Grupp tal-Euro, 04/12/2017, 4 ta' Diċembru 2017

Riżultati ewlenin

Il-Grupp tal-Euro ltaqa’ f'żewġ formati: l-ewwel f'laqgħa regolari tal-ministri taż-żona tal-euro, filwaqt li t-tieni parti kienet laqgħa tal-ministri tas-27 stat membru tal-UE bil-għan tat-tħejjija għas-Summit tal-Euro li ser isir f'Diċembru.

Laqgħa fil-format taż-żona tal-euro

Elezzjoni tal-President il-ġdid tal-Grupp tal-Euro

Il-Grupp tal-Euro eleġġa lil Mário Centeno, Ministru għall-Finanzi Portugiż, bħala l-President li jmiss tal-Grupp tal-Euro. Hu ser jibda l-mandat tiegħu fit-13 ta' Jannar 2018. Il-President tal-Grupp tal-Euro jiġi elett mill-membri tiegħu b'maġġoranza sempliċi, għal terminu ta' sentejn u nofs, f'konformità mal-Protokoll 14 tat-Trattat.

• Mário Centeno ser ikun il-President li jmiss tal-Grupp tal-Euro (stqarrija għall-istampa)

Abbozz ta' pjanijiet baġitarji

Il-Grupp tal-Euro ddiskuta l-abbozz ta' pjanijiet baġitarji għall-2018 tal-istati membri taż-żona tal-euro u s-sitwazzjoni baġitarja ġenerali fiż-żona tal-euro. Il-Kummissjoni ħarġet dikjarazzjoni.

• Abbozz ta’ pjanijiet baġitarji għall-2018 (sit web tal-Kummissjoni Ewropea)
• Dikjarazzjoni tal-Grupp tal-Euro dwar l-Abbozz ta' Pjanijiet Baġitarji għall-2018 (stqarrija għall-istampa)

Sorveljanza ta’ wara l-programm: Ċipru u Spanja

Il-Grupp tal-Euro ġie infurmat bir-riżultati ewlenin tal-missjonijiet ta’ sorveljanza ta’ wara l-programm f’Ċipru u fi Spanja, imwettqa mill-persunal tal-Kummissjoni Ewropea u l-Bank Ċentrali Ewropew, fil-ħarifa ta’ din is-sena.

Is-sorveljanza ta’ wara l-programm tintemm meta mill-inqas 75 % tas-selfa tkun intraddet lura.

• Rapport dwar is-Sorveljanza ta' wara l-Programm. Ċipru, Ħarifa 2017 (sit web tal-Kummissjoni Ewropea)
• Rapport dwar is-Sorveljanza ta' wara l-programm. Spanja, Ħarifa 2017 (sit web tal-Kummissjoni Ewropea)

Il-programm ta’ aġġustament tal-Greċja: sitwazzjoni attwali

Il-Grupp tal-Euro ngħata informazzjoni mill-istituzzjonijiet (il-Kummissjoni Ewropea, il-Bank Ċentrali Ewropew, il-Fond Monetarju Internazzjonali u l-Mekkaniżmu Ewropew ta’ Stabbiltà) dwar il-progress tat-tielet rieżami li għaddej tal-programm ta’ aġġustament makroekonomiku tal-Greċja. Fit-2 ta’ Diċembru, l-awtoritajiet Griegi u l-istituzzjonijiet laħqu qbil fil-livell tal-persunal dwar il-kundizzjonalità tal-linja ta' politika. L-attenzjoni issa ddur fuq l-implimentazzjoni tal-azzjonijiet li hemm bżonn li jsiru qabel mill-awtoritajiet.

• Greċja: it-tielet programm ta’ aġġustament ekonomiku (informazzjoni ġenerali)

Diskussjonijiet tematiċi dwar it-tkabbir u l-impjiegi: porzjon ta’ taxxa fuq ix-xogħol

Il-Ministri komplew bid-diskussjoni tagħhom dwar kif inaqqsu aktar il-pressjoni tat-taxxa fuq ix-xogħol bħala mezz biex jiżdied it-tkabbir ekonomiku. Huma evalwaw il-progress lejn il-limitu massimu li qabel dwaru l-Grupp tal-Euro fl-2015 billi eżaminaw il-miżuri previsti fil-pjanijiet baġitarji għall-2018 tal-istati membri taż-żona tal-euro.

• Dikjarazzjoni tal-Grupp tal-Euro dwar l-aġenda tar-riforma strutturali - diskussjonijiet tematiċi dwar it-tkabbir u l-impjiegi: valutazzjoni komparattiva tal-piż tat-taxxa fuq ix-xogħol (stqarrija għall-istampa, 12 ta' Settembru 2015)

Programm ta' ħidma tal-Grupp tal-Euro

Il-Grupp tal-Euro adotta l-programm ta’ ħidma tiegħu għall-ewwel semestru tal-2018.

• Programm ta' ħidma tal-Grupp tal-Euro għall-ewwel nofs tal-2018

Laqgħa f'format estiż

Approfondiment tal-Unjoni Ekonomika u Monetarja

Il-ministri komplew bit-tħejjija tagħhom għal-laqgħa tas-Summit tal-Euro tal-15 ta’ Diċembru, fejn ser jiġu diskussi suġġetti relatati mal-approfondiment tal-Unjoni Ekonomika u Monetarja (UEM) u t-tlestija tal-unjoni bankarja.

• Summit tal-Euro, 15 ta' Diċembru 2017
• Ittra mill-President Donald Tusk lill-mexxejja tal-UE qabel l-ikla informali tagħhom f'Tallinn (stqarrija għall-istampa)
• Aġenda tal-Mexxejja (infografika)