Grupp tal-Euro, 21/01/2019, 21 ta' Jannar 2019

Riżultati ewlenin

Il-Grupp tal-Euro l-ewwel ltaqa’ f’format regolari u wara ngħaqad għal laqgħa tal-Grupp tal-Euro f’format inklużiv.

Format regolari

Semestru Ewropew: Rakkomandazzjonijiet għall-2019 għaż-żona tal-euro

Il-Grupp tal-Euro ddiskuta l-abbozz ta' rakkomandazzjonijiet tal-Kunsill dwar il-politika ekonomika taż-żona tal-euro għall-2019, maħruġa fil-kuntest tas-Semestru Ewropew, il-mekkaniżmu għall-koordinazzjoni tal-politika tal-UE.

L-abbozz ta' rakkomandazzjonijiet ser jiġi approvat mill-Kunsill Affarijiet Ekonomiċi u Finanzjarji fit-22 ta' Jannar. Ir-rakkomandazzjonijiet ser jiġu adottati formalment mill-Kunsill wara l-approvazzjoni fil-Kunsill Ewropew ta' Marzu.

• Rakkomandazzjoni dwar il-politika ekonomika taż-żona tal-euro
• Is-Semestru Ewropew fl-2019 (informazzjoni ġenerali)

Ir-rwol internazzjonali tal-euro

Il-Grupp tal-Euro ddiskuta r-rwol internazzjonali tal-euro abbażi tal-komunikazzjoni tal-Kummissjoni "Lejn rwol internazzjonali aktar b’saħħtu tal-euro" ta' Diċembru 2018.

Fil-komunikazzjoni tagħha, il-Kummissjoni ddeskriviet l-opportunità li l-euro tiżviluppa aktar ir-rwol globali tagħha u tikseb il-potenzjal sħiħ tagħha, b'mod li jirrifletti s-saħħa politika, ekonomika u finanzjarja taż-żona tal-euro.

Din id-diskussjoni qanqlet skambju interessanti billi hija punt importanti għal raġunijiet ekonomiċi u politiċi. Fis-summit tal-Euro, il-mexxejja talbuna naħdmu aktar fuq dan, u għalhekk aħna ser inkunu qegħdin immexxu d-diskussjonijiet ’il quddiem fil-ftit xhur li ġejjin. Mário Centeno, il-President tal-Grupp tal-Euro

• Ir-rwol internazzjonali tal-euro (is-sit elettroniku tal-Kummissjoni)
• Komunikazzjoni tal-Kummissjoni: Lejn rwol internazzjonali aktar b’saħħtu tal-euro

Ħatra ta’ Membru tal-Bord Eżekuttiv tal-BĊE

Il-President tal-Grupp tal-Euro nieda sejħa għal kandidati għal membru ġdid tal-Bord Eżekuttiv tal-Bank Ċentrali Ewropew biex jieħu post Peter Praet li l-mandat tiegħu jiskadi fil-31 ta’ Mejju.

Format inklużiv

Approfondiment tal-UEM – Segwitu għas-Summit tal-Euro ta’ Diċembru

Il-ministri skambjaw fehmiet dwar is-segwitu għas-Summit tal-Euro ta’ Diċembru fejn ġie maqbul li l-ministri għall-finanzi għandhom ikomplu l-ħidma li twassal għal tisħiħ sinifikanti tal-UEM abbażi tal-pakkett komprensiv approvat mill-mexxejja tal-UE.

Il-ministri ddiskutew ukoll kif għandha tiġi organizzata l-ħidma futura. Dan jinkludi skambju ta’ fehmiet dwar il-passi li jmiss fir-rigward tal-iskema Ewropea ta’ assigurazzjoni tad-depożiti (EDIS) u l-istrument baġitarju għall-konverġenza u l-kompetittività għaż-żona tal-euro u l-istati membri tal-ERM II fuq bażi volontarja.

• Dikjarazzjoni tas-Summit tal-Euro, 14/12/2018
• Summit tal-Euro, 14/12/2018