Suq uniku diġitali għall-Ewropa

Il-Kunsill adotta konklużjonijiet li jindirizzaw firxa wiesgħa ta' kwistjonijiet marbutin mal-implimentazzjoni tal-istrateġija diġitali tal-UE. L-oqsma koperti mill-konklużjonijiet jinkludu:

• il‑konnettività
• il-ktajjen tal-valur diġitali
• is-Saħħa elettronika
• l-ekonomija tad-data
• l-intelliġenza artifiċjali
• il-pjattaformi diġitali

It-test jenfasizza wkoll l-impatt tat-trasformazzjoni diġitali fuq il-ġlieda kontra l-pandemija, u r-rwol kritiku tagħha fl-irkupru ta' wara l-COVID-19.

It-trasformazzjoni diġitali mhux biss ser tgħin biex tiġi indirizzata l-kriżi tas-saħħa li għaddejja bħalissa, iżda ser tkun ukoll mutur ewlieni għall-irkupru ekonomiku, it-tkabbir ekoloġiku u l-awtonomija strateġika tal-UE. Oleg Butković, Ministru għall-Baħar, it-Trasport u l-Infrastruttura tal-Kroazja, presidenza tal-Kunsill

L-UE qed tintroduċi regoli ġodda li ser jipprovdu lin-negozji b'ambjent online aktar trasparenti, ġust u prevedibbli, kif ukoll sistema effiċjenti biex ifittxu kumpens jew tiswija.

Il-Kunsill adotta regolament li jindirizza r-relazzjonijiet bejn pjattaformi u negozji online.

Il-pjattaformi online koperti mir-regolament jinkludu:

• postijiet tas-suq online
• ħwienet online ta' applikazzjonijiet tas-software u/jew media soċjali online

Il-magni tat-tiftix online huma inklużi wkoll - irrispettivament mill-post fejn huma stabbiliti - dment li jservu lill-utenti kummerċjali li huma stabbiliti fl-UE u li joffru prodotti jew servizzi lill-konsumaturi li jinsabu wkoll fl-UE.

Il-Kunsill adotta konklużjonijiet dwar il-futur ta' Ewropa b'diġitalizzazzjoni għolja wara l-2020. Id-dokument relatat huwa intitolat "Tingħata spinta lill-kompetittività diġitali u ekonomika mal-Unjoni kollha u lill-koeżjoni diġitali''.

Il-konklużjonijiet jenfasizzaw il-prijoritajiet u l-isfidi ewlenin għal Ewropa b’saħħitha, kompetittiva, innovattiva u diġitalizzata ħafna. Huma jirreferu għal:

• appoġġ għall-innovazzjoni u inkoraġġiment tat-teknoloġiji diġitali Ewropej ewlenin
• ħarsien tal-prinċipji u l-valuri etiċi fl-intelliġenza artifiċjali
• tisħiħ tal-kapaċitajiet taċ-ċibersigurtà tal-Ewropa
• titjib tal-ħiliet elettroniċi
• żvilupp tas-soċjetà tal-gigabits, inkluż 5G

Huma jenfasizzaw ukoll il-ħtieġa li jiżdied l-għadd ta' nisa fis-settur u li l-gruppi vulnerabbli kollha jkunu jistgħu jgawdu mill-benefiċċji tad-diġitalizzazzjoni - sabiex ħadd ma jitħalla barra.

L-UE qed tagħmel ammont kbir ta' data li għandu s-settur pubbliku disponibbli aktar faċilment biex terġa' tintuża bħala materja prima għall-intelliġenza artifiċjali, il-blockchain u avvanzi oħra fit-teknoloġiji diġitali.

Illum, il-Kunsill adotta regoli ġodda dwar data miftuħa u l-użu mill-ġdid ta' data tas-settur pubbliku. Dan mistenni li jsaħħaħ l-ekonomija tad-data tal-UE billi:

• jikkontribwixxi għall-iżvilupp ta’ soċjetà bbażata fuq id-data
• jistimula t-tkabbir u l-ħolqien ta’ impjiegi fis-setturi kollha tal-ekonomija

L-att legali issa ser jiġi ppubblikat fil-Ġurnal Uffiċjali tal-UE. Hija ser tidħol fis-seħħ 20 jum wara l-pubblikazzjoni. L-istati membri mbagħad ser ikollhom sentejn żmien biex jinkorporaw id-dispożizzjonijiet tagħha fil-liġi nazzjonali tagħhom.

L-UE qed taġġorna r-regoli tagħha dwar id-drittijiet tal-awtur biex ikunu adattati għall-ambjent diġitali tal-lum.

F’dan is-sens, il-Kunsill adotta direttiva li twitti t-triq lejn suq uniku diġitali veru. Ir-regoli l-ġodda jiżguraw protezzjoni adegwata għall-awturi u l-artisti, filwaqt li jiftħu possibbiltajiet ġodda għall-aċċess u l-kondiviżjoni ta’ kontenut online protett bid-drittijiet tal-awtur fl-Unjoni Ewropea kollha.

Id-direttiva tindirizza kwistjonijiet varji, li jistgħu jinġabru flimkien taħt tliet kategoriji:

• adattament tal-eċċezzjonijiet tad-drittijiet tal-awtur għall-ambjent diġitali u transfruntier
• titjib ta' prattiki ta' ħruġ ta' liċenzji biex ikun żgurat aċċess aktar mifrux għall-kontenut kreattiv
• post tas-suq li jiffunzjona tajjeb għad-drittijiet tal-awtur

Wara l-firma u l-pubblikazzjoni tad-direttiva fil-Ġurnal Uffiċjali tal-UE, l-istati membri ser ikollhom 24 xahar biex jittrasponu r-regoli l-ġodda fil-liġi nazzjonali tagħhom.

