Grupp tal-Euro, 24/05/2018, 24 ta' Mejju 2018

Riżultati ewlenin

Il-laqgħa tal-Grupp tal-Euro saret f'żewġ formati - l-ewwel parti kienet laqgħa regolari tal-ministri taż-żona tal-euro, u t-tieni parti kienet laqgħa tal-ministri tas-27 stat membru tal-UE.

Laqgħa tal-Grupp tal-Euro f'format regolari

Il-programm ta' aġġustament ekonomiku tal-Greċja

Il-Grupp tal-Euro ġie infurmat dwar il-qbil fil-livell tal-persunal konkluż mill-istituzzjonijiet u l-awtoritajiet Griegi fid-19 ta' Mejju. L-enfasi issa hija fuq l-implimentazzjoni b’suċċess mill-Greċja tar-riformi maqbula, qabel il-laqgħa tal-Grupp tal-Euro ta’ Ġunju.

Il-Grupp tal-Euro kompla wkoll id-diskussjonijiet tiegħu dwar miżuri possibbli tad-dejn bi tħejjija għad-deċiżjonijiet li huma ppjanati għal-laqgħa tal-Grupp tal-Euro f’Ġunju.

Il-programm ta’ aġġustament ekonomiku tal-Greċja issa għaddej mir-raba’ u l-aħħar rieżami tiegħu. Id-data tal-iskadenza formali tal-programm hi l-20 ta' Awwissu 2018.

• Dikjarazzjoni mill-Istituzzjonijiet Ewropej dwar il-qbil fil-livell tal-persunal li ntlaħaq mal-awtoritajiet Griegi (19 ta' Mejju 2018)
• Greċja: it-tielet programm ta’ aġġustament ekonomiku (informazzjoni ġenerali)
• Kronoloġija: it-tielet programm ta’ assistenza finanzjarja għall-Greċja (informazzjoni ġenerali)

Is-sitwazzjoni ekonomika fiż-żona tal-euro: it-tbassir tar-rebbiegħa tal-Kummissjoni Ewropea

Il-Kummissjoni Ewropea ppreżentat it-tbassir tagħha tar-rebbiegħa 2018, ippubblikat fit-3 ta' Mejju.

• Tbassir Ekonomiku Ewropew. Rebbiegħa 2018

Diskussjoni tematika dwar it-tkabbir u l-impjiegi: rieżamijiet tan-nefqa

Il-Grupp tal-Euro kellu diskussjoni ta' segwitu dwar ir-rieżamijiet tan-nefqa, din id-darba b'attenzjoni għall-isfida li tiġi żgurata sjieda meta jsiru r-rieżamijiet tan-nefqa. Il-ministru Irlandiż u dak Spanjol qasmu l-esperjenzi tal-pajjiżi tagħhom u t-tagħlimiet meħuda mir-rieżamijiet tan-nefqa tagħhom li tlestew dan l-aħħar.

Il-Grupp tal-Euro kien diġà ddiskuta dan is-suġġett f'Ġunju tas-sena l-oħra, u f'Settembru 2016, meta adotta prinċipji komuni għat-titjib tal-allokazzjoni tan-nefqa.

Ir-rieżamijiet tan-nefqa jgħinu lill-gvernijiet jidentifikaw oqsma fejn jistgħu jiffrankaw aktar u jżidu l-effiċjenza u fejn jista' jinkiseb valur akbar għall-flus li jintefqu.

• Kwalità tal-finanzi pubbliċi: It-tisħiħ tas-sjieda fir-rieżamijiet tan-nefqa (nota ta' informazzjoni teknika mill-Kummissjoni Ewropea)

Laqgħa f'format inklużiv

L-unjoni bankarja u l-Mekkaniżmu Ewropew ta' Stabbiltà (MES)

Il-ministri għall-finanzi mis-27 stat membru tal-UE kellhom skambju ta' fehmiet dwar it-tlestija tal-unjoni bankarja u r-rwol futur tal-MES. Ħadu kont tal-progress li sar s’issa u ddiskutew it-triq ’il quddiem bi tħejjija għal-laqgħa li jmiss tal-mexxejja f’Ġunju.