Kunsill Ġustizzja u Affarijiet Interni, 18/11/2016, 18 ta' Novembru 2016

Riżultati ewlenin

ETIAS

Il-Kummissjoni ppreżentat il-proposta reċenti tagħha dwar is-Sistema Ewropea ta' Informazzjoni u ta' Awtorizzazzjoni għall-Ivvjaġġar (ETIAS), li ser tippermetti verifiki minn qabel, u jekk ikun meħtieġ, jiġi rrifjutat id-dħul lil vjaġġaturi eżentati mill-obbligu tal-viża.

Fil-prinċipju, il-Ministri qiesu s-sistema proposta bħala għodda adatta biex tiġi indirizzata d-diskrepanza fl-informazzjoni dwar viżitaturi eżentati mill-obbligu tal-viża u b'hekk ser issaħħaħ il-politika tal-UE dwar is-sigurtà u l-ġestjoni tal-fruntieri. Huma inkarigaw l-esperti biex jibdew jeżaminaw il-proposta.

Billi l-ETIAS tinsab fuq il-lista ta' prijoritajiet tal-Presidenza tagħna, l-esperti ser jibdew jaħdmu fuq dan il-fajl importanti ħafna diġà aktar tard dan ix-xahar u fil-ġimgħat li għad fadal f'Diċembru. Huwa siewi li l-UE tista' tuża wkoll l-esperjenzi pożittivi fl-Istati Uniti u l-Kanada.

Robert Kaliňák, ministru għall-intern Slovakk u President tal-Kunsill

Skambju ta' informazzjoni u interoperabbiltà

Il-Kunsill ħa nota tal-progress fl-implimentazzjoni ta' pjan direzzjonali għat-titjib tal-iskambju ta' informazzjoni u l-ġestjoni tal-informazzjoni, inkluż soluzzjonijiet ta' interoperabbiltà fil-qasam tal-Ġustizzja u l-Affarijiet Interni.

Il-ministri ġew informati dwar il-ħidma tal-Grupp ta' Esperti ta' Livell Għoli dwar is-Sistemi ta' Informazzjoni u l-Interoperabbiltà (HLEG). Huma ddiskutew it-titjib u funzjonalitajiet addizzjonali li tista' toffri s-Sistema ta' Informazzjoni ta' Schengen (SIS).

L-investiment fi skambju ta' informazzjoni u ġestjoni tal-informazzjoni rapidi, effettivi u kwalitattivi u l-iżgurar tal-interoperabbiltà tal-bażijiet ta' data u tas-sistemi ta' informazzjoni tal-UE huma mod importanti ta' kif jiġu indirizzati l-isfidi attwali ta' sigurtà.

L-iskambju ta' informazzjoni u l-interoperabilità huma l-pilastru ewlieni - l-alfa u l-omega - ta' ġlieda effettiva kontra t-terroriżmu u l-kriminalità organizzata. Qed nirreferu għall-għoti ta' data rilevanti lill-bażijiet ta' data rilevanti, il-kwalità tad-data, l-ipproċessar tagħha u l-aċċess għaliha - jeħtieġ li kull ħolqa tal-katina taħdem. Inkella, jkun hemm konsegwenzi. Il-fiduċja reċiproka bejn l-istati membri u l-aġenziji Ewropej hija wkoll element ewlieni.

Robert Kaliňák, ministru għall-intern Slovakk u President tal-Kunsill

Ġlieda kontra t-terroriżmu

Il-Kunsill ħa nota tar-rapport tal-Koordinatur tal-UE għall-ġlieda kontra t-terroriżmu dwar l-implimentazzjoni ta' miżuri għall-ġlieda kontra t-terroriżmu.

Ir-rapport jippreżenta s-sitwazzjoni attwali ġenerali, li tkopri l-progress fil-miżuri kollha mill-Kunsill Ewropew tat-12 ta' Frar 2015 'il hawn. Dan jinkludi wkoll sett ta' rakkomandazzjonijiet għal azzjoni futura.

• Ġlieda tal-UE kontra t-terroriżmu (informazzjoni ġenerali)