L-UE qed tappoġġa d-diġitalizzazzjoni tal-ekonomiji u s-soċjetajiet tagħha bl-istabbiliment ta' programm ġdid ta' finanzjament għall-2021 sal-2027, Ewropa Diġitali.

L-ambaxxaturi għall-UE kkonfermaw il-fehim komuni li ntlaħaq bejn il-presidenza Rumena u l-Parlament Ewropew dwar il-proposta. Hija għandha l-għan tippromwovi l-introduzzjoni u l-adozzjoni fuq skala wiesgħa ta' teknoloġiji diġitali ewlenin bħall-intelliġenza artifiċjali u l-għodod taċ-ċibersigurtà.

Il-fehim komuni jeskludi kwistjonijiet relatati mal-baġit jew kwistjonijiet oħra li qed jiġu diskussi bħala parti min-negozjati dwar il-qafas finanzjarju pluriennali (QFP) li jmiss tal-UE għall- 2021-2027.

L-UE qed tintroduċi regoli ġodda li joffru lin-negozji ambjent ta' pjattaforma online aktar trasparenti, ġust u prevedibbli.

Illum, l-ambaxxaturi għall-UE approvaw il-qbil proviżorju milħuq fit-13 ta' Frar mal-Parlament Ewropew dwar abbozz ta' regolament li jindirizza r-relazzjonijiet bejn il-pjattaformi online u n-negozji.

L-għan prinċipali tar-regolament huwa li jistabbilixxi qafas legali li jiggarantixxi termini u kondizzjonijiet trasparenti għall-utenti kummerċjali ta' pjattaformi online.

L-UE qed taġġorna r-regoli dwar id-drittijiet tal-awtur biex ittejjeb id-drittijiet ta' dawk li joħolqu l-kontenut, tiċċara l-qafas legali għall-pjattaformi ta' kondiviżjoni tal-kontenut u tiffaċilita l-edukazzjoni elettronika, fost affarijiet oħra. Il-presidenza tal-Kunsill laħqet qbil proviżorju mal-Parlament Ewropew.

Ammonti vasti ta' data miżmuma mis-settur pubbliku, bħal data meteoroloġika u ambjentali, ser ikunu disponibbli aktar malajr u faċilment għall-ħolqien ta' prodotti u servizzi ġodda.

L-ambaxxaturi għall-UE kkonfermaw il-ftehim bejn il-presidenza tal-Kunsill u l-Parlament Ewropew dwar riforma li ser timmodernizza r-regoli tal-UE dwar l-użu mill-ġdid tad-data tas-settur pubbliku. Dan ser ikompli jistimula l-innovazzjoni diġitali, speċjalment fil-qasam tal-intelliġenza artifiċjali.

L-UE ddeċidiet li tirrevedi r-regoli tal-liġi tal-kumpaniji tagħha ħalli jibqgħu adatti għall-iskop tagħhom fl-era diġitali. L-għan hu li tinkiseb aktar effiċjenza, trasparenza u ċertezza legali permezz tal-użu ta' għodod diġitali.

Il-presidenza tal-Kunsill laħqet qbil proviżorju mal-Parlament Ewropew dwar abbozz ta' direttiva li ser tiffaċilita l-użu ta' soluzzjonijiet online fil-kuntatti ta' kumpanija mal-awtoritajiet pubbliċi matul iċ-ċiklu tal-ħajja tagħha.

L-UE qiegħda żżid id-disponibbiltà u l-użu mill-ġdid ta' data ffinanzjata pubblikament. Dan ser jikkontribwixxi b'mod sinifikanti għall-kompetittività tal-ekonomija Ewropea tad-data. Ser jistimula wkoll l-iżvilupp ta' teknoloġiji avvanzati bħall-intelliġenza artifiċjali u l-cloud computing.

Il-presidenza laħqet qbil preliminari mal-Parlament Ewropew dwar regoli ġodda maħsuba biex:

• iżidu l-provvista ta' data biex tappoġġa l-ekonomija u soċjetà moderna bbażata fuq id-data
• tippromwovi l-użu ta' data miftuħa fl-UE

Il-qbil preliminari tal-lum għad irid jiġi approvat mill-Kunsill.

L-ambaxxaturi għall-UE approvaw il-qbil proviżorju dwar ir-riforma tar-regoli ta' governanza ta' .eu. Dan il-qbil intlaħaq mill-presidenza tal-Kunsill mal-Parlament Ewropew fil-5 ta' Diċembru.

.eu hu l-isem tad-dominju tal-internet tal-ogħla livell tal-UE li taħtu kull persuna, organizzazzjoni jew negozju bbażat fl-UE – u dalwaqt iċ-ċittadini Ewropej li jgħixu barra l-UE wkoll – jistgħu jirreġistraw l-isem tad-dominju tagħhom. Huwa kkunsidrat bħal element essenzjali fil-bini ta' identità online Ewropea.

L-UE qed tieħu passi biex tagħmel il-programmi tat-televiżjoni u tar-radju online aktar faċilment disponibbli fit-territorju kollu tagħha. Il-Kunsill u l-Parlament Ewropew laħqu qbil proviżorju dwar id-direttiva futura.

Id-direttiva ser tipprovdi lill-utenti fi kwalunkwe stat membru tal-UE għażla usa' ta' programmi tat-televiżjoni u tar-radju online li joriġinaw f'pajjiżi oħra tal-UE. Din ser tagħmel dan billi tiffaċilita l-liċenzjar ta' materjal f'dawn il-programmi protett bid-drittijiet tal-awtur.

L-UE qed timmodernizza r-regoli dwar il-liġi tal-kumpaniji sabiex tagħmilhom adattati għall-iskop fl-era diġitali.

L-ambaxxaturi tal-istati membri qablu dwar regoli ġodda li ser jiffaċilitaw l-użu ta' għodod diġitali u proċessi online fil-kuntatti ta' kumpanija mal-awtoritajiet pubbliċi matul iċ-ċiklu ta' ħajja tagħha.

