Summit tal-Euro, 15/12/2017, 15 ta' Diċembru 2017

Is-Summit tal-Euro ddiskuta l-ġejjieni tal-unjoni ekonomika u monetarja u l-unjoni bankarja.

"Il-parteċipanti fis-summit qablu mal-proposta tiegħi li fis-sitt xhur li ġejjin il-ħidma tal-ministri għall-finanzi tagħna għandha tikkonċentra fuq oqsma fejn hemm l-akbar konverġenza ta' fehmiet." Il-President Tusk fir-rimarki tiegħu wara l-laqgħat tal-Kunsill Ewropew tal-14 u l-15 ta' Diċembru 2017

Il-mexxejja tal-UE kellhom skambju ta' fehmiet dwar kif jiżguraw li l-UE jkollha l-mezzi xierqa biex jiffaċċjaw xokkijiet ekonomiċi potenzjali.

Id-dibattitu kien imsejjes fuq nota ċċirkolata mill-President Tusk qabel is-summit bħala parti mill-Aġenda tal-Mexxejja. Din in-nota ddeskriviet għadd ta’ ideat li fuqhom hemm konverġenza ġenerali, bħal pereżempju:

• il-bidu tat-tħaddim ta' garanzija ta' kontinġenza komuni għall-Fond Uniku ta' Riżoluzzjoni, possibbilment fil-forma ta' linja ta' kreditu mill-Mekkaniżmu Ewropew ta' Stabbiltà (MES);
• aktar żvilupp tal-MES, biex possibbilment isir hekk imsejjaħ Fond Monetarju Ewropew.
• aktar żvilupp tal-Pjan Direzzjonali tal-Kunsill Ecofin ta’ Ġunju 2016 dwar it-tlestija tal-unjoni bankarja, fosthom l-introduzzjoni gradwali ta’ Skema Ewropea ta’ Assigurazzjoni tad-Depożiti

• Nota tal-Aġenda tal-Mexxejja dwar l-unjoni ekonomika u monetarja

Is-Summit tal-Euro sar f'format inklużiv ta’ 27 stat membru. Il-patt fiskali jipprevedi li l-pajjiżi kollha li rratifikawh (bħalissa 25) għandhom jipparteċipaw f’Summits tal-Euro meta dan ikun xieraq, u b’mod partikolari, meta tiġi diskussa l-arkitettura taż-żona tal-euro.

Minħabba l-importanza tad-diskussjonijiet, il-President Tusk iddeċieda wkoll li jistieden lill-Kroazja u lir-Repubblika Ċeka għas-summit, żewġ pajjiżi li għadhom ma rratifikawx il-patt fiskali.

Il-President Tusk ħabbar li ser isejjaħ is-Summit tal-Euro li jmiss f’Marzu 2018 biex titkompla d-diskussjoni.

• Ittra mill-President Donald Tusk lill-mexxejja tal-UE qabel l-ikla informali tagħhom f'Tallinn
• Aġenda tal-Mexxejja (informazzjoni ġenerali)
• Unjoni bankarja (informazzjoni ġenerali)
• Kummenti mill-President Donald Tusk wara l-laqgħat tal-Kunsill Ewropew tal-14 u l-15 ta' Diċembru 2017