Kunsill Affarijiet Ekonomiċi u Finanzjarji, 09/12/2014, 9 ta' Diċembru 2014

Il-pjan ta' investiment għall-UE jirċievi l-appoġġ tal-Kunsill

Meta ltaqħu fid-9 ta' Diċembru fi Brussell, il-ministri tal-UE għall-finanzi esprimew appoġġ ġenerali għall-pjan ta' investiment ta' €315-il biljun imħabbar reċentement mill-Kummissjoni. Huma approvaw ukoll żewġ miżuri għall-ġlieda kontra l-evażjoni tat-taxxa u l-evitar tat-taxxa u qablu dwar il-metodu għall-kalkolu tal-kontribuzzjonijiet għall-fond uniku ta' riżoluzzjoni.

Pjan ta' Investiment għall-Ewropa

Il-Kunsill sema' preżentazzjoni mill-Kummissjoni u mill-Bank Ewropew tal-Investiment (BEI) dwar il-ħidma ta' task force, stabbilita fil-ħarifa biex tidentifika proġetti ta' investiment possibbli.

Il-pjan ta' investiment ta' €315-il biljun tal-Kummissjoni, li ġie żvelat f'Novembru, ser jinvolvi l-istabbiliment ta' fond Ewropew ġdid għal investiment strateġiku fi ħdan il-grupp tal-BEI fir-rebbiegħa tal-2015. Il-fond ser ikun mibni fuq garanzija ta' €16-il biljun mill-baġit tal-UE u €5 biljuni mill-BEI.

Il-fond għandu l-għan li jipprovdi kapaċità għall-indirizzar ta' riskji li tippermetti investimenti u tappoġġa finanzjament ta' riskju għall-SMEs.

Wara skambju ta' fehmiet inizjali l-ministri għall-finanzi esprimew appoġġ ġenerali għall-pjan ta' investiment. Il-Kunsill jistenna b'interess proposta leġislattiva għat-twettiq ta' dan il-pjan.

Il-Kunsill Ewropew, imlaqqa' fit-18 u d-19 ta' Diċembru, ser jintalab japprovah.

Il-passi li jmiss

Il-Presidenza Taljana tal-Kunsill ser tibgħat lill-president tal-Kunsill Ewropew sommarju ta' din id-diskussjoni.

Il-Kummissjoni mistennija tippreżenta proposta leġislattiva f'Jannar 2015. L-għan hu li tiġi adottata f'Ġunju 2015.

Prevenzjoni tal-evażjoni tat-taxxa u l-evitar tat-taxxa

Il-Kunsill laħaq qbil politiku dwar l-inklużjoni ta' klawżola kontra l-abbuż fid-direttiva tal-UE dwar il-kumpanniji prinċipali u s-sussidjarji tagħhom. Dan ser jeħtieġ lill-istati membri tal-UE li jibqgħu lura milli jagħtu l-benefiċċji tad-direttiva lil arranġamenti korporattivi li jiġu stabbiliti biex jinkiseb vantaġġ fiskali u li ma jirriflettux ir-realta ekonomika. Id-direttiva emendatorja ser tiġi adottata fil-laqgħa li jmiss tal-Kunsill mingħajr aktar diskussjoni.

L-istati membri ser ikollhom sal-31 ta' Diċembru 2015 biex jittrasponu din l-emenda fil-liġi nazzjonali.  

Il-Kunsill adotta wkoll direttiva li testendi l-iskambjar awtomatiku obbligatorju ta' informazzjoni bejn l-awtoritajiet nazzjonali tat-taxxa sabiex tiġi impedita l-evażjoni tat-taxxa minn faddala privati.

Id-direttiva għandha l-għan li tirrimedja sitwazzjonijiet fejn kontribwent jipprova jaħbi kapital jew assi barra 'l pajjiż biex jevita li jħallas it-taxxa dovuta fuqhom. Hija timplimenta standard globali żviluppat mill-OECD u approvat mill-G20.

L-istati membri ser jibdew jiskambjaw informazzjoni awtomatikament skont id-direttiva riveduta mill-aħħar ta' Settembru 2017. 

Unjoni bankarja: fond uniku ta' riżoluzzjoni

Il-Kunsill laħaq qbil politiku dwar abbozz ta' regolament għall-kalkolu tal-kontribuzzjonijiet li għandhom jitħallsu mill-banek lill-fond uniku ta' riżoluzzjoni tal-UE. Il-fond qed jiġi stabbilit taħt il-mekkaniżmu uniku ta' riżoluzzjoni, li kien inħoloq biex tiġi żgurata r-riżoluzzjoni ordnata ta' banek li jkunu qed ifallu. 

Il-kontribuzzjonijiet mill-banek ser ikunu annwali u jiġu kkalkulati abbażi tal-obbligazzjonijiet tal-banek, bl-esklużjoni ta' fondi proprji u depożiti koperti, u jkun aġġustat skont ir-riskju. 

Punti prinċipali oħra fuq l-aġenda 

Taxxa fuq it-transazzjonijiet finanzjarji (TTF)

Il-Kunsill iddiskuta s-sitwazzjoni attwali ta' proposta għall-introduzzjoni ta' taxxa fuq it-transazzjonijiet finanzjarji (TTF) fi 11-il stat membru permezz tal-proċedura ta' 'kooperazzjoni msaħħa'. Il-presidenza tat rapport dwar il-progress li sar matul il-mandat tagħha, filwaqt li ppreżentat il-fehmiet tagħha dwar il-possibbiltà li d-dossier ikompli jiġi indirizzat mill-presidenza li jmiss.  

Governanza ekonomika 

Il-Kunsill nieda proċess annwali tiegħu għall-koordinazzjoni ta' politiki. Il-Kummissjoni ppreżentat l-istħarriġ annwali dwar it-tkabbir għall-2015, li jipproponi azzjonijiet prijoritarji li għandhom jittieħdu mill-istati membri biex jiżguraw li jkollhom stabbiliti politiki effettivi li jistgħu jwasslu għal tkabbir ekonomiku sostenibbli.   

Hija ppreżentat ukoll ir-rapport dwar il-mekkaniżmu ta' twissija, li jindika li s-sitwazzjoni makroekonomika teħtieġ aktar analiżi ('analiżi fil-fond') f'16-il stat membru: il-Belġju, il-Bulgarija, il-Finlandja, Franza, il-Ġermanja, l-Irlanda, l-Italja, il-Kroazja, il-Pajjiżi l-Baxxi, il-Portugall, ir-Renju Unit, ir-Rumanija, is-Slovenja, Spanja, l-Isvizzera, u l-Ungerija.  

Il-Kunsill iddiskuta wkoll rieżami tar-riformi li sar fl-2011 u l-2013 għall-qafas tal-governanza ekonomika tal-UE, inkluż il-Patt ta' Stabbiltà u Tkabbir.