L-UE qed tistabbilixxi programm ġdid ta' finanzjament, Ewropa Diġitali, li għandu jiġi varat fl-2021 biex jappoġġa t-trasformazzjoni diġitali tas-soċjetajiet u l-ekonomiji tal-Ewropa.

Il-Kunsill qabel dwar il-pożizzjoni tiegħu ("approċċ ġenerali parzjali") rigward il-proposta, li għandha l-għan li żżid l-iskjerament fuq skala kbira ta' teknoloġiji diġitali ewlenin u li tħeġġeġ l-użu tagħhom.

L-UE qed tintroduċi regoli ġodda li ser joffru lill-utenti kummerċjali fl-UE ambjent ta' pjattaformi online aktar trasparenti, ġust u prevedibbli. Ser iġibu wkoll sistema effettiva biex wieħed ifittex kumpens jew riparazzjoni.

Ir-regolament propost huwa l-ewwel att leġislattiv tal-UE li jindirizza r-relazzjonijiet bejn il-pjattaformi online u n-negozji li jużawhom.

Illum il-Kunsill approva r-riforma li mistennija tnaqqas l-ostakli għall-moviment liberu ta' data mhux personali fl-UE.

Ir-regoli l-ġodda huma mfassla biex jagħtu spinta lill-ekonomija tad-data u l-iżvilupp ta' teknoloġiji emerġenti bħal pereżempju sistemi awtonomi transfruntiera u intelliġenza artifiċjali.

L-UE qed tagħmel aktar faċli l-użu mill-ġdid tad-data miżmuma mis-settur pubbliku. L-ambaxxaturi għall-UE qablu dwar il-pożizzjoni tal-Kunsill għan-negozjati dwar riformi li jikkontribwixxu għall-isforzi usa' tal-UE biex tiżdied il-provvista ta' data li ser tappoġġa l-ekonomija.

Pereżempju, ir-regoli l-ġodda ser:

• jinkoraġġixxu l-iżvilupp u l-użu ta' teknoloġiji ġodda bbażati fuq id-data bħall-intelliġenza artifiċjali
• jikkontribwixxu biex jifirxu l-aċċessibbiltà tad-data miftuħa fl-UE

Ir-regoli l-ġodda tal-UE ser joħolqu kundizzjonijiet ekwivalenti ta' kompetizzjoni bejn it-televiżjoni tradizzjonali u servizzi ġodda bħax-xandir on-demand.

Għall-ewwel darba l-pjattaformi għall-kondiviżjoni ta' videos ser ikunu soġġetti għal regoli li jiżguraw li l-ispettaturi, u b'mod partikolari l-minorenni, ser ikunu protetti aħjar minn kontenut vjolenti jew ta' ħsara jew diskors ta' mibegħda.

Il-Kunsill adotta d-direttiva l-ġdida fis-6 ta' Novembru. Dan huwa l-aħħar pass fil-proċess leġislattiv.

Il-pożizzjoni maqbula tal-Kunsill għandha l-għan li tagħmel id-dominju .eu aktar trasparenti filwaqt li testendi wkoll id-dritt ta' reġistrazzjoni għal ċittadini tal-UE li jgħixu barra mill-UE.

Barra minn hekk, din ir-reviżjoni proposta tallinja mar-regolament ġenerali dwar il-protezzjoni tad-data (GDPR).

Bi kważi erba' miljun reġistrazzjoni, id-dominju tal-ogħla livell .eu huwa wieħed mill-akbar dominji internazzjonali tal-ogħla livell ta' kodiċi ta' pajjiżi. Huwa jikkontribwixxi għal ambjent online sikur u sigur u jiżgura preżenza pan-Ewropea fis-suq diġitali globali.

• Regoli aġġornati għad-dominju tal-ogħla livell .eu: Il-Kunsill jaqbel dwar il-pożizzjoni tiegħu (stqarrija għall-istampa, 24/10/2018)
• Regolament ġenerali dwar il-protezzjoni tad-data (informazzjoni ġenerali)

Illum il-Kunsill adotta regolament li jistabbilixxi portal diġitali uniku. Dan ġie wara qbil li ntlaħaq mal-Parlament Ewropew f'Ġunju.

Il-portal il-ġdid ser jagħti aċċess għal informazzjoni online u proċeduri, assistenza u s-servizzi ta' soluzzjoni għall-problemi lill-individwi u l-kumpaniji.

Il-portal diġitali uniku ser ikun għodda b'saħħitha oħra li tkun disponibbli għall-individwi u n-negozji li qed iħaddmu l-libertà ta' moviment u stabbiliment tagħhom fi stat membru ieħor. L-aċċess online għall-informazzjoni u l-proċeduri ser isir faċilment disponibbli għal kulħadd bl-istess mod. Margarete Schramböck, Ministru Federali Awstrijak għall-Affarijiet Diġitali u Ekonomiċi

L-ambaxxaturi għall-UE llum approvaw qbil biex jiġi stabbilit portal diġitali uniku li ser jipprovdi aċċess għall-informazzjoni online dwar is-suq intern tal-UE. Il-Presidenza Bulgara tal-Kunsill u l-Parlament Ewropew kienu preċedentement laħqu dan il-qbil.

Il-portal diġitali uniku ser jaġixxi bħala punt ta' dħul faċli biex jintuża mill-utent li għandu jkun ta' għajnuna għaċ-ċittadini u l-kumpaniji biex isibu informazzjoni dwar suġġetti bħax-xogħol, l-irtirar, l-istudju jew attivitajiet kummerċjali f'pajjiż ieħor tal-UE.

Il-Kunsill laħaq qbil dwar l-abbozz ta' direttiva li għandha l-għan li tadatta r-regoli dwar id-drittijiet tal-awtur għall-ambjent diġitali.

Dan il-qbil ser iservi ta' mandat biex jinbdew in-negozjati mal-Parlament Ewropew.

