Kunsill Affarijiet Ekonomiċi u Finanzjarji, 15/01/2016, 15 ta' Jannar 2016

Riżultati ewlenin

Prospetti ta’ tkabbir u żbilanċi makroekonomiċi

Il-Kunsill iddiskuta l-prospetti ta' tkabbir u l-iżbilanċi makroekonomiċi taħt is-"Semestru Ewropew", il-proċess annwali ta' koordinazzjoni tal-politika tal-UE.

Huwa adotta konklużjonijiet, u approva abbozz ta’ rakkomandazzjoni dwar il-politiki ekonomiċi taż-żona tal-euro.

Il-prijoritajiet ta' politika għall-2016 huma l-investiment, ir-riformi strutturali u l-politiki fiskali responsabbli. Rigward l-iżbilanċi makroekonomiċi, il-Kummissjoni hija mistennija li fi Frar tippubblika rieżamijiet fil-fond tas-sitwazzjoni fi 18-il stat membru.

Il-Kunsill qabel b’mod ġenerali mal-analiżi u l-prijoritajiet stabbiliti mill-Kummissjoni fl-istħarriġ annwali tagħha dwar it-tkabbir. "Barra minn hekk għandna l-ħsieb li nsaħħu u nissimplifikaw is-Semestru Ewropew, kif propost mill-Kummissjoni, sabiex nistimolaw l-implimentazzjoni tar-rakkomandazzjonijiet speċifiċi għall-pajjiżi”, qal Jeroen Dijsselbloem, il-ministru għall-finanzi tan-Netherlands u president tal-Kunsill.

L-abbozz ta’ rakkomandazzjoni għaż-żona tal-euro ser jiġi riferut lill-Kunsill Ewropew fi Frar, bil-ħsieb li jiġi adottat f’Marzu. Is-Semestru Ewropew 2016 ser jikkonkludi b’rakkomandazzjonijiet speċifiċi għall-pajjiżi f’Lulju.

• Semestru Ewropew (informazzjoni ġenerali)

Irridu noħolqu l-aħjar kondizzjonijiet għal tkabbir ekonomiku u prosperità dejjiema fl-UE, u biex iż-żona tal-euro tkun tiflaħ għall-iskossi , qal Jeroen Dijsselbloem, il-ministru għall-finanzi tan-Netherlands u president tal-Kunsill. 

Programm tal-presidenza

Il-Kunsill iddiskuta l-programm ta’ ħidma tal-Presidenza Netherlandiża.

Il-prijoritajiet tal-presidenza jinkludu:

• it-tisħiħ tal-unjoni bankarja tal-UE;
• l-iżvilupp ta’ unjoni tas-swieq kapitali tal-UE;
• it-tisħiħ u s-simplifikazzjoni tal-proċess ta' koordinazzjoni tal-politika tas-Semestru Ewropew;
• il-promozzjoni ta' azzjoni kontra l-evażjoni tat-taxxa u l-evitar tat-taxxa.

Fost objettivi oħra li għandhom jiġu segwiti, il-Kunsill ser ikompli jaħdem biex tissaħħaħ aktar l-unjoni ekonomika u monetarja tal-UE.