Kunsill Affarijiet Ġenerali, 20/06/2017, 20 ta' Ġunju 2017

Riżultati ewlenin

Rieżami ta' nofs it-terminu tal-qafas baġitarju tal-UE għall-2014-2020

Il-Kunsill adotta qafas baġitarju rivedut tal-UE għall-2014-2020 biex jilħaq prijoritajiet ġodda. Dan jiddedika aktar riżorsi sabiex jgħin fl-ispinta lill-impjiegi u t-tkabbir u biex tiġi indirizza l-kriżi tal-migrazzjoni. Barra minn hekk isaħħaħ il-kapaċità tal-UE biex tirreaġixxi għal avvenimenti mhux mistennija.

“Id-deċiżjoni tal-lum taġġusta l-qafas baġitarju tal-UE biex tallinjah mal-isfidi li għandna quddiemna. Dan ifisser li l-baġit tal-UE ser ikompli jsir strument aktar effettiv biex jissaħħaħ it-tkabbir, jinħolqu l-impjiegi u tiġi indirizzata l-kriżi tal-migrazzjoni. Huwa jippermetti wkoll li l-UE tirreaġixxi aktar malajr u tieħu d-deċiżjonijiet neċessarji meta tiffaċċa sfidi ġodda"

Dr Helena Dalli, Ministru ta' Malta għall-Affarijiet Ewropej u l-Ugwaljanza, u President tal-Kunsill

• L-UE tirrevedi l-qafas baġitarju tagħha għall-2014-2020 biex tilħaq prijoritajiet ġodda

Kunsill Ewropew ta’ Ġunju

Il-Kunsill iffinalizza t-tħejjijiet għal-laqgħa tal-Kunsill Ewropew fit-22 u t-23 ta’ Ġunju billi ddiskuta l-abbozz ta’ konklużjonijiet li jkopru l-punti li ġejjin:

• migrazzjoni - fejn il-Kunsill Ewropew ser jivvaluta l-aħħar żviluppi, b’enfasi partikolari fuq ir-rotta tal-Mediterran Ċentrali
• sigurtà u difiża - fejn il-mexxejja ser jikkunsidraw il-progress u jipprovdu gwida għal aktar ħidma
• impjiegi, tkabbir u kompetittività - fejn il-Kunsill Ewropew ser jeżamina l-isforzi għall-approfondiment tas-suq uniku u jafferma mill-ġdid l-impenn qawwi tal-UE għal kummerċ ħieles u ġust
• relazzjonijiet esterni - fejn il-Kunsill Ewropew ser jiġi infurmat dwar għadd ta’ laqgħat reċenti ta’ livell għoli
• il-Ftehim ta’ Pariġi dwar it-tibdil fil-klima - li fir-rigward tiegħu l-mexxejja ser jaffermaw mill-ġdid l-impenn tagħhom
• Ewropa diġitali - fejn il-Kunsill Ewropew ser jagħmel appell biex issir bidla minn approċċ settorjali għal approċċ olistiku

“Il-Kunsill Ewropew ser ikopri firxa wiesgħa ta’ kwistjonijiet. L-għan globali tiegħu huwa li jgħin biex l-Ewropa tissaħħaħ u ċ-ċittadini tagħha jiġu protetti. Dan ifisser li ser nieħdu r-riedni fil-ġlieda kontra t-tibdil fil-klima, il-protezzjoni tal-fruntieri tal-Ewropa, il-ġlieda kontra t-terroriżmu, il-ħidma lejn politika kummerċjali soda, it-tisħiħ tal-kooperazzjoni dwar is-sigurtà u d-difiża, u t-tiswir tal-futur tagħna stess bħala influwenza għas-sewwa fid-dinja. Ir-riżultat li kisbet Malta bil-kontribut għal din l-aġenda pożittiva matul is-sitt xhur tagħha fit-tmexxija tal-Kunsill jagħmilni kburija."

Dr Helena Dalli, Ministru ta' Malta għall-Affarijiet Ewropej u l-Ugwaljanza, u President tal-Kunsill

Prijoritajiet għall-2018

Il-Kunsill kellu l-ewwel diskussjoni tiegħu dwar il-prijoritajiet leġislattivi għall-2018. Il-ministri ssottolinjaw l-importanza li l-attenzjoni tingħata lil dawk il-kwistjonijiet li jistgħu jikkontribwixxu għall-objettiv tat-tisħiħ tal-Ewropa u l-protezzjoni taċ-ċittadini tagħha. Id-diskussjoni tal-Kunsill ser tikkontribwixxi għat-tħejjijiet tal-Kummissjoni tal-programm ta' ħidma tagħha għall-2018.

“Għandna quddiemna ħafna sfidi, iżda d-diskussjoni tal-lum għamlitha possibbli li niffukaw fuq dawk l-inizjattivi u l-azzjonijiet li ser issaħħu l-kapaċità tal-Ewropa sabiex tindirizza dawn l-isfidi fuq il-perjodu medju”

Dr Helena Dalli, Ministru ta' Malta għall-Affarijiet Ewropej u l-Ugwaljanza, u President tal-Kunsill 

Il-programm tal-Kunsill għat-18-il xahar li ġejjin

Il-Kunsill approva l-programm ta’ ħidma tiegħu għat-18-il xahar li ġejjin, mill-1 ta’ Lulju 2017 sal-31 ta’ Diċembru 2018. Matul dan il-perjodu, il-Kunsill ser jiġi ppresedut suċċessivament u b’rotazzjoni ta’ sitt xhur mill-Presidenza Estonjana, Bulgara u dik Awstrijaka. Il-programm ta’ ħidma għandu l-għan li jindirizza l-isfidi reċenti, isaħħaħ il-fiduċja fl-Unjoni Ewropea, iqarribha lejn iċ-ċittadini u jissimplifika l-ħajja u n-negozju permezz ta’ riżultati tanġibbli. Jidentifika l-ħames oqsma ta' prijorità li ġejjin:

• Impjiegi, tkabbir u kompetittività
• Il-protezzjoni taċ-ċittadini
• Unjoni tal-enerġija u politika dwar il-klima orjentata lejn il-futur
• Libertà, sigurtà u ġustizzja
• L-UE bħala attur globali b'saħħtu

• Programm ta’ 18-il xahar tal-Kunsill, 1 ta’ Lulju 2017 sal-31 ta’ Diċembru 2018