Kunsill Affarijiet Ekonomiċi u Finanzjarji, 27/01/2015, 27 ta' Jannar 2015

Riżultati ewlenin

Pjan ta' Investiment għall-Ewropa  

Il-Kunsill iddiskuta proposta li tistabbilixxi fond Ewropew għal investimenti strateġiċi, li huwa mistenni jimmobilizza mill-inqas €315-il biljun f'investiment privat u pubbliku.  

Il-presidenza kkonfermat pjanijiet biex jintlaħaq ftehim f'Marzu tal-2015, sabiex ikun jista' jkun hemm investimenti ġodda sa min-nofs l-2015.  

Din il-proposta hija l-pedament tal-pjan ta' investiment għall-Ewropa u prijorità ewlenija għall-presidenza Latvjana Jānis Reirs, Il-Ministru għall-Finanzi tal-Latvja

"Din il-proposta hija l-pedament tal-pjan ta' investiment għall-Ewropa u prijorità ewlenija għall-presidenza Latvjana", qal Jānis Reirs, Ministru għall-Finanzi tal-Latvja u l-President tal-Kunsill. "Id-data ta' skadenza stabbilita mill-Kunsill Ewropew hija ambizzjuża, iżda ninsabu kunfidenti li nistgħu nilħquha."  

Assistenza makrofinanzjarja lill-Ukraina  

Il-Ministri ddiskutew proposta mill-Kummissjoni biex tingħata assistenza makrofinanzjarja ta' mhux aktar minn €1.8 biljun lill-Ukraina. Il-presidenza kkonkludiet li kellha tittieħed deċiżjoni malajr.  

"L-iżviluppi politiċi jfissru li l-UE trid tkun f'pożizzjoni li tipprovdi assistenza", qal is-Sur Reirs.  

L-assistenza tingħata fil-forma ta' self fuq perjodu medju, li jinħareġ fi tliet pagamenti. Dan għandu jgħin biex jiġu koperti l-ħtiġijiet ta' finanzjament estern pendenti tal-Ukraina fl-2015-16.  

Ħasil tal-flus u finanzjament tat-terroristi  

Il-Kunsill approva ftehim li ntlaħaq mal-Parlament Ewropew  dwar regoli ġodda biex jiġi evitat il-ħasil tal-flus  u l-finanzjament tat-terroristi.  

Il-presidenza laħqet qbil mal-Parlament f'Diċembru 2014. L-approvazzjoni ta' dan l-eżitu twitti t-triq għall-adozzjoni tal-pakkett fit-tieni qari.  

Wara l-attakki terroristiċi reċenti f'Pariġi, il-Kunsill u l-Kummissjoni qablu dwar dikjarazzjoni li tenfasizza l-ħtieġa li jittieħdu azzjonijiet deċiżivi kontra l-finanzjament tat-terroristi.  

Biex titjieb l-effiċjenza tar-regoli l-ġodda, id-dikjarazzjoni tappella għal aktar sforzi biex: 

•  titħaffef l-implimentazzjoni nazzjonali ta' dawn ir-regoli;
•  tissaħħaħ il-kooperazzjoni fir-rigward tal-finanzjament tat-terroristi bejn l-unitajiet tal-intelligence finanzjarja tal-istati membri;
•  jiġu indirizzati r-riskji tal-finanzjament tat-terroristi permezz tal-valutazzjoni tar-riskju sovranazzjonali tal-UE.  

Nindirizzaw l-evitar tat-taxxa korporattiva  

Il-Kunsill emenda d-direttiva dwar il-kumpaniji prinċipali u dawk sussidjarji, billi żied  klawżola kontra l-abbuż għall-prevenzjoni tal-evitar tat-taxxa u l-ippjanar aggressiv tat-taxxa minn gruppi korporattivi.  

L-għan huwa li jitwaqqaf l-użu ħażin tad-direttiva, u biex tinkiseb konsistenza akbar fl-applikazzjoni tagħha fl-istati membri differenti. Il-klawżola kontra l-abbuż ser tipprevjeni lill-istati membri milli jagħtu l-benefiċċji tad-direttiva lil arranġamenti li mhumiex "ġenwini", jiġifieri li jkunu ġew stabbiliti biex jieħdu vantaġġ mit-taxxa mingħajr ma jirriflettu r-realtà ekonomika.  

"Din hija t-tieni bidla importanti li għamilna lid-direttiva dwar il-kumpaniji prinċipali u dawk sussidjarji", qal Mr Reirs. "Il-ġlieda kontra l-evitar tat-taxxa minn multinazzjonali hija prijorità għolja kemm għall-UE kif ukoll fil-livell internazzjonali".

• Eżitu tal-laqgħa tal-Kunsill