Kunsill Affarijiet Barranin, 08/05/2014, 8 ta' Mejju 2014

Id-diskussjonijiet dwar il-kummerċ iffukaw fuq il-Kanada, il-Ġappun u l-prodotti ambjentali

Il-Kunsill Affarijiet Barranin tat-8 ta’ Mejju 2014 iffoka fuq il-progress li sar fil-ftehimiet kummerċjali tal-UE mal-Kanada u l-Ġappun, u l-liberalizzazzjoni tal-kummerċ fi prodotti u servizzi ambjentali.

Il-Kunsill iddiskuta prinċipalment ir-rapport tal-Kummissjoni dwar l-aħħar żviluppi u kwistjonijiet tekniċi pendenti fin-negozjati dwar ftehim ekonomiku u kummerċjali komprensiv (CETA) mal-Kanada.

Il-Kunsill ħa nota tal-elementi ewlenin ta’ rapport orali tal-Kummissjoni dwar il-Ftehim ta’ Kummerċ Ħieles mal-Ġappun. Meta ta mandat lill-Kummissjoni biex tinnegozja dan il-ftehim, f’Mejju 2013, il-Kunsill inkluda klawsola ta’ reviżjoni dwar it-tneħħija effettiva ta’ ostakli non-tariffarji mill-Ġappun. Il-ministri appellaw lill-Kumitat dwar il-Politika tal-Kummerċ (TPC) sabiex jeżamina r-rapport meta jkun disponibbli u jivvaluta jekk il-progress imwettaq milll-Ġappun huwiex biżżejjed biex jitkomplew in-negozjati.

Flimkien mad-diskussjonijiet dwar il-ftehim ta' kummerċ ħieles, il-ministri laqgħu l-progress li sar fin-negozjati dwar ftehim qafas biex tiġi approfondita aktar il-kooperazzjoni politika, globali u settorjali bejn l-UE u l-Ġappun.

Il-ministri tal-UE ddiskutewl-aġenda tal-UE wara Bali u l-opportunità li tingħata spinta lill-kummerċ ekoloġiku fid-dinja kollha. Huma kkonfermaw l-appoġġ tagħhom għal-liberalizzazzjoni tal-kummerċ fi prodotti u servizzi ambjentali. Adottaw konklużjonijiet dwar l-espedjenza ta’ inizjattiva multilaterali ta' “prodotti ekoloġiċi”, billi jiġu eliminati t-tariffi fuq firxa wiesgħa ta’ prodotti li jikkontribwixxu b’mod pożittiv għal tkabbir ekoloġiku, il-protezzjoni ambjentali u l-iżvilupp sostenibbli.

Waqt l-ikel, Karel De Gucht, il-Kummissarju tal-Kummerċ tal-UE, informa lill-ministri dwar il-progress li sar fin-negozjati mal-Istati Uniti dwar Sħubija Trans-Atlantika ta’ Kummerċ u ta’ Investiment (TTIP). Il-ħames ċiklu ta’ taħditiet kummerċjali bejn l-UE u l-Istati Uniti ser jibda fid-19 ta’ Mejju.

Dwar il-Ftehim Ekonomiku u Kummerċjali Komprensiv (CETA) mal-Kanada

Il-ftehim ser ineħħi 99% tal-ostakli tariffarji u joħloq opportunitajiet ġodda tas-suq għal kummerċ fi prodotti u servizzi, u investimenti. Ladarba jkun implimentat, il-ftehim huwa mistenni li jżid il-kummerċ bilaterali tal-prodotti u s-servizzi bi 22.9 % jew€25.7 biljun, li jrawwem it-tkabbir u l-impjiegi fuq iż-żewġ naħat tal-Atlantiku. Hi mistennija żieda annwali ta’ €11.6 biljun fil-PDG tal-UE.

Suġġetti oħra fuq l-aġenda

Din il-laqgħa tal-Kunsill Affarijiet Barranin ikkunsidrat ukoll:

• il-progress li sar fil-Ftehimiet ta’ Sħubija Ekonomika mal-Afrika tal-Punent, il-Komunità tal-Afrika tal-Lvant u l-Komunità għall-Iżvilupp tan-Nofsinhar tal-Afrika
• l-implimentazzjoni ta’ preferenzi tal-kummerċ għall-Kroazja