Kunsill Affarijiet Ekonomiċi u Finanzjarji, 12/02/2016, 12 ta' Frar 2016

Riżultati ewlenin

Finanzjament tat-terroriżmu

Il-Kunsill stabbilixxa l-prijoritajiet tiegħu hekk kif qed jissaħħu l-isforzi għall-prevenzjoni tal-finanzjament tat-terroriżmu.

Dan wara l-pubblikazzjoni mill-Kummissjoni ta’ pjan ta’ azzjoni biex jingħelbu l-isfidi attwali, u b'reazzjoni għall-attakki terroristiċi reċenti. Il-pjan huwa msejjes fuq ir-regoli u l-prattiki eżistenti tal-UE u jadattahom għat-theddidiet ġodda f’konformità mal-istandards internazzjonali.

"Intrabatna li nipproċedu malajr bl-implimentazzjoni ta’ għadd ta’ miżuri li jinsabu fil-pjan ta’ azzjoni”, qal Jeroen Dijsselbloem, il-ministru għall-finanzi tan-Netherlands u l-president tal-Kunsill. "Qbilna dwar xi miżuri li jmorru lil hinn mill-pjan ta’ azzjoni, bħall-implimentazzjoni mħaffa tad-direttiva dwar il-ħasil tal-flus u t-titjib ulterjuri fil-kooperazzjoni bejn l-awtoritajiet nazzjonali responsabbli għat-trażżin tal-finanzjament tat-terroriżmu." 

Fil-konklużjonijiet tiegħu, il-Kunsill jispeċifika fid-dettall għadd ta’ inizjattivi li għandhom jittieħdu u jiffissa l-iskadenzi għall-azzjoni. L-inizjattivi jinkludu:

• il-qasam tal-muniti virtwali;
• it-tisħiħ tal-aċċess għall-informazzjoni minn unitajiet tal-intelligence finanzjarja (FIUs), pereżempju informazzjoni dwar kontijiet bankarji u ta' pagament;
• miżuri xierqa dwar strumenti ta’ pagament imħallsa minn qabel:
• miżuri kontra ċaqliq ta' flus illeċitu.

Qed nittamaw li din l-iskeda ambizzjuża ser tikkonferma li l-UE tinsab fuq quddiem fl-implimentazzjoni tal-konklużjonijiet tas-sena li għaddiet tal-OECD dwar l-erożjoni tal-bażi tat-taxxa u t-trasferiment tal-profitt. Jeroen Dijsselbloem, il-ministru għall-finanzi tan-Netherlands u l-president tal-Kunsill

Evitar tat-taxxa

Il-Kunsill kellu l-ewwel diskussjoni dwar pakkett ta’ proposti bil-għan li jissaħħu r-regoli tal-UE għall-prevenzjoni tal-evitar tat-taxxa korporattiva.

Il-pakkett huwa maħsub bħala reazzjoni koordinata għal prattiki fiskali aggressivi użati minn kumpaniji kbar. Huwa għandu wkoll l-għan li jimplimenta standards approvati mill-OECD.

Il-presidenza ffissat skeda ambizzjuża għall-ħidma fuq il-pakkett. Hija qed tipprevedi qbil politiku qabel Ġunju 2016 dwar:

• proposta biex jissaħħaħ l-iskambju ta’ informazzjoni relatata mat-taxxa dwar l-attivitajiet tal-kumpaniji multinazzjonali;
• regoli proposti biex jindirizzaw uħud mill-prattiki l-aktar prevalenti tal-evitar tat-taxxa.

Il-ħidma ser titmexxa f’fażijiet, bit-tir li jintlaħaq ftehim dwar l-ewwel direttiva f'Marzu u li jsir progress kemm jista' jkun malajr fl-elementi l-oħra.

Kwistjonijiet baġitarji tal-UE

Il-Kunsill stabbilixxa l-prijoritajiet tiegħu għall-baġit tal-UE għall-2017, waqt li appella għal baġit realistiku li joħloq bilanċ ġust bejn il-konsolidament fiskali u l-investimenti li jsaħħu t-tkabbir. Il-ministri talbu wkoll sabiex il-baġit tal-UE għall-2017 jibqa' flessibbli biżżejjed biex ilaħħaq mal-isfidi attwali u dawk futuri possibbli.

Il-Kunsill irrakkomanda lill-Parlament Ewropew biex jagħti kwittanza lill-Kummissjoni għall-implimentazzjoni tal-baġit tal-UE għall-2014. Ġie wkoll aġġornat minn Mario Monti, il-president tal-grupp ta’ livell għoli dwar  ir-riżorsi proprji, dwar il-ħidma tal-grupp. Fit-13 u l-14 ta' Ġunju 2016 għandha ssir konferenza interistituzzjonali fi Brussell bil-parteċipazzjoni tal-parlamenti nazzjonali kollha. L-inkarigu tal-grupp ta' livell għoli hu li jwettaq rieżami ġenerali tas-sistema tar-riżorsi proprji tal-UE sabiex jitjiebu s-sempliċità, it-trasparenza, l-ekwità u r-responsabbiltà demokratika.