Kunsill Ambjent, 06/03/2015, 6 ta' Marzu 2015

Riżultati ewlenin

Tibdil fil-klima

Il-Kunsill iddiskuta t-tħejjijiet għall-konferenza tan-NU dwar it-tibdil fil-klima li ser issir f’Pariġi f’Diċembru. L-għan tal-konferenza hu li jiġi adottat ftehim globali ambizzjuż u legalment vinkolanti li għandu jiġi implimentat mill-2020.

Bħala parti minn dawn it-tħejjijiet, il-Kunsill adotta l-Kontribut Maħsub Determinat fil-Livell Nazzjonali (INDC) tal-UE u l-istati membri tagħha.

Il-kontribut jikkonferma li l-UE u l-istati membri tagħha huma impenjati għal mira vinkolanti ta' tnaqqis domestiku ta' mill-inqas 40% f'emissjonijiet ta' gassijiet b'effett ta' serra sal-2030 meta mqabbla mal-1990, li għandha tintlaħaq b'mod konġunt, kif imniżżel fil-konklużjonijiet tal-Kunsill Ewropew ta' Ottubru 2014.

Il-kontribut intbagħat illum lis-Segretarjat tal-UNFCCC biex jiġi ppubblikat fuq is-sit elettroniku tagħha.

Il-ministru Latvjan għall-Protezzjoni Ambjentali, Kaspars Gerhards, enfasizza li “din is-sena ser tkun meħtieġa diplomazija ffokata u komprensiva dwar il-klima sabiex nibnu l-alleanzi meħtieġa għal ftehim ambizzjuż f’Pariġi.” 

Unjoni tal-enerġija

Il-Kunsill indirizza kwistjonijiet dwar it-tibdil fil-klima fir-rigward tal-Unjoni tal-Enerġija, b’enfasi fuq id-dekarbonizzazzjoni tal-ekonomija. 

Hemm sinerġiji bejn l-effiċjenza fl-użu tar-riżorsi u d-diġitalizzazzjoni li jeħtieġ li jiġu esplorati u dan qed iseħħ f’mument partikolarment opportun biex ikun jista' jsir kontribut għall-istrateġija li jmiss tas-suq uniku diġitali tal-UE.” Kaspars Gerhards, ministru Latvjan għall-Protezzjoni Ambjentali 

Stħarriġ annwali dwar it-tkabbir

Il-ministri ddiskutew ukoll aspetti relatati mal-ambjent fl-Istħarriġ Annwali dwar it-Tkabbir bil-ħsieb tar-reviżjoni ta’ nofs it-term tal-istrateġija Ewropea 2020.

Il-ministri ffokaw fuq kif l-istrateġija tista’ tikkontribwixxi bl-aħjar mod għal bidla lejn ekonomija ċirkolari, effiċjenti fl-użu tar-riżorsi u b'livell baxx ta’ emissjonijiet ta' karbonju.

Aġenda dwar l-iżvilupp wara l-2015

Il-Kunsill evalwa l-aħħar żviluppi fin-negozjati dwar l-aġenda għall-iżvilupp wara l-2015, li għandha tiġi adottata fl-Assemblea Ġenerali tan-NU f’Settembru 2015.

Waqt l-ikla ta’ nofsinhar il-ministri kellhom skambju ta’ fehmiet mal-Aġenzija Ewropea għall-Ambjent dwar ir-riżultati tar-rapport reċenti tagħha "L-ambjent Ewropew - sitwazzjoni attwali u prospetti fl-2015".

Barra minn hekk, il-Kunsill adotta mingħajr dibattitu deċiżjoni dwar l-adeżjoni tal-Unjoni Ewropea għall-Konvenzjoni dwar il-Kummerċ Internazzjonali fl-Ispeċijiet ta' Fawna u Flora Selvaġġi fil-Periklu (CITES). 

• Eżitu tal-laqgħa tal-Kunsill