Kunsill Trasport, Telekomunikazzjoni u Enerġija (Enerġija), 11/06/2018, 11 ta' Ġunju 2018

Riżultati ewlenin

Regolament dwar l-ACER

Waqt sessjoni pubblika, il-Kunsill laħaq qbil dwar il-pożizzjoni tiegħu rigward ir-regolament dwar l-ACER, l-Aġenzija tal-UE għall-Kooperazzjoni tar-Regolaturi tal-Enerġija. Mill-ħolqien tagħha fl-2011, l-ACER tejbet il-koordinazzjoni bejn ir-regolaturi tal-enerġija f'dak li jikkonċerna kwistjonijiet transkonfinali. Il-grilja tal-elettriku tal-Unjoni hija interkonnessa mill-qrib u qed jiżdied il-bżonn li l-pajjiżi ġirien jikkooperaw biex iżommu l-istabbiltà tal-grilja u jintegraw volumi kbar ta' enerġiji rinnovabbli. Kompetenzi u kompiti regolatorji ġodda għandhom jingħataw lill-aġenzija biss dment li jiġi ggarantit l-involviment xieraq tal-istati membri.

Il-parti "Enerġija" tal-Kunsill tal-UE qablet dwar test għal approċċ ġenerali dwar il-proposta għal reviżjoni tar-Regolament tal-Parlament Ewropew u tal-Kunsill dwar l-istabbiliment ta' Aġenzija tal-UE għall-Kooperazzjoni tar-Regolaturi tal-Enerġija. Il-proposta għar-reviżjoni tar-regolament dwar l-ACER hija l-aħħar att legali tal-Pakkett Enerġija Nadifa għall-Ewropej Kollha, li fl-aħħar il-Kunsill laħaq approċċ ġenerali dwaru. Il-Presidenza Bulgara qed taħdem bla heda biex issib soluzzjonijiet ta' kompromess għad-diversi pożizzjonijiet li tqajmu mid-delegazzjonijiet bil-ħsieb li jinkiseb bilanċ xieraq fit-test. L-ilħuq ta' approċċ ġenerali hija opportunità biex tiġi deskritta l-pożizzjoni preliminari tal-Kunsill bħala bażi għat-tħejjija tan-negozjati mal-Parlament Ewropew. Temenuzhka Petkova, Ministru għall-Enerġija tal-Bulgarija

Governanza tal-Unjoni tal-Enerġija, direttiva dwar l-enerġija rinnovabbli u direttiva dwar l-effiċjenza tal-enerġija

Waqt sessjoni pubblika, il-Kunsill ħa nota tal-informazzjoni mill-presidenza dwar is-sitwazzjoni attwali rigward it-tliet fajls tal-pakkett enerġija nadifa dwar il-governanza, l-enerġija rinnovabbli u l-effiċjenza fl-użu tal-enerġija. Minn Frar 'il hawn saru total ta' ħdax-il trilogu. In-negozjati mal-Parlament Ewropew issa daħlu fi stadju avvanzat. Il-kwistjonijiet pendenti ewlenin li għad jeħtieġu qbil huma l-livell tal-miri, il-kontribuzzjonijiet u t-trajettorji.

Relazzjonijiet esterni dwar l-enerġija

Il-ministri kellhom l-opportunità li jisimgħu preżentazzjoni mill-Kummissjoni dwar ir-relazzjonijiet esterni dwar l-enerġija, li kienet tkopri l-Eġittu, l-Ukrajna, il-Balkani tal-Punent, l-Iran, il-Forum Ministerjali dwar l-Enerġija Nadifa u l-Missjoni Innovazzjoni.

Il-presidenza Awstrijaka li jmiss

Id-delegazzjoni Awstrijaka ddeskriviet il-programm ta' ħidma u l-prijoritajiet tagħha fil-qasam tal-politika dwar l-enerġija għas-sitt xhur li jmiss.