Kunsill Affarijiet Ekonomiċi u Finanzjarji, 02/10/2018, 2 ta' Ottubru 2018

Riżultati ewlenin

Il-Kummissjoni ppreżentat il-proposta tagħha biex issaħħaħ ir-rwol tal-Awtorità Bankarja Ewropea (EBA) fis-superviżjoni tal-istituzzjonijiet finanzjarji tal-UE, sabiex tindirizza aħjar it-theddid tal-ħasil tal-flus u tal-finanzjament tat-terroriżmu.

Il-ġlieda kontra l-ħasil tal-flus hija parti integrali mill-isforzi tagħna biex innaqqsu r-riskji fis-settur finanzjarju u biex niksbu lura l-fiduċja fis-sistema finanzjarja tagħna. L-UE wettqet riformi ambizzjużi iżda issa rridu nkunu żguri li dawn jiġu infurzati u sorveljati b'mod effettiv fl-UE kollha. Hartwig Löger, ministru għall-finanzi tal-Awstrija li bħalissa għandha l-presidenza tal-Kunsill

Il-ministri enfasizzaw l-importanza tal-implimentazzjoni xierqa tar-regoli tal-UE fir-rigward tal-ħasil tal-flus, u t-tisħiħ tal-kooperazzjoni bejn is-superviżuri fil-qasam tal-ġlieda kontra l-ħasil tal-flus u s-superviżuri prudenzjali sabiex jinħoloq qafas ta' monitoraġġ effiċjenti.

Il-Kunsill adotta wkoll regolament li jsaħħaħ il-kontrolli fuq il-flus kontanti li jidħlu jew joħorġu mill-Unjoni, biex b'hekk il-leġislazzjoni tal-UE saret konformi mal-ogħla standards internazzjonali dwar il-ġlieda kontra l-ħasil tal-flus u l-finanzjament tat-terroriżmu.

• Il-ġlieda kontra l-ħasil tal-flus u l-finanzjament tat-terroriżmu (informazzjoni ġenerali)

Tassazzjoni indiretta

Il-Kunsill laħaq qbil politiku dwar tliet proposti relatati mal-VAT:

• ir-regolament dwar "pubblikazzjonijiet elettroniċi": bis-saħħa tiegħu l-istati membri ser ikunu jistgħu japplikaw rati mhux standard ta' VAT għal pubblikazzjonijiet elettroniċi u potenzjalment jallinjaw ir-regoli tal-VAT bejn il-forom fiżiċi u elettroniċi għall-pubblikazzjonijiet. Dan il-fajl huwa parti mill-isforzi aktar ġenerali tal-UE biex timmodernizza t-taxxa fuq il-valur miżjud għall-ekonomija diġitali fil-kuntest tal-istrateġija tal-UE għal suq uniku diġitali.

• Pubblikazzjonijiet elettroniċi: Il-Kunsill jaqbel li jippermetti rati ta' VAT imnaqqsa (stqarrija għall-istampa, 02/10/2018)

• il-"mekkaniżmu tar-reverse charge ġeneralizzat": bis-saħħa tiegħu l-istati membri l-aktar milquta mill-frodi tal-VAT ser ikunu jistgħu japplikaw temporanjament inverżjoni ġeneralizzata tar-responsabbiltà tal-VAT, biex b'hekk jipprovdi soluzzjoni għall-istati membri li jiffaċċjaw frodi karusell. L-istati membri ser ikunu jistgħu jużaw il-mekkaniżmu tar-reverse charge ġeneralizzat biss għall-provvista domestika ta' oġġetti u servizzi li jeċċedu limitu ta' €17 500 kull transazzjoni, u sat-30 ta' Ġunju 2022 biss, u taħt kondizzjonijiet tekniċi stretti ħafna.

• Frodi tal-VAT: il-Kunsill jaqbel li jippermetti inverżjoni ġeneralizzata u temporanja tar-responsabbiltà (stqarrija għall-istampa, 02/10/2018)

• is-soluzzjonijiet ta' malajr fir-rigward tal-VAT, bil-għan li jintroduċu aġġustamenti għar-regoli tal-UE dwar il-VAT sabiex tinstab soluzzjoni għal kwistjonijiet speċifiċi (stokk f'kunsinna kuntrattat, numru ta' identifikazzjoni tal-VAT, tranżazzjonijiet f'katina, prova ta' provvista fi ħdan l-UE) sakemm tiġi introdotta sistema ġdida ta' VAT.

• VAT: il-Kunsill jaqbel dwar soluzzjonijiet fuq perjodu qasir, sakemm issir reviżjoni ġenerali (stqarrija għall-istampa, 20/10/2018)

Il-Kunsill adotta wkoll miżuri biex tissaħħaħ il-kooperazzjoni amministrattiva sabiex il-forom l-aktar mifruxa ta' frodi transfruntiera jiġu indirizzati b'mod aktar effettiv.

• Kontrolli fuq il-flus kontanti deħlin fl-UE u ħerġin minnha: il-Kunsill jadotta regolament (stqarrija għall-istampa, 02/10/2018)

Barra minn hekk, il-ministri ffinalizzaw it-tħejjijiet qabel il-laqgħat internazzjonali (laqgħa finanzjarja tal-G20 tal-11 u t-12 ta' Ottubru u l-laqgħat annwali tal-FMI mit-12 sal-14 ta' Ottubru f'Bali). Iddiskutew ukoll il-proċess ta' monitoraġġ tal-politika tas-"Semestru Ewropew" fid-dawl tat-tagħlimiet miksuba mill-eżerċizzju tal-2018.

• Is-Semestru Ewropew fl-2018 (informazzjoni ġenerali)
• Laqgħat tal-G20