"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.

Żur il-paġna tal-politika tal-cookies tagħna għal aktar informazzjoni u biex tibdel is-settings tiegħek.

български español čeština dansk Deutsch eesti Ελληνικά English français Gaeilge hrvatski italiano latviešu lietuvių magyar Malti Nederlands polski português română slovenčina slovenščina suomi svenska
Skip to content

Ażerbajġan

Ir-relazzjonijiet tal-UE mal-Ażerbajġan huma msejsa fuq il-Ftehim ta' Sħubija u Kooperazzjoni bejn l-UE u l-Ażerbajġan, fis-seħħ mill-1999. L-UE hija l-investitur ewlieni fl-Ażerbajġan u l-akbar fost is-sħab kummerċjali tiegħu.

Sħubija tal-Lvant

L-UE tikkoopera mal-Ażerbajġan fil-qafas tal-Politika Ewropea tal-Viċinat u d-dimensjoni reġjonali tal-Lvant tagħha, is-Sħubija tal-Lvant.

Ftehim ta' Sħubija u Kooperazzjoni

Ir-relazzjonijiet bejn l-UE u l-Ażerbajġan huma msejsa fuq il-Ftehim ta' Sħubija u Kooperazzjoni bejn l-UE u l-Ażerbajġan, fis-seħħ mill-1999.

Fl-14 ta' Novembru 2016, il-Kunsill adotta mandat biex jinnegozja ftehim qafas aġġornat mal-Ażerbajġan. In-negozjati nbdew fis-7 ta' Frar 2017.

Il-kooperazzjoni bejn l-UE u l-Ażerbajġan hija ggwidata wkoll mill-prijoritajiet tas-sħubija konġunta li ilhom fis-seħħ mill-2018. Dawk il-prijoritajiet jirriflettu l-valuri u l-prinċipji tal-Politika Ewropea tal-Viċinat, u jinkludu:

  • it-tisħiħ tal-istituzzjonijiet u tal-governanza tajba
  • l-iżvilupp ekonomiku u l-opportunitajiet tas-suq
  • il-konnettività, l-effiċjenza fl-enerġija, l-ambjent u l-azzjoni dwar il-klima
  • il-mobbiltà u l-kuntatti bejn in-nies

Kunsill ta' Kooperazzjoni

Il-Kunsill ta' Kooperazzjoni huwa l-ogħla istituzzjoni formali stabbilita skont il-Ftehim ta' Sħubija u Kooperazzjoni bejn l-UE u l-Ażerbajġan, u jissorvelja l-implimentazzjoni tal-ftehim.

It-18-il Kunsill ta' Kooperazzjoni bejn l-UE u l-Ażerbajġan iltaqa' fi Brussell fid-19 ta' Lulju 2022. L-għan tal-laqgħa kien li jsir rieżami tal-istat ġenerali tar-relazzjonijiet bejn l-UE u l-Ażerbajġan u li jiġu diskussi kwistjonijiet ta' interess reċiproku bil-ħsieb ta' kooperazzjoni fil-futur.

Faċilitazzjoni tal-viżi

Il-ftehim bejn l-UE u l-Ażerbajġan għall-faċilitazzjoni tal-viżi daħal fis-seħħ fl-2014, li jagħmilha aktar faċli u orħos għaċ-ċittadini tal-Ażerbajġan, u b'mod partikolari dawk li jivvjaġġaw spiss, li jiksbu viżi għal soġġorn qasir li jħalluhom jivvjaġġaw fil-biċċa l-kbira tal-pajjiżi tal-UE.

Proċess ta' normalizzazzjoni bejn l-Armenja u l-Ażerbajġan

Appoġġ għall-paċi

L-UE tappoġġa bis-sħiħ in-normalizzazzjoni tar-relazzjonijiet bejn l-Armenja u l-Ażerbajġan, abbażi tar-rikonoxximent reċiproku tas-sovranità, l-integrità territorjali u l-invjolabbiltà tal-fruntieri ta' xulxin, f'konformità mad-Dikjarazzjoni ta' Alma-Ata tal-1991.

L-UE ilha snin taħdem maż-żewġ partijiet u mas-sħab internazzjonali biex toħloq il-kundizzjonijiet li jwasslu għal paċi dejjiema, bl-involviment personali ta' presidenti konsekuttivi tal-Kunsill Ewropew u bl-isforzi persistenti tar-Rappreżentant Għoli għall-Affarijiet Barranin u l-Politika ta' Sigurtà u tar-Rappreżentant Speċjali tal-UE għall-Kawkasu tan-Nofsinhar u l-kriżi fil-Georgia.

F'Awwissu 2025, l-UE laqgħet bi pjaċir l-inizjalar tat-trattat ta' paċi bejn l-Armenja u l-Ażerbajġan u l-firma ta' dikjarazzjoni politika. Dan il-ftehim bejn l-Armenja u l-Ażerbajġan jimmarka pass sinifikanti biex jintemmu għexieren ta' snin ta' kunflitt.

L-UE tinsab lesta tinvesti fil-konnettività reġjonali u fi ftuħ sħiħ, biex l-ewwel qabel kollox jibbenefikaw il-popolazzjonijiet maqsumin minn legati ta' kunflitt, u biex ir-reġjun jitqarreb lejn paċi, stabbiltà u prosperità sostenibbli.

Missjoni ċivili

Fit-23 ta' Jannar 2023, il-Kunsill qabel li jistabbilixxi missjoni ċivili fl-Armenja (EUMA) fil-qafas tal-Politika ta' Sigurtà u ta' Difiża Komuni (PSDK).

