"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Vidjokonferenza informali tal-ministri għall-ambjent, 18 ta' Marzu 2021
Riżultati ewlenin
Strateġija tal-UE dwar l-adattament għat-tibdil fil-klima
Il-ministri bdew id-diskussjonijiet tagħhom bi skambju ta' fehmiet rigward l-istrateġija tal-UE dwar l-adattament għat-tibdil fil-klima. L-istrateġija tiddeskrivi viżjoni fit-tul għall-UE biex issir soċjetà reżiljenti għall-klima li hija kompletament adattata għall-impatti inevitabbli tat-tibdil fil-klima sal-2050. Il-gwida pprovduta mill-ministri ser isservi bħala kontribut għall-abbozz ta' konklużjonijiet tal-Kunsill.
Il-presidenza informat lill-ministri dwar is-sitwazzjoni attwali tan-negozjati tat-trilogu bejn il-Parlament Ewropew u l-Kunsill dwar il-proposta għal Liġi Ewropea dwar il-Klima.
L-għan tal-liġi Ewropea dwar il-klima huwa li tistabbilixxi fil-leġiżlazzjoni l-objettiv ta' UE newtrali għall-klima sal-2050. Fis-17 ta' Diċembru, il-ministri għall-ambjent tal-UE laħqu qbil dwar approċċ ġenerali dwar il-proposta tal-Kummissjoni għal liġi Ewropea dwar il-klima, inkluż mira ġdida tal-UE għat-tnaqqis tal-emissjonijiet ta' gassijiet serra ta' mill-inqas 55% sal-2030, b'segwitu għall-gwida mogħtija mill-Kunsill Ewropew fil-11 ta' Diċembru. L-approċċ ġenerali jikkostitwixxi l-mandat għal negozjati tal-Kunsill fil-laqgħat tat-trilogu mal-Parlament.
Il-Kunsill u l-Parlament Ewropew s'issa kellhom erba' laqgħat ta' trilogu bil-ħsieb li jintlaħaq qbil politiku, u bħalissa qed iħejju għall-ħames waħda.
Illum kelli l-opportunità li niskambja fehmiet mal-ministri għall-ambjent kollegi tiegħi dwar is-sitwazzjoni attwali tan-negozjati tagħna mal-Parlament Ewropew rigward il-Liġi Ewropea dwar il-Klima. Ksibna progress kbir iżda għad fadal ħafna kwistjonijiet pendenti u l-istrateġija ta' negozjar tagħna hija li ma jintlaħaq qbil dwar xejn sakemm jintlaħaq qbil dwar kollox. Il-liġi Ewropea dwar il-Klima hija prijorità assoluta għall-Presidenza Portugiża u l-għan tagħna huwa li jintlaħaq qbil mal-Parlament mill-aktar fis possibbli. Ma għandna l-ebda ħin x'naħlu - l-UE hija impenjata bis-sħiħ li ssir newtrali għall-klima sal-2050 u l-Liġi Ewropea dwar il-Klima hija l-ewwel pass kruċjali biex tgħinna niksbu dan l-objettiv.
João Pedro Matos Fernandes, Ministru għall-Ambjent u l-Azzjoni Klimatika tal-Portugall
Il-ministri kellhom skambju ta' fehmiet dwar ir-rwol tal-Faċilità għall-Irkupru u r-Reżiljenza fil-kuntest tal-ekoloġizzazzjoni tas-Semestru Ewropew. Is-Semestru Ewropew huwa strument essenzjali għall-koordinazzjoni tal-politiki ekonomiċi madwar l-UE. Il-Faċilità għall-Irkupru u r-Reżiljenza hija waħda mill-għodod ewlenin għall-irkupru Ewropew mill-pandemija tal-COVID-19, u hija mfassla biex tappoġġa t-tranżizzjoni ekoloġika u diġitali. Il-ministri ddiskutew kif dawn iż-żewġ strumenti jistgħu jikkomplementaw lil xulxin.
