Grupp tal-Euro, 12/07/2018, 12 ta' Lulju 2018

Riżultati ewlenin

Informazzjoni mis-Summit tal-Euro ta' Ġunju

Il-President tal-Grupp tal-Euro Mário Centeno informa lill-ministri dwar l-eżitu tas-Summit tal-Euro, li sar fid-29 ta' Ġunju.

Huwa ddeskriva wkoll fil-qosor il-kwistjonijiet relatati mal-approfondiment tal-Unjoni Ekonomika u Monetarja li l-Grupp tal-Euro ser ikun mistenni jaħdem fuqhom qabel il-laqgħa tas-Summit tal-Euro li jmiss, li hija skedata għal Diċembru ta' din is-sena.

Dawn jinkludu termini ta’ referenza għal garanzija ta’ kontinġenza komuni għall-fond uniku ta’ riżoluzzjoni li għandha tiġi pprovduta mill-Mekkaniżmu Ewropew ta’ Stabbiltà (MES), u dokument dwar il-kondizzjonijiet għall-iżvilupp ulterjuri tal-MES, kif ukoll pjan direzzjonali għall-bidu ta’ negozjati politiċi dwar l-EDIS. Il-Grupp tal-Euro ser jiddiskuti wkoll l-elementi l-oħra kollha elenkati fl-ittra tal-president tal-Grupp tal-Euro tal-25 ta’ Ġunju 2018 lill-President Tusk.

• Summit tal-Euro, 29 ta' Ġunju 2018
• Dikjarazzjoni tas-Summit tal-Euro, 29 ta' Ġunju 2018
• Ittra mill-President tal-Grupp tal-Euro Mário Centeno lill-President tal-Kunsill Ewropew Donald Tusk

Preżentazzjoni tal-previżjoni interim tas-sajf

Il-Grupp tal-Euro ddiskuta s-sitwazzjoni u l-prospetti ekonomiċi għaż-żona tal-euro, abbażi ta' preżentazzjoni mill-Kummissjoni Ewropea dwar il-previżjoni interim tagħha tas-sajf.

Il-Grupp tal-Euro jiddiskuti regolarment is-sitwazzjoni ekonomika u l-isfidi tal-politika ekonomika bħala parti mill-isforzi tiegħu biex jikkontribwixxi b'mod effettiv għat-tkabbir ekonomiku u l-ħolqien tal-impjiegi.

• Tbassir Ekonomiku Ewropew. Sajf 2018 (Interim)

Sitwazzjoni u prospettivi baġitarji

Il-Grupp tal-Euro kellu diskussjoni dwar is-sitwazzjoni baġitarja fiż-żona tal-euro inġenerali, li ffokat fuq il-prospettivi għall-2019. Ir-riżultati ta’ dan l-iskambju ser jikkontribwixxi għat-tħejjija tal-abbozz ta’ pjanijiet baġitarji tal-istati membri taż-żona tal-euro u r-rakkomandazzjonijiet għaż-żona tal-euro l-istati membri fl-2019.

Il-President tal-Bord Fiskali Ewropew (EFB), Niels Thygesen, ippreżenta r-rapport tal-EFB. L-EFB huwa korp konsultattiv indipendenti tal-Kummissjoni Ewropea. Huwa jagħti pariri dwar kwistjonijiet relatati mal-pożizzjoni fiskali taż-żona tal-euro.

Il-Grupp tal-Euro huwa meħtieg mil-liġi tal-UE li jiddiskuti s-sitwazzjoni u l-prospettivi baġitarji taż-żona tal-euro fil-qafas tal-valutazzjoni tal-abbozz ta' pjanijiet baġitarji tal-istati membri taż-żona tal-euro. Għaldaqstant ikollu diskussjonijiet regolari dwar il-pożizzjoni fiskali taż-żona tal-euro.

• Bord Fiskali Ewropew (EFB)
• Rapport tal-EFB: Valutazzjoni tal-pożizzjoni fiskali prospettiva xierqa għaż-żona tal-euro

L-Irlanda u Spanja: missjonijiet ta' sorveljanza ta’ wara l-programm

Il-Kummissjoni Ewropea u l-Bank Ċentrali Ewropew ippreżentaw lill-Grupp tal-Euro s-sejbiet ewlenin mill-missjonijiet ta' sorveljanza ta’ wara l-programm tagħhom għal Spanja u l-Irlanda, li saru f'April u f'Mejju tal-2018 rispettivament.

Il-Mekkaniżmu Ewropew ta' Stabbiltà ppreżenta s-sejbiet relatati mas-sistema ta' twissija bikrija tiegħu fiż-żewġ pajjiżi.

Il-Fond Monetarju Internazzjonali informa wkoll dwar il-konsultazzjoni reċenti tiegħu mal-Irlanda skont l-Artikolu IV.

Skont ir-rapporti tal-istituzzjonijiet, il-prestazzjoni ekonomika kemm tal-Irlanda u Spanja għadha b’saħħitha, u r-riskji f’termini ta’ ħlas lura tas-self rispettiv tagħhom huma baxx sa ferm baxx.

Is-sorveljanza ta’ wara l-programm (PPS) issir f'pajjiżi li jkunu temmew programmi ta' assistenza finanzjarja sakemm mill-inqas 75% tal-assistenza finanzjarja li jkunu rċevew tkun tħallset lura. L-għan hu li jkun ivvalutat jekk hemmx xi riskji għall-kapaċità tagħhom li jħallsu lura s-self li jkunu rċevew tul il-programmi tagħhom.

• Dikjarazzjoni mill-persunal tal-Kummissjoni Ewropea u tal-BĊE wara l-konklużjoni tad-disa' missjoni ta' sorveljanza ta’ wara l-programm għall-Irlanda
• Dikjarazzjoni mill-persunal tal-Kummissjoni Ewropea u tal-Bank Ċentrali Ewropew wara d-disa' żjara ta' sorveljanza ta’ wara l-programm għal Spanja
• Rapport dwar is-Sorveljanza ta' wara l-Programm. Irlanda, Rebbiegħa 2018
• Rapport dwar is-Sorveljanza ta' wara l-Programm. Spanja, Rebbiegħa 2018
• Irlanda: Konsultazzjoni tal-2018 skont l-Artikolu IV

L-intenzjoni tal-Bulgarija li tissieħeb mal-Mekkaniżmu tar-Rata tal-Kambju tal-UE (ERM II)

Fil-marġini tal-laqgħa tal-Grupp tal-Euro, ir-rappreżentanti mill-istati membri taż-żona tal-euro, il-Bank Ċentrali Ewropew u d-Danimarka ltaqgħu fil-preżenza tal-Kummissjoni Ewropea u tal-Bulgarija biex jiddiskutu l-prospetti tal-parteċipazzjoni tal-Bulgarija fl-ERM II.

Il-parteċipanti tal-laqgħa adottaw dikjarazzjoni.

• Stqarrija dwar it-triq tal-Bulgarija lejn parteċipazzjoni fl-ERM II (stqarrija għall-istampa, 12/7/2018)
• Ittra mill-Bulgarija dwar il-parteċipazzjoni fl-ERM II