Laqgħa tal-Komunità Politika Ewropea, 2 ta' Ottubru 2025

Riżultati ewlenin

Is-seba' laqgħa tal-Komunità Politika Ewropea laqqgħet flimkien mexxejja mill-kontinent kollu f'Copenhagen, id-Danimarka.

Il-Komunità Politika Ewropea hija turija ta' rieda politika komuni. (...) Flimkien, irridu naħdmu għall-paċi, l-iżvilupp u l-prosperità tas-soċjetajiet tagħna u taċ-ċittadini tagħna.

Il-President Costa

Il-mexxejja ddiskutew kif tista' tissaħħaħ l-Ukrajna, is-sitwazzjoni ġenerali tas-sigurtà fl-Ewropa u kif l-Ewropa tista' ssir aktar b'saħħitha u aktar sigura fis-sitwazzjoni ġeopolitika li qed niffaċċjaw.

Is-sessjoni plenarja tal-ftuħ kienet segwita minn diskussjonijiet paralleli madwar mejda li ffokaw fuq aspetti differenti tas-sitwazzjoni tas-sigurtà fl-Ewropa, fosthom:

• it-theddid tradizzjonali u dak ibridu għas-sigurtà
• is-sigurtà ekonomika
• il-migrazzjoni

• Ittra ta' stedina għas-summit tal-Komunità Politika Ewropea f'Copenhagen

L-UE kienet irrappreżentata minn António Costa, il-President tal-Kunsill Ewropew, li kkopresieda l-laqgħa flimkien ma' Mette Frederiksen, il-Prim Ministru tad-Danimarka, kif ukoll mill-President tal-Kummissjoni Ewropea, Ursula von der Leyen, u l-President tal-Parlament Ewropew, Roberta Metsola.

Il-laqgħa tal-Komunità Politika Ewropea saret l-għada tal-laqgħa informali tal-Kunsill Ewropew.

• Laqgħa informali tal-kapijiet ta' stat jew ta' gvern, Copenhagen, 1 ta' Ottubru 2025

Il-Komunità Politika Ewropea

Il-Komunità Politika Ewropea għandha l-għan li

• trawwem djalogu politiku u kooperazzjoni biex jiġu indirizzati kwistjonijiet ta' interess komuni
• issaħħaħ is-sigurtà, l-istabbiltà u l-prosperità tal-kontinent Ewropew

Din il-pjattaforma għall-koordinazzjoni politika ma tieħu post l-ebda organizzazzjoni, struttura jew proċess eżistenti, u lanqas m'għandha l-għan li toħloq oħrajn ġodda f'dan l-istadju.

S'issa, il-Komunità Politika Ewropea ltaqgħet seba' darbiet.

• Laqgħa tal-Komunità Politika Ewropea, 16 ta' Mejju 2025
• Laqgħa tal-Komunità Politika Ewropea, 7 ta' Novembru 2024

Il-laqgħat li jmiss tal-Komunità Politika Ewropea ser isiru fl-Armenja u fl-Irlanda.

Laqgħat sekondarji

Armenja

Il-President Costa, il-President von der Leyen u r-Rappreżentant Għoli Kaja Kallas iltaqgħu ma' Nikol Pashinyan, il-Prim Ministru tal-Armenja.

Il-President Costa feraħ lill-Prim Ministru Pashinyan għall-progress storiku miftiehem mal-Ażerbajġan, pass kruċjali lejn il-paċi u l-istabbiltà fir-reġjun.

Il-paċi li ksibtu hija mument kbir għall-Ewropa tagħna.

Il-President Costa

Ażerbajġan

Il-President Costa, il-President von der Leyen u r-Rappreżentant Għoli Kaja Kallas iltaqgħu mal-President tal-Ażerbajġan Ilham Aliyev u ferħulu wkoll għall-avvanz storiku reċenti miksub mal-Armenja f'Washington.

L-UE ser tkompli tinvesti fil-konnettività reġjonali - fit-trasport, l-enerġija u t-teknoloġija diġitali - permezz tal-istrateġija Global Gateway.

Inqisu l-Ażerbajġan bħala sieħeb importanti u aħna impenjati li nsaħħu r-rabtiet ta' bejnietna.

Il-President Costa

• Global Gateway (informazzjoni ġenerali)

Greenland

Lejlet il-laqgħa tal-Komunità Politika Ewropea, il-President Costa ltaqa' mal-Prim Ministru ta' Greenland, Jens-Frederik Nielsen.

Greenland tista' tagħti kontribut importanti għas-sigurtà ekonomika u l-awtonomija strateġika tal-UE.

Il-President Costa

Moldova

Il-President Costa, il-President von der Leyen u r-Rappreżentant Għoli Kaja Kallas flimkien mal-mexxejja ta' Franza, il-Polonja, ir-Rumanija u rappreżentant mir-Renju Unit iltaqgħu mal-President tal-Moldova, Maia Sandu.

Il-President Costa feraħ lill-President Sandu għar-rebħa miksuba l-Ħadd li għadda mill-forzi demokratiċi u pro-Ewropej fil-Moldova. Il-mexxejja ddiskutew kif jista' jitħaffef il-progress lejn il-futur Ewropew li vvotaw għalih iċ-ċittadini tar-Repubblika tal-Moldova.

Għal darb'oħra, il-poplu tal-Moldova semma' leħnu: u għażel l-Ewropa.

Il-President Costa

Norveġja

Il-President Costa kellu laqgħa bilaterali mal-Prim Ministru tan-Norveġja, Jonas Gahr Støre.

In-Norveġja hija ħabiba u sieħba mill-qrib tal-UE. Il-kooperazzjoni dejjem aktar profonda tagħna hija bbażata fuq valuri kondiviżi u prijoritajiet komuni.

Il-President Costa

Flimkien, l-UE u n-Norveġja qed jaħdmu fuq l-implimentazzjoni tas-Sħubija għas-Sigurtà u d-Difiża, qed isaħħu l-appoġġ tagħhom għall-Ukrajna, u qed jippromwovu l-aġenda klimatika.

• Sħubijiet ta' sigurtà u difiża (informazzjoni ġenerali)

Ukrajna

Il-President Costa, il-President von der Leyen u l-Prim Ministru Frederiksen iltaqgħu mal-President tal-Ukrajna Volodymyr Zelenskyy u tennew l-appoġġ tal-UE u tas-sħab tagħha għall-Ukrajna sakemm tinkiseb paċi ġusta u dejjiema.

L-appoġġ għall-Ukrajna mhux appoġġ għall-gwerra, iżda għad-dritt tal-Ukrajna għal paċi dejjiema, għal paċi ġusta.

Il-President Costa

• Solidarjetà tal-UE mal-Ukrajna (informazzjoni ġenerali)