L-għan tal-missjoni huwa li tikkontribwixxi għal:

  • l-istabbiltà fiż-żoni tal-fruntiera tal-Armenja u l-Ażerbajġan
  • it-tisħiħ tal-fiduċja fuq il-post

L-EUMA tnediet wara d-deċiżjoni tal-Kunsill tas-17 ta' Ottubru 2022 li jiġi stazzjonat tim ta' esperti fil-monitoraġġ fl-Armenja, tul il-fruntiera internazzjonali tagħha mal-Ażerbajġan, bl-għan li jissorveljaw u janalizzaw is-sitwazzjoni fir-reġjun, u jirrappurtaw dwarha.

Il-mandat tal-missjoni huwa attiv sa Frar 2027.

Appoġġ tal-UE għall-Ażerbajġan

Investimenti

L-UE hija l-akbar investitur barrani tal-Ażerbajġan, kemm fis-settur taż-żejt kif ukoll f'dak mhux taż-żejt.

L-UE tappoġġa lill-Ażerbajġan b'investimenti biex tgħin id-diversifikazzjoni ekonomika tal-pajjiż u taċċellera t-tranżizzjoni ekoloġika u diġitali. Pereżempju l-investimenti tal-UE jiffinanzjaw:

  • il-port ta' Baku bħala ċentru sostenibbli għall-moviment tal-merkanzija u s-servizzi
  • id-diġitalizzazzjoni tal-kurituri tat-trasport fl-Ażerbajġan
  • il-kompetittività ta' 25 000 start-up u SMEs
  • l-iżvilupp rurali u t-tkabbir ekonomiku
  • infrastruttura sostenibbli u soluzzjonijiet għal bliet aktar intelliġenti u aktar ekoloġiċi

L-UE hija wkoll l-akbar donatur tal-Ażerbajġan fejn jidħlu operazzjonijiet ta' tneħħija tal-mini fl-Ażerbajġan, u tagħti appoġġ vitali biex jitnaqqsu r-riskji u jiġu evitati l-imwiet.

Riformi u soċjetà

L-UE tappoġġa l-iżvilupp u riformi soċjoekonomiċi fl-Ażerbajġan permezz tal-Istrument ta' Viċinat, ta' Kooperazzjoni għall-Iżvilupp u ta' Kooperazzjoni (NDICI).

Ir-riforma tas-settur tal-ġustizzja hija waħda mill-prijoritajiet tal-assistenza tal-UE lill-Ażerbajġan. L-UE tappoġġa speċifikament soluzzjonijiet alternattivi għat-tilwim, tgħin fil-ġlieda kontra l-korruzzjoni, u tagħti għajnuna legali liċ-ċittadini u n-negozji kif ukoll aċċess aħjar għall-ġustizzja.

L-Ażerbajġan huwa wieħed mill-benefiċjarji ewlenin tal-istrument ta' ġemellaġġ, li joffri taħriġ bejn il-pari u skambji ma' amministrazzjonijiet pubbliċi mill-istati membri tal-UE.

L-UE hija minn ta' quddiem fl-appoġġ li tagħti lis-soċjetà ċivili fl-Ażerbajġan, filwaqt li tippromwovi d-demokrazija, id-drittijiet tal-bniedem, u l-libertà tal-mezzi tax-xandir, tal-espressjoni u tal-għaqda.

Kummerċ

Fl-2024 l-UE kienet is-sieħeb kummerċjali ewlieni tal-Ażerbajġan, u rrappreżentat madwar 41.2% tal-kummerċ totali tal-pajjiż f’oġġetti, u l-akbar suq għall-esportazzjoni tal-Ażerbajġan, b'sehem ta' 63.3% fl-esportazzjoni tiegħu u sehem ta' 13.2% fl-importazzjoni tiegħu.

L-esportazzjonijiet tal-UE lejn l-Ażerbajġan huma ddominati minn makkinarju u tagħmir tat-trasport. Esportazzjonijiet oħra tal-UE lejn l-Ażerbajġan prinċipalment jinkludu sustanzi kimiċi u prodotti relatati, kif ukoll prodotti u oġġetti mmanifatturati.

Sħab fil-qasam tal-enerġija

L-Ażerbajġan huwa sieħeb strateġiku għall-UE fil-qasam tal-enerġija, u bħalissa jforni madwar 5% tad-domanda tal-UE għall-gass. Il-kuritur tal-gass tan-nofsinhar huwa inizjattiva strateġika biex il-gass mill-Baħar Kaspju jintbagħat lis-swieq Ewropej u huwa għodda ewlenija biex tissaħħaħ is-sigurtà tal-provvisti tal-enerġija fl-Ewropa.

Fl-2019, l-Ażerbajġan ingħaqad mas-sħubija għall-effiċjenza enerġetika u l-ambjent fl-Ewropa tal-Lvant (E5P). Permezz tal-inizjattiva EU4Energy ngħata aktar appoġġ tal-UE fis-settur tal-enerġija, fost oħrajn b'rabta mal-effiċjenza fl-enerġija.

F'Marzu 2024, l-UE ffaċilitat ukoll memorandum ta' qbil dwar il-kooperazzjoni fil-qasam tal-enerġija mir-riħ bejn l-aġenzija Ażerbajġana għall-enerġija rinnovabbli u l-assoċjazzjoni Ewropea tal-industrija WindEurope.

Ara wkoll

Sħubija tal-Lvant

Bandiera tal-Armenja.

Armenja

Flag of Georgia with a red cross and four smaller red crosses on a white field, flying on a flagpole against a clear blue sky.

Georgia

L-aħħar reviżjoni: 13 ta' Awwissu 2025