Il-pożizzjoni tal-Kunsill tiffoka fuq aspetti bħal:

• il-protezzjoni tal-pubblikazzjonijiet tal-istampa - billi jinħoloq dritt ġdid li jirreferi għall-użu online
• id-diskrepanza fil-valur tar-remunerazzjoni - billi jinkiseb il-bilanċ it-tajjeb bejn il-ħlasijiet lill-awturi u l-qligħ tal-pjattaformi fuq l-internet
• il-kooperazzjoni bejn id-detenturi tad-drittijiet u l-fornituri li jikkondividu kontenut - billi jiġi rregolat li fornituri bħal dawn għandhom jiksbu awtorizzazzjoni mid-detenturi tad-drittijiet.

L-UE qed tagħti spinta lill-kummerċ-e billi tagħmilha iktar faċli biex il-konsumaturi u n-negozji jqabblu l-prezzijiet differenti tal-konsenji fl-Unjoni kollha. Ir-regolaturi ser ikollhom ukoll aktar setgħat biex jimmonitorjaw dan is-suq kumpless. Il-Kunsill adotta r-regoli l-ġodda wara li ntlaħaq qbil proviżorju mal-Parlament Ewropew fit-13 ta' Diċembru 2017.

Dan huwa l-ikkompletar ta' element ieħor tas-suq uniku diġitali tal-UE.

"Permezz ta' dawn ir-regoli l-informazzjoni dwar l-alternattivi differenti għall-konsenja tal-pakketti - inkluż servizzi ta' traċċar u rintraċċar - ser tkun iktar faċilment disponibbli." Ivaylo Moskovski, il-Ministru Bulgaru għat-Trasport, it-Teknoloġija tal-Informazzjoni u l-Komunikazzjoni

Il-Kunsill jadotta regolament biex jipprojbixxi l-imblukkar ġeografiku mhux ġustifikat fis-suq intern.

L-imblukkar ġeografiku huwa prattika diskriminatorja li tipprevjeni lill-klijenti online milli jaċċessaw jew jixtru prodotti jew servizzi minn sit web ibbażat fi stat membru ieħor.

Il-liġi l-ġdida ser tneħħi l-ostakli għall-kummerċ elettroniku billi tiġi evitata d-diskriminazzjoni bbażata fuq in-nazzjonalità, il-post tar-residenza jew il-post ta' stabbiliment tal-konsumaturi.

L-Unjoni Ewropea qed tiżviluppa regoli ġodda li jippermettu li data mhux personali tiċċaqlaq liberament u faċilment bejn il-fruntieri tal-pajjiżi.

L-ambaxxaturi għall-UE qablu dwar mandat għall-presidenza biex jibdew negozjati mal-Parlament Ewropew dwar din il-proposta. L-għan tagħha huwa li tagħti spinta lill-ekonomija tad-data tal-UE billi titneħħa kwalunkwe restrizzjoni mhux ġustifikata fuq il-post ġeografiku għall-ħżin jew l-ipproċessar tad-data.

Fl-istess ħin, il-liġi l-ġdida ser tiżgura li l-awtoritajiet ikollhom aċċess għal data maħżuna jew ipproċessata fi stat membru ieħor sabiex dawn ikunu jistgħu jwettqu dmirijiethom.

Fi ftit kliem, ir-regoli l-ġodda ser joħolqu suq uniku għal servizzi ta' ħżin u ta' pproċessar ta' data, bħall-cloud computing.

Illum l-ambaxxaturi għall-UE approvaw regoli ġodda biex jittejbu s-servizzi ta' konsenja transfruntiera tal-pakketti billi t-tariffi jsiru aktar trasparenti u billi r-regolaturi jingħataw aktar setgħat biex jissorveljaw is-suq.

Il-presidenza laħqet qbil proviżorju dwar l-abbozz ta' regolament mal-Parlament Ewropew fit-13 ta' Diċembru.

L-ambaxxaturi għall-UE llum qablu rigward il-pożizzjoni tal-Kunsill dwar proposta biex jiġu ffaċilitati t-trażmissjonijiet u r-ritrażmissjonijiet diġitali ta' programmi tat-televiżjoni u tar-radju fis-suq intern.

Din il-pożizzjoni sservi bħala mandat għall-Kunsill biex jidħol f'negozjati mal-Parlament Ewropew.

"Id-drittijiet tal-awtur jistgħu jkunu kumplessi u diffiċli biex jinftiehmu, iżda l-għan tagħna b'dan ir-regolament huwa sempliċi: li ċ-ċittadini jingħataw aċċess aħjar għal programmi tar-radju u tat-televiżjoni minn pajjiżi oħra. Biex jintlaħaq dan, jenħtieġ li nagħmluha aktar faċli għax-xandara li jikklerjaw id-drittijiet neċessarji." Urmas Reinsalu, Ministru għall-Ġustizzja tal-Estonja

Il-proposta għandha l-għan li tipprovdi tixrid usa' tal-programmi tat-televiżjoni u tar-radju li joriġinaw fi stati membri tal-UE oħra għall-benefiċċju tal-utenti. Dan jista' jinkiseb billi jiġi ffaċilitat il-liċenzjar ta' materjal protett bid-drittijiet tal-awtur li jinsabu f'tali programmi awdjoviżivi.

B'dan il-mod, l-UE tissodisfa għan ewlieni ieħor tas-suq uniku diġitali: l-iżgurar ta' aċċess online mtejjeb għal programmi tat-televiżjoni u tar-radju fl-UE kollha.

Il-Presidenza Estonjana llum laħqet qbil proviżorju mal-Parlament Ewropew dwar regoli ġodda sabiex tagħmel aktar trasparenti t-tariffi ta' konsenja transfruntiera tal-pakketti. Din l-inizjattiva tagħti wkoll aktar setgħat lir-regolaturi biex jissorveljaw is-suq tal-konsenja transfruntiera tal-pakketti.

