Kunsill Affarijiet Ekonomiċi u Finanzjarji, 17/05/2019, 17 ta' Mejju 2019

Riżultati ewlenin

Tassazzjoni diġitali fil-kuntest internazzjonali

Il-Ministri ddiskutew riformi fiskali internazzjonali attwali, bil-ħsieb li jħejju d-dibattiti li ġejjin tal-OECD u tal-G20.

Il-presidenza ser tikkontribwixxi l-fehmiet espressi mill-ministri fit-tħejjijiet tal-laqgħat tal-ministri tal-finanzi tal-G20 ta' Ġunju f'Fukuoka fejn l-OECD hija mistennija tirrapporta l-progress fir-riforma tat-tassazzjoni korporattiva internazzjonali. Il-President tal-ECOFIN biħsiebu jippreżenta r-riżultat tad-diskussjonijiet tal-ECOFIN fil-laqgħa tal-G20.

Il-Ministri vvalutaw possibilitajiet biex iħejju negozjati fl-OECD dwar id-dibattitu internazzjonali li għaddej dwar soluzzjonijiet komprensivi fit-tul li jindirizzaw kemm l-isfidi tat-tassazzjoni fl-ekonomija diġitalizzata kif ukoll kwistjonijiet usa' relatati mal-allokazzjoni tad-drittijiet tat-tassazzjoni u l-kompetizzjoni fiskali.

• Tassazzjoni diġitali (informazzjoni ġenerali)

Dazju tas-sisa

Il-Kunsill iddiskuta miżuri li jtejbu l-ambjent tan-negozju għal prodotti soġġetti għad-dazju tas-sisa, b'mod partikolari l-alkoħol u x-xorb alkoħoliku, billi tiġi żgurata kompetizzjoni ġusta u jitnaqqas il-piż amministrattiv għall-kumpaniji.

Il-Kunsill qabel dwar il-proposti li ġejjin:

• id-direttiva dwar l-istrutturi tad-dazji tas-sisa fuq l-alkoħol u x-xorb alkoħoliku.
• id-direttiva dwar arranġamenti ġenerali għad-dazju tas-sisa
• ir-regolament dwar kooperazzjoni amministrattiva dwar il-kontenut ta' reġistri elettroniċi

Minkejja l-progress sinifikanti miksub fin-negozjati, il-ministri ma laħqux ftehim finali dwar il-pakkett ta' miżuri. Il-Kunsill ser ikompli jaħdem fuq livell tekniku bil-ħsieb li jilħaq kompromess aċċettabbli għall-istati membri kollha malajr kemm jista' jkun.

Id-dazji tas-sisa huma taxxi indiretti fuq il-bejgħ jew l-użu ta' prodotti speċifiċi, bħall-alkoħol, it-tabakk u l-enerġija. Id-dħul minn dawn it-taxxi jmur kollu għall-pajjiż fejn jitħallsu. Sa mill-1992, il-pajjiżi tal-UE kellhom fis-seħħ regoli komuni biex jiġi żgurat li d-dazji tas-sisa jiġu applikati bl-istess mod u għall-istess prodotti kullimkien fl-UE.

Semestru Ewropew fl-2019

Fil-qafas tal-eżerċizzju tas-semestru Ewropew għall-2019, il-Kunsill adotta konklużjonijiet dwar l-eżitu tal-analiżijiet fil-fond u l-implimentazzjoni tar-rakkomandazzjonijiet speċifiċi għall-pajjiżi 2018.

• Konklużjonijiet tal-Kunsill dwar analiżijiet fil-fond u implimentazzjoni tar-rakkomandazzjonijiet speċifiċi għall-pajjiżi 2018
• Il-paġna web tal-Kummissjoni dwar ir-rapporti tal-pajjiżi għas-semestru Ewropew tal-2019

Lista tal-UE ta' ġurisdizzjonijiet li ma jikkooperawx

Mingħajr diskussjoni, il-Kunsill iddeċieda li jneħħi lilAruba, Barbados u l-Bermuda mil-lista tal-UE ta' ġurisdizzjonijiet tat-taxxa li ma jikkooperawx.

• Tassazzjoni: Aruba, Barbados u l-Bermuda mneħħija mil-lista tal-UE ta' ġurisdizzjonijiet li ma jikkooperawx, stqarrija għall-istampa tas-17 ta' Mejju 2019
• Il-paġna web tal-Kunsill dwar il-lista tal-UE ta' ġurisdizzjonijiet li ma jikkooperawx