Kunsill Ambjent, 15/06/2015, 15 ta' Ġunju 2015

Riżultati ewlenin

Emissjonijiet nazzjonali ta’ sustanzi li jniġġsu

Il-Kunsill kellu dibattitu ta' orjentazzjoni fil-Kunsill dwar il-proposta għal direttiva rigward it-tnaqqis tal-emissjonijiet nazzjonali ta' ċerti sustanzi li jniġġsu fl-arja (id-Direttiva NEC). L-għan tagħha huwa li jinkiseb titjib sinifikanti fil-kwalità tal-arja fl-UE.

• Proposta għal direttiva dwar it-tnaqqis tal-emissjonijiet nazzjonali ta’ ċerti sustanzi li jniġġsu fl-arja

Id-Direttiva hija parti minn “Programm għal Arja Nadifa għall-Ewropa”. Huwa jfittex li jindirizza diversi riskji għas-saħħa u effetti ambjentali kkawżati mit-tniġġis tal-arja, u ser jiżgura li l-liġi tal-UE tkun għal kollox konformi mal-impenji internazzjonali ġodda sal-2020.

Il-Ministri kellhom l-opportunità li jesprimu l-fehmiet tagħhom dwar kwistjonijiet pendenti u biex jiddiskutu kif ser isir progress biex tintlaħaq pożizzjoni komuni.

Il-ministru Latvjan għall-Protezzjoni Ambjentali, Kaspars Gerhards qal, "It-titjib tal-kwalità tal-arja huwa essenzjali għal raġunijiet kemm ta' saħħa kif ukoll ekonomiċi. Biex jinstab kompromess fost l-istati membri, għandna bżonn miri realistiċi u l-flessibbiltà għal żviluppi futuri mhux previsti sabiex innaqqsu l-imwiet prematuri minħabba t-tniġġis tal-arja.”

It-titjib tal-kwalità tal-arja huwa essenzjali kemm għal raġunijiet ta' saħħa kif ukoll ekonomiċi. Biex jinstab kompromess fost l-istati membri, għandna bżonn miri realistiċi u l-flessibbiltà għal żviluppi futuri mhux previsti sabiex innaqqsu l-imwiet prematuri minħabba t-tniġġis tal-arja.” Kaspars Gerhards, Ministru Latvjan għall-Protezzjoni Ambjentali

Konferenza ta' Pariġi dwar it-tibdil fil-klima

Il-Kunsill ħa kont tal-progress fin-negozjati internazzjonali dwar il-klima bħala parti mit-tħejjijiet għall-Konvenzjoni tan-NU dwar it-tibdil fil-klima f'Pariġi f’Diċembru 2015 (COP 21). Il-Ministri vvalutaw il-progress li sar fl-aħħar żewġ sessjonijiet ta’ negozjati, f'Ġinevra (8-13 ta’ Frar 2015) u f'Bonn (1-11 ta’ Ġunju 2015).

Il-Ministri esprimew tħassib dwar il-pass kajman tan-negozjati u nnutaw li bħalissa fadal biss għaxart ijiem ta’ negozjar sal-COP21. Filwaqt li jfakkru l-importanza ta’ Kontribuzzjonijiet Maħsuba Determinati fil-Livell Nazzjonali (INDC), il-ministri laqgħu l-Partijiet li diġà kkomunikaw l-INDC tagħhom u ħeġġew lill-oħrajn biex isegwu u jikkomunikaw l-INDC tagħhom ferm qabel il-Konferenza ta’ Pariġi.

Filwaqt li jagħrfu l-importanza ta’ ambizzjoni u d-durabilità ta’ impenji, il-Kunsill jistenna li l-Konferenza tadotta ftehim legalment vinkolanti applikabbli għall-Partijiet kollha u kompatibbli mal-objettiv ta’ taħt it-2˚C u d-deċiżjonijiet relatati mal-COP.

Id-dibattitu tal-Kunsill ser jikkontribwixxi għall-iżvilupp tal-pożizzjoni tal-UE qabel il-Konferenza dwar it-Tibdil fil-Klima f’Pariġi. Huwa mistenni li l-konklużjonijiet tal-Kunsill dwar in-negozjati internazzjonali dwar it-tibdil fil-klima għandhom jiġu adottati fit-18 ta’ Settembru 2015.

Il-Ministru Kaspars Gerhards irrikonoxxa li, “l-Unjoni Ewropea hija kommessa li tilħaq ftehim ambizzjuż f’Pariġi, iżda ma tistax tirnexxi waħedha.” Huwa appella lill-partijiet kollha biex jinvolvu ruħhom bis-sħiħ fin-negozjati u jesploraw il-possibbiltajiet kollha għal konverġenzi.

• Ftehimiet internazzjonali dwar azzjoni klimatika (informazzjoni ġenerali)
• Eżitu tal-laqgħa tal-Kunsill