Rati ta' konsenja transfruntiera aktar trasparenti ser iħeġġu lill-konsumaturi jagħżlu minn firxa usa' ta' prodotti u jixtru aktar online. Ser joffru wkoll possibbiltajiet ġodda għall-bejjiegħa bl-imnut, speċjalment għal negozji żgħar li m'għandhomx is-setgħa li jinnegozjaw rati aħjar.

Il-Kunsill adotta l-pożizzjoni tiegħu dwar it-twaqqif ta' portal diġitali uniku li jipprovdi informazzjoni, proċeduri u assistenza online liċ-ċittadini u l-kumpaniji.

Din il-pożizzjoni - approċċ ġenerali - tippermetti l-bidu ta' negozjati mal-Parlament Ewropew.

Il-portal diġitali uniku ser jintegra diversi netwerks u servizzi li twaqqfu fil-livell nazzjonali u tal-UE biex jassistu liċ-ċittadini u lin-negozji fl-attivitajiet transfruntieri tagħhom. Dawn jinkludu: iċ-Ċentri Ewropej tal-Konsumaturi, il-Pariri tal-Ewropa Tiegħek, SOLVIT, il-Helpdesk għad-Drittijiet ta' Proprjetà Intellettwali, Europe Direct u n-Netwerk Enterprise Europe.

"Jenħtieġ li nagħmluha aktar faċli li n-nies u l-kumpaniji tagħna jsibu l-informazzjoni li jeħtieġu, kulfejn jgħixu, jaħdmu jew jagħmlu negozju fl-UE. Il-ħolqien ta' punt uniku ta' servizz online huwa mod konvenjenti kif isir dan. Huwa pass ġdid lejn id-diġitalizzazzjoni transfruntiera tas-servizzi pubbliċi u pass ieħor fil-proċess biex l-Ewropa diġitali ssir realtà." Kadri Simson, Ministru għall-Affarijiet Ekonomiċi u l-Infrastruttura tal-Estonja

Il-Kunsill adotta regolament biex tissaħħaħ il-kooperazzjoni bejn l-awtoritajiet nazzjonali tal-UE responsabbli għall-infurzar tal-liġijiet dwar il-protezzjoni tal-konsumatur.

Protezzjoni effettiva tal-konsumatur jeħtieġ li tirrispondi għall-isfidi tal-ekonomija diġitali u l-iżvilupp tal-kummerċ bl-imnut transfruntier fl-UE.

Huwa għalhekk li r-regolament il-ġdid għandu l-għan li jimmodernizza l-mekkaniżmi tal-kooperazzjoni biex tkompli titnaqqas il-ħsara kkawżata lill-konsumaturi minn ksur transfruntier tal-liġi tal-UE dwar il-konsumaturi.

Ir-regoli l-ġodda ser jgħinu biex tiżdied il-fiduċja fil-kummerċ elettroniku fost iċ-ċittadini u l-kumpaniji. Din ir-reviżjoni tal-qafas eżistenti tal-kooperazzjoni għall-protezzjoni tal-konsumatur tagħti aktar setgħat lill-awtoritajiet nazzjonali, bħala parti mill-iżvilupp tas-suq uniku diġitali.

Il-presidenza Estonjana tal-Kunsill u l-Parlament Ewropew laħqu qbil dwar il-projbizzjoni tal-imblukkar ġeografiku mhux ġustifikat.

L-abbozz ta' regolament dwar l-imblukkar ġeografiku, li jeħtieġ jiġi adottat miż-żewġ istituzzjonijiet, għandu l-għan li jneħħi d-diskriminazzjoni bbażata fuq in-nazzjonalità, il-post tar-residenza u l-post tal-istabbiliment tal-konsumaturi.

L-imblukkar ġeografiku huwa prattika diskriminatorja li tipprevjeni lill-klijenti online milli jaċċessaw jew jixtru prodotti jew servizzi minn sit web ibbażat fi stat membru ieħor.

Il-ministri enfasizzaw il-ħtieġa għall-pajjiżi kollha tal-UE li jagħmlu disponibbli r-riżorsi u l-investimenti meħtieġa biex jindirizzaw iċ-ċibersigurtà. Huma laqgħu wkoll serje ta' pjanijiet konkreti bħal:

• it-twaqqif ta' netwerk ta' ċentri ta' kompetenza fiċ-ċibersigurtà madwar l-UE
• l-introduzzjoni ta' qafas Ewropew għaċ-ċertifikazzjoni taċ-ċibersigurtà
• l-għoti tal-għodda tal-infurzar tal-liġi sabiex tiġi indirizzata ċ-ċiberkriminalità
• l-iżvilupp ta' rispons ikkoordinat għal inċidenti ċibernetiċi fuq skala kbira fil-livell tal-UE

Il-Kunsill enfasizza wkoll ir-rabta importanti bejn il-fiduċja fl-Ewropa diġitali u l-ksib tar-reżiljenza ċibernetika madwar l-UE.

• L-UE ser issaħħaħ iċ-ċibersigurtà (stqarrija għall-istampa, 20/11/2017)
• Kunsill Affarijiet Ġenerali, 20/11/2017

L-ewwel iffirmar elettroniku ta' att leġislattiv tal-UE sar fil-25 ta' Ottubru fil-Parlament Ewropew fi Strasburgu. Il-President tal-PE Antonio Tajani u Matti Maasikas, tal-Presidenza Estonjana tal-Kunsill, iffirmaw b'mod elettroniku r-regolament rivedut dwar is-sigurtà tal-provvista tal-gass, biex b'hekk twittiet it-triq għad-dħul fis-seħħ tiegħu.

