Grupp tal-Euro, 19/11/2018, 19 ta' Novembru 2018

Riżultati ewlenin

Il-Grupp tal-Euro ltaqa' f'format inklużiv ta' 27 stat membru biex jiddiskuti l-approfondiment tal-Unjoni Ekonomika u Monetarja.

Il-Ministri komplew it-tħejjijiet qabel il-laqgħa tas-summit tal-Euro f'Diċembru.

Unjoni bankarja

Il-ministri ħadu kont tal-progress miksub fit-tnaqqis tar-riskju, abbażi ta' valutazzjoni mill-istituzzjonijiet. Il-Grupp tal-Euro kellu wkoll skambju ta' fehmiet dwar l-għażliet possibbli biex titjieb l-istruttura attwali biex jiġu indirizzati l-ħtiġijiet ta' likwidità possibbli ta' banek riżolti.

Il-Grupp tal-Euro ddiskuta kwistjonijiet relatati mal-garanzija ta' kontinġenza komuni għall-Fond Uniku ta' Riżoluzzjoni. L-iskambju ta' fehmiet indirizza b'mod partikolari l-possibbiltà ta' introduzzjoni tal-garanzija ta' kontinġenza qabel tmiem il-perjodu ta' transizzjoni, jiġifieri qabel l-2024, dment li jinkiseb biżżejjed tnaqqis ta' riskju.

• Unjoni bankarja (informazzjoni ġenerali)

Riforma tal-Mekkaniżmu Ewropew ta' Stabbiltà (MES)

Abbażi ta' diskussjonijiet preċedenti, il-ministri kellhom skambju ta' fehmiet dwar ir-riforma tal-Mekkaniżmu Ewropew ta' Stabbiltà, inkluż dwar il-kooperazzjoni bejn il-MES u l-Kummissjoni.

Il-Grupp tal-Euro ddiskuta kwistjonijiet ta' sostenibbiltà tad-dejn inkluż il-possibbiltà ta' introduzzjoni ta' klawsoli ta' azzjoni kollettiva 'single limb' li tista' ttejjeb l-effiċjenza ta' ristrutturazzjonijiet possibbli tad-dejn fil-każ eċċezzjonali li dawn tqiesu meħtieġa. Il-ministri kellhom ukoll skambju ta' fehmiet dwar ir-rwol possibbli li l-MES jista' jaqdi fl-iffaċilitar tad-djalogu bejn l-istati membri u l-kredituri tagħhom, f’konformità mal-prassi tal-FMI.

Strumenti għall-istabbilizzazzjoni u l-konverġenza

Il-Grupp tal-Euro eżamina proposti dwar l-introduzzjoni ta' strumenti għall-istabbilizzazzjoni u l-konverġenza.