Kunsill Trasport, Telekomunikazzjoni u Enerġija (Enerġija), 16 ta' Ġunju 2025

Riżultati ewlenin

Pjan direzzjonali REPowerEU

Il-ministri kellhom skambju ta' fehmiet dwar il-pjan direzzjonali REPowerEU, ippubblikat mill-Kummissjoni Ewropea fis-6 ta' Mejju 2025. Il-pjan direzzjonali jiddeskrivi disa' azzjonijiet ewlenin bil-għan tat-tneħħija sħiħa tal-enerġija Russa - gass, żejt u nukleari - mis-swieq tal-UE. Fil-pjan tħabbru wkoll mill-inqas ħames proposti leġiżlattivi, li l-Kummissjoni ppjanat li tadotta sal-aħħar ta' Ġunju 2025.

Il-biċċa l-kbira tad-delegazzjonijiet laqgħu l-pjan direzzjonali REPowerEU, u l-objettivi għall-iżgurar tas-sigurtà tal-provvista u l-eliminazzjoni gradwali tad-dipendenza mir-Russja. Ħafna delegazzjonijiet stennew b'interess l-ewwel proposti leġiżlattivi li ġejjin, mistennija din il-ġimgħa, u ssottolinjaw il-ħtieġa għal approvazzjoni rapida. Diversi stati membri appellaw għal bażi legali robusta biex tiġi evitata litigazzjoni legali b'mod partikolari għal kuntratti fit-tul. Madankollu, l-istati membri jissottolinjaw l-isfidi li stati membri differenti jridu jiffaċċaw minħabba ċ-ċirkostanzi speċifiċi tagħhom (jiġifieri stati membri mingħajr kosta, jew stati membri iżolati). Ħafna minnhom enfasizzaw il-ħtieġa li tingħata spinta lill-investimenti fis-sorsi tal-enerġija rinnovabbli, fl-interkonnessjonijiet u fl-infrastrutturi tal-grilja u tal-ħżin. Għall-eliminazzjoni gradwali tal-fjuwils nukleari, xi stati membri appellaw għal approċċ progressiv.

• Komunikazzjoni tal-Kummissjoni: Pjan direzzjonali lejn tmiem l-importazzjoni tal-enerġija Russa

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Konklużjonijiet tal-Kunsill Ewropew (24 u 25 ta' Marzu 2022)
• REPowerEU (informazzjoni ġenerali)

Kif il-pajjiżi tal-UE jikkooperaw biex jiżguraw provvista tal-enerġija sostenibbli u affordabbli

Tisħiħ tal-unjoni tal-enerġija permezz tar-rinfurzar tas-sigurtà tal-enerġija

Wara l-iskambju ta' fehmiet dwar il-pjan direzzjonali RepowerEU, il-presidenza Pollakka adottat konklużjonijiet tal-presidenza, bl-appoġġ ta' 25 stat membru, dwar it-tisħiħ tal-Unjoni tal-Enerġija permezz tar-rinfurzar tas-sigurtà tal-enerġija. Il-konklużjonijiet tal-presidenza jenfasizzaw li l-Unjoni Ewropea qed tavvanza trasformazzjoni komprensiva tas-sistemi tal-enerġija tagħha biex tiżgura l-kompetittività, l-affordabbiltà, is-sostenibbiltà u s-sigurtà.

Fil-qalba ta' dan l-isforz hemm it-twettiq sħiħ tal-Unjoni tal-Enerġija, inkluż it-tnaqqis tad-dipendenzi strateġiċi tal-UE f'setturi sensittivi, l-investimenti fl-infrastruttura u s-simplifikazzjoni regolatorja. Dawn l-azzjonijiet għandhom l-għan li jibnu suq tal-enerġija reżiljenti, nadif u interkonness li jissalvagwarda lill-konsumaturi u jsaħħaħ l-awtonomija strateġika tal-Ewropa.

• Konklużjonijiet tal-presidenza dwar it-tisħiħ tal-Unjoni tal-Enerġija permezz tar-rinfurzar tas-sigurtà tal-enerġija, 16 ta' Ġunju 2025
• Il-prezzijiet tal-enerġija u s-sigurtà tal-provvista (informazzjoni ġenerali)

Affarijiet oħra

Fit-taqsima "affarijiet oħra" tal-Kunsill, il-ministri ġew infurmati bil-punti li ġejjin:

• il-Kummissjoni infurmat lill-ministri dwar il-valutazzjoni tal-Pjanijiet Nazzjonali għall-Enerġija u l-Klima aġġornati finali
• il-Kummissjoni infurmat ukoll lill-ministri dwar il-Programm Indikattiv Nukleari (PINC)
• il-kwistjoni tal-kompetizzjoni inġusta fis-settur Ewropew tal-bijokarburanti (mitluba mid-delegazzjoni Awstrijaka, Bulgara, Ċeka u Latvjana)
• sejħa għall-inklużjoni tal-protezzjoni u r-reżiljenza tal-infrastruttura kritika tal-enerġija fost il-prijoritajiet ewlenin li jsawru l-Qafas Finanzjarju Pluriennali li jmiss (mitluba mid-delegazzjoni Estonjana, Latvjana u Litwana)
• id-delegazzjoni Bulgara, Ċeka, Griega, Rumena, Slovakka, Slovena u Ungeriża infurmaw lill-ministri dwar l-isfidi fl-implimentazzjoni tar-Regolament dwar il-Metan
• id-delegazzjoni Slovena infurmat lill-ministri dwar il-Laqgħa Ministerjali MED9 tal-ministri għall-Enerġija u l-Ambjent
• il-programm ta' ħidma tal-presidenza li jmiss fil-qasam tal-enerġija.