Din iċ-ċerimonja turi li l-istituzzjonijiet tal-UE qed jaħdmu flimkien sabiex it-trasformazzjoni diġitali ssir realtà. Turi l-impenn li għandha l-UE biex timplimenta l-"eIDAS", ir-regolament għall-UE kollha li jipprevedi ambjent regolatorju prevedibbli sabiex ikunu jistgħu jsiru interazzjonijiet elettroniċi sikuri u mingħajr xkiel bejn in-negozji, iċ-ċittadini u l-awtoritajiet pubbliċi.

"Ninsab konvint li dan huwa l-mod kif aħna dalwaqt ser niffirmaw l-atti legali kollha tagħna, sempliċiment għaliex jagħmel sens. Il-firma elettronika tiffranka l-karti, il-ħin u l-flus." Matti Maasikas, Presidenza Estonjana tal-Kunsill

Il-Kunsill Telekomunikazzjoni impenja ruħu li jagħti spinta lill-ħidma dwar is-suq uniku diġitali tal-UE sabiex tiġi żgurata t-tlestija tal-istrateġija sal-aħħar tal-2018.

Bħala parti minn dan il-proċess, il-ministri stabbilixxew l-objettiv li jintlaħaq qbil - sal-aħħar tal-2017 - dwar tliet inizjattivi importanti: l-imblukkar ġeografiku, il-media awdjoviżiva u l-konsenja ta' pakketti.

Il-Kunsill Ewropew enfasizza li huwa "lest jagħmel dak kollu meħtieġ biex l-Ewropa ssir diġitali", filwaqt li jibni fuq il-konklużjonijiet tas-Summit Diġitali ta' Tallinn tad-29 ta' Settembru.

Il-mexxejja eżaminaw kif l-UE tista' taħtaf l-opportunitajiet u tindirizza l-isfidi li jirriżultaw mid-diġitalizzazzjoni. Huma qablu dwar sensiela ta' prijoritajiet bħal:

• li l-gvernijiet u s-setturi pubbliċi jidħlu b'mod sħiħ fl-era diġitali
• li titlesta l-istrateġija għal suq uniku diġitali sa tmiem l-2018
• li jinbena netwerk ta' infrastruttura u komunikazzjoni tal-ogħla livell
• li jiġi adottat approċċ komuni għaċ-ċibersigurtà
• li jiżdiedu l-isforzi biex jiġu miġġielda t-terroriżmu u l-kriminalità online
• li tinkiseb sistema ta' tassazzjoni effettiva u ġusta li tixraq lill-era diġitali.

• Kunsill Ewropew, 19-20/10/2017
• Konklużjonijiet tal-Kunsill Ewropew, 19/10/2017

Il-Kunsill ta l-approvazzjoni finali sabiex l-UE tisponsorja punti ta' aċċess għal internet mingħajr fili bla ħlas f'postijiet pubbliċi.

Taħt l-iskema ġdida, bl-isem WiFi4EU, portal multilingwi li huwa faċilment rikonoxxibbli ser jipprovdi aċċess għal konnessjoni sigura ta' veloċità għolja f'mill-inqas 6000 komunità lokali madwar l-UE sal-2020. Urve Palo, il-Ministru għall-Intraprenditorija u t-Teknoloġija tal-Informazzjoni tal-Estonja, qal:

"L-iskema WiFi4EU ser tagħmel aktar aċċessibbli internet ta' kwalità għolja għal ħafna ċittadini. Ser tagħti l-opportunità lill-muniċipalitajiet lokali, il-libreriji u korpi pubbliċi oħra biex jippromwovu s-servizzi diġitali tagħhom."

L-ewwel sejħa għal proġetti ser titnieda lejn tmiem is-sena jew kmieni fl-2018.

Il-finanzjament totali tal-UE għall-iskema jista' jilħaq €120 miljun sal-2019.

Il-mexxejja tal-UE ltaqgħu fis-Summit Diġitali ta' Tallinn biex jiddiskutu t-triq 'il quddiem biex jintlaħqu l-prijoritajiet stabbiliti mill-istrateġija għal suq uniku diġitali tal-UE.

Il-President tal-Kunsill Ewropew Donald Tusk iddeskrivih bħala "avveniment ferm speċjali għall-futur tal-Ewropa". Donald Tusk żied jgħid li d-diskussjonijiet ta' Tallinn ser jintużaw bħala bażi għall-konklużjonijiet tal-Kunsill Ewropew ta' Ottubru.

Kellna dan is-summit għaliex l-Ewropa trid tuża l-opportunitajiet maħluqa minn avvanzi kbar, fl-oqsma kollha mir-robotika sal-intelliġenza artifiċjali. Jeħtieġ li nsawru b'mod attiv il-futur tagħna u nimmaniġġaw ir-riskji għas-soċjetajiet u d-demokraziji tagħna minħabba r-rivoluzzjoni diġitali. Donald Tusk, President tal-Kunsill Ewropew

Il-Kunsill Ewropew enfasizza l-importanza globali ta' viżjoni diġitali ambizzjuża għas-soċjetà u l-ekonomija tal-Ewropa. Fid-dawl tas-Summit Diġitali ta' Tallinn tad-29 ta' Settembru, il-mexxejja tal-UE appellaw għall-implimentazzjoni sħiħa tal-istrateġija għal suq uniku diġitali:

"Jenħtieġ approċċ olistiku għal dak li hu diġitali biex jiġu ffaċċati l-isfidi tar-raba' rivoluzzjoni industrijali u jintużaw l-opportunitajiet li jirriżultaw minnha."

Il-mexxejja tal-UE laqgħu wkoll l-intenzjoni tal-Kummissjoni Ewropea li tagħmel rieżami tal-istrateġija taċ-ċibersigurtà u li tipproponi azzjoni ulterjuri qabel tmiem is-sena.

• Konklużjonijiet tal-Kunsill Ewropew, 22-23 ta' Ġunju 2017
• Kunsill Ewropew, 22-23/06/2017

Il-presidenza Maltija laħqet qbil preliminari mal-Parlament Ewropew sabiex tissaħħaħ il-kooperazzjoni bejn l-awtoritajiet nazzjonali tal-UE dwar l-infurzar tal-liġijiet għall-ħarsien tal-konsumatur.

