"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Strateġija dwar l-adattament għat-tibdil fil-klima
Il-Kunsill approva l-konklużjonijiet tal-Kunsill dwar "Insawru Ewropa reżiljenti għall-klima – l-Istrateġija l-ġdida tal-UE dwar l-Adattament għat-Tibdil fil-Klima".
L-istrateġija l-ġdida dwar l-adattament għat-tibdil fil-klima tiddeskrivi viżjoni fit-tul kif l-UE tista' ssir soċjetà reżiljenti għat-tibdil fil-klima li tkun kompletament adattata għall-impatti inevitabbli tat-tibdil fil-klima sal-2050.
It-tibdil fil-klima mhuwiex biss theddida futura - qed jiġri issa. Jeħtieġ li nkunu ppreparati aħjar għall-konsegwenzi tiegħu fuq is-saħħa tal-bniedem, in-natura u l-ekonomija. Il-konklużjonijiet tal-lum wasslu għal azzjoni ta' adattament msaħħa. L-istrateġija l-ġdida tiffoka fuq data aħjar u użu aħjar tad-data eżistenti, il-promozzjoni ta' soluzzjonijiet ibbażati fuq in-natura, l-integrazzjoni ta' konsiderazzjonijiet finanzjarji u ekonomiċi u t-tisħiħ tal-azzjoni fil-livell internazzjonali. Il-klima kienet prijorità ewlenija għall-Presidenza Portugiża u ninsabu kuntenti li l-Kunsill illum approva l-istrateġija l-ġdida tal-UE għall-adattament għall-klima li, flimkien mal-Liġi Ewropea dwar il-Klima li ntlaħaq qbil dwarha reċentement, ser tgħin lill-UE ssir reżiljenti għall-klima u newtrali għall-klima fid-deċennji li ġejjin.
João Pedro Matos Fernandes, Ministru għall-Ambjent u l-Azzjoni Klimatika tal-Portugall
Il-konklużjonijiet tal-Kunsill japprovaw l-għanijiet tal-istrateġija li tapprofondixxi u tespandi l-azzjonijiet ta' adattament, b'enfasi msaħħa fuq l-għarfien, il-konsiderazzjonijiet finanzjarji u ekonomiċi, soluzzjonijiet ibbażati fuq in-natura, id-dimensjoni internazzjonali u rwol għall-assigurazzjoni.
Il-ministri tal-UE evalwaw il-progress fir-rigward tal-proposta għal regolament dwar il-batteriji u l-iskart ta' batteriji, ippreżentata mill-Kummissjoni fl-10 ta' Diċembru 2020.
Il-batteriji huma element ewlieni tat-tranżizzjoni lejn enerġija nadifa. Il-proposta biex tiġi aġġornata l-leġiżlazzjoni tal-UE dwar il-batteriji u l-iskart ta' batteriji għandha l-għan li tnaqqas l-impatti ambjentali u soċjali tal-batteriji matul l-istadji kollha taċ-ċiklu tal-ħajja tal-batteriji - mill-provvista tal-materjali għall-produzzjoni, l-użu, ir-riċiklaġġ u r-rimi.
Il-proposta tallinja l-leġiżlazzjoni attwali mal-Patt Ekoloġiku Ewropew, tippromwovi l-ekonomija ċirkolari u għandha l-għan li tiżgura livell għoli ta' protezzjoni tas-saħħa u tal-ambjent. Għandha l-għan ukoll li tindirizza d-diskrepanzi fis-suq intern minħabba regoli u informazzjoni mhux uniformi, billi toħloq kondizzjonijiet ekwi għall-batteriji permezz ta' sett ta' regoli komuni u aktar ċar.
Il-ministri kellhom skambju ta' fehmiet dwar il-komunikazzjoni tal-Kummissjoni dwar il-pjan ta' azzjoni tal-UE dwar tniġġis żero.
Bħala element ewlieni tal-Patt Ekoloġiku Ewropew, il-pjan ta' azzjoni jistabbilixxi viżjoni għal tniġġis żero fl-UE sal-2050. Għandu l-għan li jnaqqas it-tniġġis fl-arja, fl-ilma u fil-ħamrija u li joħloq ambjent ħieles mit-tossiċità. Il-pjan ta' azzjoni jiddeskrivi l-miri ewlenin għall-2030 għal diversi tipi ta' tniġġis u jiddefinixxi għadd ta' azzjonijiet u inizjattivi ewlenin biex tinkiseb l-ambizzjoni ta' tniġġis żero, inkluż diversi proposti leġiżlattivi attwali u ppjanati.
