"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Barranin (Żvilupp), 7 ta' Mejju 2024
Riżultati ewlenin
Ukrajna
Il-ministri kellhom diskussjoni dwar is-sitwazzjoni fl-Ukrajna u dwar il-Pjan għall-Ukrajna, bl-għan li jiġu żblokkati l-iżborżi taħt l-ewwel pilastru tal-Faċilità għall-Ukrajna għall-2024-2027, ikkundizzjonati mill-progress fl-aġenda ta' riforma u investiment tal-Ukrajna. L-appoġġ tal-UE taħt l-ewwel pilastru jammonta għal €38.27 biljun (għotjiet ta' €5.27 biljun u self ta' €33 biljun) tal-ammont totali ta' €50 biljun fl-ambitu tal-Faċilità għall-Ukrajna.
Ir-rikostruzzjoni u l-modernizzazzjoni huma meħtieġa bħala parti mill-proċess ta' adeżjoni tal-Ukrajna mal-UE. Il-pjan jinkludi riformi strutturali ewlenin, investiment u titjib fl-amministrazzjoni pubblika, l-istat tad-dritt u l-ġlieda kontra l-korruzzjoni u l-frodi. L-appoġġ tal-istati membri ser jippermetti l-pagamenti ppjanati bħala parti mill-Faċilità għall-Ukrajna.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Il-Kummissjoni Ewropea diġà bagħtet il-valutazzjoni pożittiva tagħha dwar il-pjan. Hija qieset li tissodisfa l-kriterji meħtieġa u tikkostitwixxi rispons immirat u bbilanċjat sew għall-objettivi tal-Faċilità għall-Ukrajna, filwaqt li tindirizza l-isfidi tal-perkors tal-adeżjoni u twieġeb għall-ħtiġijiet ta' rkupru, rikostruzzjoni u modernizzazzjoni tal-Ukrajna.
L-ambaxxaturi tal-istati membri tal-UE (Coreper) mistennija jappoġġaw il-valutazzjoni tal-Pjan għall-Ukrajna fit-8 ta' Mejju bil-ħsieb tal-approvazzjoni u l-iffirmar tad-deċiżjoni ta' implimentazzjoni, b'maġġoranza kwalifikata, mill-Kunsill Ecofin fl-14 ta' Mejju.
Il-ministri qasmu l-fehmiet tagħhom dwar l-appoġġ umanitarju għall-Palestinjani fid-dawl tal-aħħar żviluppi, is-sitwazzjoni umanitarja li qed tiddeterjora u l-ħtieġa li r-rispons jiġi adattat biex jiġu indirizzati l-ħtiġijiet għoljin, u li titwitta t-triq 'il quddiem, f'kuntest diffiċli li qed jevolvi. Il-ministri rriflettew ukoll dwar kif l-aħjar tiġi appoġġata l-aġenda ta' riforma tal-Awtorità Palestinjana, wara l-formazzjoni ta' gvern Palestinjan ġdid.
* Din id-deżinjazzjoni ma għandhiex tiġi interpretata bħala rikonoxximent ta' Stat tal-Palestina u hija mingħajr preġudizzju għall-pożizzjonijiet individwali tal-istati membri fuq din il-kwistjoni.
L-UE u l-istati membri jkomplu jappellaw għal pawża umanitarja immedjata li twassal għal waqfien mill-ġlied sostenibbli, il-ħelsien mingħajr kundizzjonijiet tal-ostaġġi kollha u l-provvista ta' assistenza umanitarja. Tennejna li kulħadd fir-reġjun jeħtieġ li jeżerċita trażżin u jieħu passi biex inaqqas it-tensjoni. Ma huwa fl-interess ta' ħadd li s-sitwazzjoni tkompli teskala.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Din ir-riżorsa bħalissa hi disponibbli biss bil-lingwa jew il-lingwi li ġejjin:
Matul ikla ta' ħidma, il-ministri taw ħarsa usa' lejn il-fraġilità u rriflettew fuq approċċ koerenti u taħlita ta' politiki li jistgħu jagħtu riżultati f'dawn il-kuntesti. Rispons kredibbli ta' Tim Ewropa jeħtieġ li jindirizza l-ħtiġijiet bażiċi u r-reżiljenza tal-komunitajiet fuq il-post, abbażi tar-rabta bejn l-aspett umanitarju, l-iżvilupp u l-paċi. Id-diskussjoni indirizzat ir-rwol tal-Global Gateway fir-rigward tal-fraġilità.
Ġrajjiet Kurrenti
Il-ministri tkellmu dwar it-tħejjijiet għas-Summit tal-Futur, li ser isir din is-sena fit-22 u t-23 ta' Settembru fil-marġini tal-Ġimgħa ta' Livell Għoli tal-Assemblea Ġenerali tan-Nazzjonijiet Uniti. Ngħatat attenzjoni speċjali lill-perkors finanzjarju.
Affarijiet oħra
Taħt "affarijiet oħra", il-Presidenza Belġjana infurmat lill-ministri dwar avvenimenti tas-saħħa fil-livell dinji, filwaqt li l-Finlandja u l-Estonja ppreżentaw dokument informali dwar l-implimentazzjoni tal-Global Gateway.
Il-ministri ġew aġġornati wkoll dwar l-implimentazzjoni tar-reviżjoni tal-Qafas Finanzjarju Pluriennali dwar l-NDICI-Ewropa Globali.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