It-temi ewlenin involuti:

• il-ġlieda kontra l-ksur transfruntier - ir-reviżjoni tal-kooperazzjoni attwali għall-ħarsien tal-konsumatur ser tagħti aktar setgħat lill-awtoritajiet nazzjonali
• il-fiduċja tal-konsumatur fil-kummerċ elettroniku - l-awtoritajiet pubbliċi tal-infurzar għandhom iżidu l-armonizzazzjoni u jistabbilixxu kooperazzjoni effettiva
• l-immodernizzar tal-ħarsien tal-konsumatur - il-proposta relatata tal-Kummissjoni ta' Mejju 2016 inkludiet riforma tal-konsenja transfruntiera tal-pakketti.

Il-fiduċja fil-kummerċ elettroniku miċ-ċittadini u l-kumpaniji hija kondizzjoni essenzjali biex is-suq uniku diġitali jsir aktar attraenti u dinamiku. Il-ħarsien tad-drittijiet u l-interessi tal-konsumaturi ser ikun ippreservat aħjar. Chris Cardona, il-Ministru għall-Ekonomija, Investiment u Intrapriżi Żgħar ta' Malta

Mill-15 ta' Ġunju 2017, it-tariffi tar-roaming ma baqgħux japplikaw fl-Unjoni Ewropea. Din il-kisba ġiet deskritta bħala ''tassew storja Ewropea ta' suċċess'' f'dikjarazzjoni konġunta maħruġa mill-Presidenza Maltija tal-Kunsill tal-Unjoni Ewropea, il-Parlament Ewropew u l-Kummissjoni Ewropea.

Minn issa 'l quddiem, iċ-ċittadini li jivvjaġġaw fl-UE ser ikunu jistgħu jċemplu, jibagħtu test u jagħmlu kuntatt permezz tal-apparat mobbli tagħhom bl-istess prezz li jħallsu f'pajjiżhom. It-tneħħija tat-tariffi tar-roaming hija waħda mill-akbar u mill-aktar suċċessi tanġibbli tal-UE. It-tmiem tat-tariffi tar-roaming huwa fil-qofol tas-Suq Uniku Diġitali tal-UE u huwa pass ieħor lejn il-bini ta' soċjetà diġitali Ewropea magħquda u sostenibbli, li tkun aċċessibbli għaċ-ċittadini kollha tagħna. Joseph Muscat, il-Prim Ministru ta' Malta f'isem il-Presidenza Maltija tal-Kunsill tal-Unjoni Ewropea, Antonio Tajani, il-President tal-Parlament Ewropew, Jean-Claude Juncker, il-President tal-Kummissjoni Ewropea

Il-Presidenza Maltija laħqet qbil mal-Parlament Ewropew dwar skema sponsorjata mill-UE, "WiFi4EU", biex tippromwovi internet mingħajr ħlas fl-uffiċċji muniċipali, sptarijiet, ġonna pubbliċi u f'postijiet pubbliċi oħra.

Skont l-iskema, muniċipalitajiet, libreriji, sptarijiet u korpi pubbliċi oħrajn ser ikunu jistgħu japplikaw għal finanzjament għall-installazzjoni ta’ punti ta' aċċess lokali bla fili permezz ta’ proċeduri amministrattivi sempliċi. Ser jiġu pprovduti għodod ta' finanzjament sempliċi, bħal kupuni, biex ikopru sa 100% tal-ispejjeż eliġibbli. Il-korp pubbliku nnifsu ser ikun responsabbli għaż-żamma tal-konnessjoni għal mhux inqas minn tliet snin.

L-objettiv huwa li jintlaħaq qbil dwar il-baġit tal-iskema, u li l-ħidma teknika tiġi ffinalizzata fil-ħin sabiex l-iskema tkun daħlet fis-seħħ sa tmiem l-2017.

WiFi4EU ser jagħmel l-internet b'veloċità għolja disponibbli għal ħafna ċittadini li mingħajr l-iskema jista' ma jkollhomx l-opportunità li jesperjenzaw konnettività ta' kwalità għolja. Emmanuel Mallia, il-Ministru Malti għall-Kompetittività u l-Ekonomija Diġitali, Marittima u tas-Servizzi

Il-Kunsill Kompetittività qabel dwar abbozz ta' regolament biex jiġi pprojbit l-imblukkar ġeografiku mhux ġustifikat bejn l-istati membri. L-għan ewlieni tal-proposta huwa li tipprevjeni d-diskriminazzjoni għall-konsumaturi jew il-kumpaniji fir-rigward tal-aċċess għall-prezzijiet, il-bejgħ jew il-kondizzjonijiet ta' pagament meta jinxtraw prodotti jew servizzi f'pajjiż ieħor tal-UE.

Ladarba l-Parlament Ewropew jaqbel dwar il-pożizzjoni tiegħu, ser jibdew negozjati bejn il-Kunsill, il-Parlament u l-Kummissjoni.

Il-konklużjonijiet tal-Kunsill Ewropew appellaw lill-ministri biex jirrapportaw kull sena dwar il-progress fl-approfondiment tas-suq uniku, inkluż l-aġenda diġitali tiegħu, minn Ġunju 2017 'il quddiem.

Ir-rieżami ta' monitoraġġ li jmiss mill-mexxejja tal-UE huwa skedat għas-summit tal-UE f'Ġunju 2018.

Ir-regolament ġenerali dwar il-protezzjoni tad-data daħal fis-seħħ u ser japplika mill-25 ta' Mejju 2018. Ir-regolament il-ġdid jipprovdi bażi legali speċifika għall-protezzjoni tad-data personali, rikonoxxuta fit-Trattat tal-2009 ta' Lisbona bħala dritt fundamentali skont il-liġi tal-UE.

