Kunsill Trasport, Telekomunikazzjoni u Enerġija (Telekomunikazzjoni), 08/06/2018, 8 ta' Ġunju 2018

Riżultati ewlenin

Il-Kunsill qabel dwar approċċ ġenerali rigward Att dwar iċ-Ċibersigurtà propost. Il-proposta għandha l-għan li toħloq qafas taċ-ċertifikazzjoni taċ-ċibersigurtà madwar l-UE kollha għall-prodotti u s-servizzi tat-teknoloġiji tal-informazzjoni u tal-komunikazzjoni (ICT), u li tgħolli l-istatus tal-Aġenzija tal-Unjoni Ewropea dwar is-Sigurtà tan-Netwerks u l-Informazzjoni (ENISA) għal aġenzija permanenti tal-UE għaċ-ċibersigurtà.

Aħna lkoll irridu li l-apparati tagħna jkunu sikuri. Dan il-qafas ġdid ta' ċertifikazzjoni ser iżid il-fiduċja u l-kunfidenza f'soluzzjonijiet diġitali innovattivi. Ivaylo Moskovski, il-Ministru għat-Trasport, it-Teknoloġija tal-Informazzjoni u l-Komunikazzjoni tal-Bulgarija.

• L-UE ser toħloq qafas komuni ta' ċertifikazzjoni taċ-ċibersigurtà u ssaħħaħ l-aġenzija tagħha – il-Kunsill jaqbel dwar il-pożizzjoni tagħha (stqarrija għall-istampa, 08/06/2018)

Il-ministri kellhom dibattitu ta' orjentazzjoni dwar proposta biex jiġu aġġornati r-regoli tal-privatezza għall-komunikazzjonijiet elettroniċi (privatezza elettronika). L-iskop tal-abbozz ta’ regolament huwa li jiġi żgurat livell għoli ta’ protezzjoni tal-ħajja privata, il-komunikazzjonijiet u d-data personali fis-settur tal-komunikazzjoni elettronika, u biex jinħolqu kundizzjonijiet ekwi għal fornituri ta’ servizzi differenti.

Il-ministri kellhom ukoll dibattitu ta' orjentazzjoni dwar abbozz ta' direttiva biex jiġi promoss l-użu mill-ġdid tal-informazzjoni tas-settur pubbliku. L-għan tal-proposta huwa li ssaħħaħ l-ekonomija tad-data tal-UE billi jiżdied l-ammont tad-data tas-settur pubbliku disponibbli għall-użu mill-ġdid, filwaqt li tiżgura l-kompetizzjoni ġusta u tinkoraġġixxi l-innovazzjoni transkonfinali bbażata fuq id-data. Id-diskussjoni ser tiggwida l-ħidma futura fuq il-proposta.

Barra minn hekk, il-presidenza infurmat lill-ministri dwar l-aħħar żviluppi rigward kodiċi Ewropew għall-komunikazzjonijiet elettroniċi u mandat aġġornat għall-Korp ta' Regolaturi Ewropej tal-Komunikazzjonijiet Elettroniċi (BEREC). Il-presidenza laħqet ftehim proviżorju mal-Parlament Ewropew dwar iż-żewġ proposti fil-5 ta' Ġunju.

Il-presidenza aġġornat ukoll lill-ministri dwar l-abbozz ta' regolament dwar il-moviment liberu ta' data mhux personali. L-objettiv huwa li jintlaħaq qbil mal-Parlament sal-aħħar ta' Ġunju.

• Ir-riforma taċ-ċibersigurtà fl-Ewropa (informazzjoni ġenerali)
• Suq uniku diġitali għall-Ewropa (informazzjoni ġenerali)
• Kodiċi għall-Komunikazzjonijiet Elettroniċi (informazzjoni ġenerali)