Kunsill Ambjent, 17/12/2014, 17 ta' Diċembru 2014

Il-Kunsill jilħaq qbil politiku dwar l-emissjonijiet ta' CO2 mill-bastimenti

Imlaqqgħin fi Brussell fis-17 ta' Diċembru 2014, il-ministri tal-UE għall-ambjent laħqu qbil politiku dwar regoli ġodda għall-UE kollha għall-monitoraġġ, ir-rappurtar u l-verifika tal-emissjonijiet ta' CO2 mill-bastimenti.

It-trasport marittimu internazzjonali huwa attwalment l-uniku mezz ta' trasport mhux inkluż fl-impenn tal-UE għat-tnaqqis tal-emissjonijiet ta' gass b'effett ta' serra. Il-monitoraġġ tal-emissjonijiet ta' CO2 mill-bastimenti huwa l-ewwel pass f'approċċ fi stadji għat-tnaqqis tal-emissjonijiet ta' gass b'effett ta' serra f'dan is-settur ukoll. 

Ser tiġi adottata pożizzjoni komuni formali fi stadju aktar tard, wara li l-ġuristi-lingwisti jkunu ċċekkjaw it-test.

• Tnaqqis tal-emissjonijiet mis-settur tat-trasport marittimu

Basktijiet tal-plastik

Il-Kunsill laħaq qbil politiku dwar abbozz ta' direttiva għat-tnaqqis tal-użu ta' basktijiet tal-plastik ħfief. Ir-regoli l-ġodda għandhom l-għan li jillimitaw l-impatti ambjentali negattivi tal-iskart tal-basktijiet tal-plastik.

Skont il-liġi l-ġdid tal-UE l-gvernijiet ser ikollhom jagħżlu jekk idaħħlux imposta fuq basktijiet tal-plastik li jintużaw darba biss sal-aħħar tal-2018 jew jeħdux miżuri biex inaqqsu l-użu tagħhom.

Ser tiġi adottata pożizzjoni komuni formali fi stadju aktar tard, wara li l-ġuristi-lingwisti jkunu ċċekkjaw it-test.

Punti ewlenin oħrajn fuq l-aġenda

Il-Kunsill laħaq approċċ ġenerali dwar abbozz ta' direttiva għal-limitazzjoni tal-emissjonijiet ta' ċerti sustanzi li jniġġsu l-arja minn impjanti medji tal-kombustjoni.  Il-ministri wkoll:

• iddiskutew il-programm ta' ħidma tal-2015 tal-Kummissjoni, b'mod partikolari l-pakkett dwar l-ekonomija ċirkolari u l-pakkett dwar l-arja nadifa
• ikkonfermaw qbil politiku dwar il-pakkett ta' ratifika tal-emenda ta' Doha, bil-ħsieb li jippermetti r-ratifika u l-implimentazzjoni teknika tiegħu
• iddiskutew is-sitwazzjoni attwali dwar abbozz ta' deċiżjoni għall-istabbiliment ta' riżerva ta' stabbiltà tas-suq għall-iskema tal-UE għall-iskambju ta' kwoti tal-emissjonijiet (EU ETS)