħjar tinkiseb l-assimilazzjoni tal-kompetittività, bil-għan li jkun aċċertat li l-impatt tal-miżuri ġodda kif ukoll ta' dawk eżistenti fuq l-ekonomija reali jiġu kkunsidrati sistematikament. Bħala eżempju konkret ta’ “assimilazzjoni”, il-Ministri kellhom skambju informali ta’ fehmiet dwar ir-riforma tas-Sistema Ewropea għan-Negozjar ta' Emissjonijiet (EU ETS) u l-impatt possibbli tagħha fuq il-kompetittività. “Ir-riforma tal-ETS hija xempju ta’ inizjattiva fejn jeħtieġ jinstab bilanċ tajjeb bejn il-ħtieġa, fuq naħa waħda, li jitwaqqaf it-tibdil fil-klima u, fuq in-naħa l-oħra, li tinżamm il-kompetittività tal-industrija tal-UE. Għandna bżonn noħolqu iktar inċentivi biex nippremjaw lil min irendi l-aħjar u nħeġġu l-investiment fl-aktar soluzzjonijiet ekoloġiċi u innovattivi”, stqarr Etienne Schneider wara l-laqgħa.  

L-industrija tal-karozzi

Waqt l-ikel, il-Ministri indirizzaw ukoll l-iżviluppi reċenti fis-settur tal-karozzi fir-rigward tal-kontrolli tal-emissjonijiet mill-karozzi li jniġġsu l-arja. Il-Kunsill ħa nota ta’ azzjoni mħabbra mill-Kummissjoni Ewropea biex jissaħħu l-kontrolli ta’ emissjonijiet mill-karozzi u l-ispjegazzjonijiet ipprovduti mill-Gvern Ġermaniż dwar il-passi meħuda biex jinvestiga l-avvenimenti reċenti ta’ Volkswagen.

“Għandna bżonn inserrħu l-imħuħ tas-swieq u nuru li qed nieħdu l-passi meħtieġa biex jerġa' jkun hemm il-fiduċja. Ninsab ottimist wara li smajt l-ispjegazzjonijiet mill-Kummissjoni u mill-kollegi madwar il-mejda, b’mod partikolari l-kollega Ġermaniż. Ħassejt li hemm rieda qawwija fost il-kollegi li nieħdu azzjoni u nitkellmu b'vuċi waħda.", qal Etienne Scheider wara l-laqgħa. 

• Riżultat tal-laqgħa tal-Kunsill