Il-ministri għall-ambjent kellhom dibattitu ta' orjentazzjoni dwar proposta leġiżlattiva dwar il-batteriji u l-iskart ta' batteriji. Il-batteriji huma element ewlieni tat-tranżizzjoni lejn enerġija nadifa. Il-proposta għandha l-għan li tnaqqas l-impatti ambjentali u soċjali tal-batteriji matul l-istadji kollha taċ-ċiklu tal-ħajja tal-batteriji - mill-provvista tal-materjali għall-produzzjoni, l-użu, ir-riċiklaġġ u r-rimi. B'hekk tallinja l-leġiżlazzjoni attwali mal-Patt Ekoloġiku Ewropew, tippromwovi l-ekonomija ċirkolari u għandha l-għan li tiżgura livell għoli ta' protezzjoni tas-saħħa u tal-ambjent. Il-proposta għandha l-għan ukoll li tindirizza d-diskrepanzi fis-suq intern minħabba regoli u informazzjoni mhux uniformi, billi toħloq kondizzjonijiet ekwi għall-batteriji permezz ta' sett ta' regoli komuni u aktar ċar. Id-dibattiti ser jikkontribwixxu għat-tħejjija tal-pożizzjoni tal-Kunsill dwar il-proposta.
Taħt affarijiet oħra, il-ministri għall-ambjent ħadu nota tat-8 Programm ta' Azzjoni Ambjentali (EAP) li ser iservi bħala gwida ġenerali għall-politika ambjentali Ewropea sal-2030. Fis-17 ta' Marzu, l-Ambaxxaturi tal-istati membri tal-UE approvaw mandat li ser iservi bħala l-pożizzjoni tal-Kunsill biex jinbdew negozjati mal-Parlament Ewropew dwar it-8 EAP.
Fit-12 ta' Marzu, il-Presidenza infurmat lill-ministri dwar l-approvazzjoni tal-konklużjonijiet tal-Kunsill dwar l-Istrateġija tal-Unjoni dwar is-Sustanzi Kimiċi Sostenibbli: Żmien ta' Azzjoni. Fil-konklużjonijiet tiegħu, il-Kunsill jitlob lill-Kummissjoni biex timplimenta l-azzjonijiet stabbiliti fl-istrateġija, mill-aktar fis possibbli, inkluż emendi mmirati biex jissimplifikaw il-leġiżlazzjoni tal-UE dwar is-sustanzi kimiċi, jissostitwixxu u jimminimizzaw sustanzi ta' tħassib, u jeliminaw gradwalment l-aktar sustanzi kimiċi ta' ħsara għal użi mhux essenzjali tas-soċjetà.
Il-Kummissjoni u l-Presidenza aġġornaw lill-ministri dwar il-ħames laqgħa tal-Assemblea tan-Nazzjonijiet Uniti għall-Ambjent (UNEA-5) li saret f'Nairobi fit-22 u t-23 ta' Frar 2021.
Il-Kummissjoni infurmat lill-ministri dwar is-sitwazzjoni attwali tal-istrateġija tal-UE għall-foresti, li qed titħejja bħalissa.
Il-Kummissjoni infurmat ukoll lill-ministri dwar il-Komunikazzjoni tagħha adottata reċentement dwar ir-rieżami tal-politika kummerċjali, li għall-ewwel darba tpoġġi s-sostenibbiltà fil-qalba tal-politika kummerċjali.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Illum kelli l-opportunità li niskambja fehmiet mal-ministri għall-ambjent kollegi tiegħi dwar is-sitwazzjoni attwali tan-negozjati tagħna mal-Parlament Ewropew rigward il-Liġi Ewropea dwar il-Klima. Ksibna progress kbir iżda għad fadal ħafna kwistjonijiet pendenti u l-istrateġija ta' negozjar tagħna hija li ma jintlaħaq qbil dwar xejn sakemm jintlaħaq qbil dwar kollox. Il-liġi Ewropea dwar il-Klima hija prijorità assoluta għall-Presidenza Portugiża u l-għan tagħna huwa li jintlaħaq qbil mal-Parlament mill-aktar fis possibbli. Ma għandna l-ebda ħin x'naħlu - l-UE hija impenjata bis-sħiħ li ssir newtrali għall-klima sal-2050 u l-Liġi Ewropea dwar il-Klima hija l-ewwel pass kruċjali biex tgħinna niksbu dan l-objettiv.