Il-presidenza aġġornat lill-ministri dwar is-sitwazzjoni attwali tad-diskussjonijiet dwar ir-regolament ta' Aarhus dwar l-aċċess għall-ġustizzja fi kwistjonijiet ambjentali. Il-Kunsill laħaq approċċ ġenerali dwar il-proposta fis-17 ta' Diċembru 2020. Minn dakinhar 'l hawn, il-Kumitat għall-Konformità mal-Konvenzjoni ta' Aarhus ħareġ il-parir tiegħu dwar il-proposta tal-Kummissjoni u adotta s-sejbiet tiegħu dwar każ ġdid li jikkonċerna l-għajnuna mill-Istat. In-negozjati tat-trilogu politiku bejn il-Kunsill u l-Parlament bdew fl-4 ta' Ġunju 2021.
Il-presidenza infurmat lill-ministri dwar is-sitwazzjoni attwali tad-diskussjonijiet dwar il-proposta għal deċiżjoni dwar it-tmien programm ta' azzjoni ambjentali. Il-programm ta' azzjoni ser iservi bħala gwida ġenerali għall-politika ambjentali Ewropea sal-2030. Il-proposta għal deċiżjoni tibni fuq il-Patt Ekoloġiku Ewropew u l-lista ta' azzjonijiet dettaljati fih. Il-Kunsill adotta l-mandat tiegħu għan-negozjati fis-17 ta' Marzu 2021. Wara li l-Parlament Ewropew jadotta l-pożizzjoni tiegħu, il-Kunsill u l-Parlament ser jibdew negozjati ta' trilogu biex jintlaħaq qbil politiku dwar il-fajl.
Id-delegazzjoni Netherlandiża, appoġġata mill-Belġju u l-Lussemburgu, ġibdet l-attenzjoni tal-ministri għall-prevenzjoni tal-frodi fis-settur tal-bijokarburanti. Id-delegazzjoni Netherlandiża infurmat lill-ministri dwar l-Alleanza għad-Dekarbonizzazzjoni tat-Trasport. Id-delegazzjoni Estonjana ppreżentat informazzjoni dwar laqgħa tal-konvenzjoni internazzjonali dwar l-ilma. Id-delegazzjoni Ċeka, appoġġata mill-Bulgarija, Ċipru, il-Greċja, l-Ungerija, ir-Rumanija u s-Slovakkja, ġibdet l-attenzjoni tal-ministri għall-implikazzjonijiet tat-tassonomija tal-UE għat-tranżizzjoni lejn ekonomija sostenibbli. Id-delegazzjoni Żvediża, appoġġata minn Franza u l-Lussemburgu, ġibdet l-attenzjoni tal-ministri għall-kwistjoni li jitreġġa' lura t-tnaqqis tad-dakkara.
Fl-aħħar nett, id-delegazzjoni Slovena ppreżentat il-programm ta' ħidma għall-presidenza tagħha li jmiss.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
It-tibdil fil-klima mhuwiex biss theddida futura - qed jiġri issa. Jeħtieġ li nkunu ppreparati aħjar għall-konsegwenzi tiegħu fuq is-saħħa tal-bniedem, in-natura u l-ekonomija. Il-konklużjonijiet tal-lum wasslu għal azzjoni ta' adattament msaħħa. L-istrateġija l-ġdida tiffoka fuq data aħjar u użu aħjar tad-data eżistenti, il-promozzjoni ta' soluzzjonijiet ibbażati fuq in-natura, l-integrazzjoni ta' konsiderazzjonijiet finanzjarji u ekonomiċi u t-tisħiħ tal-azzjoni fil-livell internazzjonali. Il-klima kienet prijorità ewlenija għall-Presidenza Portugiża u ninsabu kuntenti li l-Kunsill illum approva l-istrateġija l-ġdida tal-UE għall-adattament għall-klima li, flimkien mal-Liġi Ewropea dwar il-Klima li ntlaħaq qbil dwarha reċentement, ser tgħin lill-UE ssir reżiljenti għall-klima u newtrali għall-klima fid-deċennji li ġejjin.
