Kunsill Ambjent, 28/10/2014, 28 ta' Ottubru 2014

Il-Kunsill jappella għal strateġija Ewropa 2020 aktar 'ekoloġika'

Fil-laqgħa tagħhom fil-Lussemburgu tat-28 ta' Ottubru, il-ministri għall-ambjent adottaw konklużjonijiet dwar l-'ekoloġizzazzjoni' tas-Semestru Ewropew u l-istrateġija Ewropa 2020.

Il-konklużjonijiet jirrikonoxxu li ekonomija aktar ekoloġika tikkontribwixxi għal prosperità fit-tul, u jenfasizzaw il-bżonn ta' transizzjoni lejn ekonomija ċirkolari effiċjenti fl-użu tar-riżorsi. B'mod partikolari, huma jenfasizzaw il-bżonn ta':

• integrazzjoni aħjar tal-effiċjenza fl-użu tar-riżorsi fl-istrateġija Ewropa 2020, permezz tal-introduzzjoni ta' mira aspirattiva li ma tkunx vinkolanti
• kunsiderazzjoni tal-prinċipji tal-ekonomija ċirkolari u l-potenzjal għal impjieg ekoloġiku fis-Semestru Ewropew
• twettiq ta' rappurtar aktar strutturat u regolari dwar il-ħiliet ekoloġiċi, l-impjiegi u t-tkabbir bħala parti mir-rapport konġunt dwar l-impjiegi anness għall-istħarriġ annwali dwar it-tkabbir
• aktar żvilupp tad-definizzjoni ta' impjiegi ekoloġiċi, biex jiġi evitat li tiġi limitata għall-impjiegi fis-'setturi ekoloġiċi'
• titjib tal-metodoloġija tal-kejl biex jitqies aħjar il-progress lejn l-effiċjenza fl-użu tar-riżorsi fil-livell nazzjonali
• żvilupp ta' sistema għall-analiżi tas-servizzi tar-riżorsi naturali, il-bijodiversità u l-ekosistema li jipprovdu (il-capita naturali tal-UE)
• provvediment ta' rwol imsaħħaħ tal-ministri tal-ambjent fis-Semestru Ewropew

Dawn il-konklużjonijiet huma parti mir-reviżjoni ta' nofs it-term tal-istrateġija 2020. Flimkien mad-dibattiti f'konfigurazzjonijiet oħrajn tal-Kunsill, dawn ser ikunu l-bażi għal rapport ta' sintesi li għandu jiġi approvat mill-Kunsill Ewropew f'Diċembru.

Suġġetti oħrajn fuq l-aġenda

Il-Kunsill kellu wkoll dibattitu dwar direttiva proposta dwar il-ġestjoni tal-iskart. Huwa kkonċentra fuq il-livell ta' ambizzjoni tal-proposta, il-bżonn ta' aktar ħidma fuq xi wħud mill-miżuri inklużi u l-kunsiderazzjoni tal-prevenzjoni tal-iskart u l-kwistjonijiet tal-użu mill-ġdid.

Il-ministri ddiskutew kif għandu jsir progress fil-qafas ta' politika għall-Klima u l-Enerġija għall-2030 maqbul minn Kunsill Ewropew il-ġimgħa li għaddiet. Huma adottaw ukoll konklużjonijiet li jiddefinixxu l-pożizzjoni tal-UE għall-konferenza ta' Lima, li ser tiġbor flimkien il-partijiet fil-Konvenzjoni Qafas tan-NU dwar it-Tibdil fil-Klima.