Ir-riforma tal-protezzjoni tad-data twieġeb għall-iżviluppi teknoloġiċi rapidi fil-fluss u l-kondiviżjoni tad-data billi tistabbilixxi d-drittijiet, l-obbligi u r-regoli ta' konformità għal individwi u entitajiet involuti fl-ipproċessar ta' data.

Fil-5 ta' Mejju 2016, daħlet fis-seħħ ukoll id-direttiva dwar il-protezzjoni tad-data personali proċessata għall-iskop tal-infurzar tal-liġi kriminali. L-istati membri għandhom sas-6 ta' Mejju 2018 biex jittrasponu d-direttiva fil-liġi nazzjonali.

Din id-direttiva twieġeb ħtieġa dejjem tikber li l-awtoritajiet fl-istati membri jipproċessaw u jiskambjaw data bħala parti mill-ġlieda kontra l-kriminalità transnazzjonali u t-terroriżmu. Għaldaqstant għandha l-għan li tħares id-drittijiet tal-individwi filwaqt li tiggarantixxi livell għoli ta' sigurtà pubblika.

Dawn il-bidliet qed isiru bil-ħsieb li jiġu aġġornati r-regoli tad-direttiva tal-1995 dwar il-protezzjoni tad-data u d-deċiżjoni qafas tal-2008 dwar il-protezzjoni tad-data fil-kooperazzjoni ġudizzjarja u tal-pulizija.

Il-mexxejja tal-UE wrew l-appoġġ tagħhom għall-istrateġija għal suq uniku diġitali u qalu li għandha tintuża biex jiġi promoss tkabbir inklużiv f'kull reġjun tal-UE. Huma ħeġġew li tittieħed azzjoni biex tiġi indirizzata l-frammentazzjoni tas-suq, tinbena l-infrastruttura diġitali meħtieġa u tiġi promossa d-diġitalizzazzjoni tal-industrija Ewropea.

Il-mexxejja tal-UE appellaw ukoll għal adozzjoni rapida ta' regoli ġodda dwar it-telekomunikazzjoni, iċ-ċibersigurtà u l-protezzjoni tad-data.

Il-ministri għat-telekomunikazzjoni ddiskutew l-istrateġija għas-suq uniku diġitali f'laqgħa tal-Kunsill TTE fil-11 u t-12 ta' Ġunju 2015. Huma laqgħu l-objettivi tagħha u tennew l-importanza ta' ekonomija diġitalizzata li tippromwovi l-impjiegi u t-tkabbir u li ssaħħaħ il-kompetittività tal-UE.

Il-kwistjonijiet enfasizzati mill-ministri inkludew:

• ir-rwol tad-diġitalizzazzjoni biex tistimula l-intraprenditorija u t-tkabbir tal-SMEs
• il-ħtieġa li tissaħħaħ iċ-ċibersigurtà u li tinbena l-fiduċja fis-servizzi elettroniċi
• il-ħtieġa ta' infrastruttura aħjar u ta' titjib fl-aċċess għall-broadband għaċ-ċittadini kollha
• il-ħtieġa li l-prezzijiet għall-konsenji tal-pakketti jsiru aktar trasparenti fl-UE kollha

Il-ministri ssottolinjaw ukoll li għandu jkun hemm koordinazzjoni tajba fil-livell nazzjonali biex ikun żgurat li l-istrateġija tiġi implimentata b'mod effettiv.

Il-ministri għall-kompetittività ssottolinjaw l-importanza ta' għadd ta' inizjattivi fl-ambitu tal-istrateġija għal suq uniku diġitali. Huma enfasizzaw ir-regoli adatti għall-ħtieġa tad-drittijiet tal-awtur, l-aġġornament tar-regoli tal-kummerċ elettroniku, u t-tisħiħ tal-fiduċja, l-għarfien u l-protezzjoni tal-konsumatur.

Il-ministri saħqu wkoll dwar il-bżonn ta' azzjoni biex jissaħħu l-ħiliet diġitali u r-regoli tal-protezzjoni tad-data.

Huma identifikaw sensiela ta' prijoritajiet:

• li jinħolqu l-kondizzjonijiet adatti għan-negozji żgħar u ta' daqs medju, speċjalment in-negozji l-ġodda
• li tiġi promossa d-diġitalizzazzjoni tal-industrija Ewropea
• li tiġi applikata u estiża l-governanza elettronika fl-amministrazzjoni pubblika
• li jiżdiedu l-investimenti fl-infrastruttura u n-netwerks diġitali
• li jiġi vvalutat l-impatt tar-regoli fiskali fuq l-għodod diġitali
• li jiġi kkunsidrat li kull leġislazzjoni ġdida tal-UE tkun ibbażata fuq il-prinċipju ta' 'awtomatikament diġitali'.

Il-ministri għall-kultura ddiskutew l-aspetti awdjoviżivi tal-istrateġija għal suq uniku diġitali. Huma appoġġaw il-portabbiltà transfruntiera tal-kontenut, il-ġlieda kontra l-kontenut illegali u l-ħtieġa li jinstab il-bilanċ adatt dwar id-drittijiet tal-awtur.

Il-ministri qablu li d-direttiva attwali dwar is-servizzi tal-media awdjoviżiva għandha tiġi adattata għall-bidliet teknoloġiċi. Dan ir-rieżami għandu:

• jiggarantixxi l-libertà tal-media u l-promozzjoni tad-diversità kulturali
• iżomm il-prinċipju tal-pajjiż tal-oriġini (kull fornitur tas-servizzi tal-media awdjoviżiva jaqa' taħt il-ġurisdizzjoni ta' stat membru wieħed biss)
• jissimplifika l-proċedura li jsegwu l-istati membri meta jkunu l-mira ta' kontenut mhux aċċettabbli li jkun ġej minn stat membru ieħor.