"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Trasport, Telekomunikazzjoni u Enerġija (Telekomunikazzjoni), 6 ta' Ġunju 2025
Riżultati ewlenin
Telekomunikazzjoni
Pjan ta' azzjoni tal-UE għall-ġestjoni ta' kriżijiet ċibernetiċi
Illum qed nieħdu pass deċiżiv 'il quddiem biex insaħħu r-reżiljenza taċ-ċibersigurtà tal-Ewropa. Il-pjan ta' azzjoni tal-UE għall-ġestjoni ta' kriżijiet ċibernetiċi jiċċara kif l-istati membri jistgħu jidentifikaw u jwieġbu għal inċidenti taċ-ċibersigurtà u kriżijiet ċibernetiċi fuq skala kbira li jistgħu jolqtu lill-UE kollha, u kif jistgħu jirkupraw u jitgħallmu minnhom. Il-pjan ta' azzjoni juri l-impenn ċar tagħna għal Ewropa aktar sikura, aktar reżiljenti u mħejjija aħjar – prijorità importanti tal-presidenza Pollakka.
Krzysztof Gawkowski, Viċi Prim Ministru, Ministru għall-Affarijiet Diġitali
Il-ministri għat-telekomunikazzjoni adottaw il-pjan ta' azzjoni tal-UE għall-ġestjoni ta' kriżijiet ċibernetiċi, li jipprovdi gwida għal kif l-UE għandha twieġeb għal inċidenti taċ-ċibersigurtà jew kriżijiet ċibernetiċi fuq skala kbira.
Ir-rakkomandazzjoni dwar pjan ta' azzjoni tal-UE għaċ-ċibersigurtà huwa linja gwida importanti biex l-istati membri jtejbu l-livell ta' tħejjija, il-kapaċitajiet ta' indentifikazzjoni u r-rispons tagħhom għal inċidenti ta' ċibersigurtà, jibnu fuq il-pedamenti stabbiliti mill-pjan ta' azzjoni tal-2017 għaċ-ċibersigurtà u jimplimentaw il-leġiżlazzjoni adottata reċentement, bħad-direttiva NIS2 u l-att dwar iċ-ċibersolidarjetà.
Il-pjan ta' azzjoni tal-UE għaċ-ċibersigurtà għandu l-għan li jindirizza xenarju dejjem aktar kumpless ta' theddid ċibernetiku billi jsaħħaħ in-networks eżistenti tal-UE, irawwem il-kooperazzjoni bejn l-istati membri u l-atturi involuti, u jegħleb l-ostakli li jista' jkun hemm.
Il-ministri approvaw konklużjonijiet dwar konnettività affidabbli u reżiljenti. F'dawn l-aħħar snin, il-konnettività Ewropea kienet soġġetta għal sfidi bla preċedent. Filwaqt li s-sigurtà nazzjonali tibqa' responsabbiltà tal-istati membri, approċċ komprensiv u strateġiku għall-iżvilupp tal-infrastruttura tal-konnettività Ewropea huwa essenzjali biex jiġu indirizzati dawk l-isfidi.
Il-konklużjonijiet, għaldaqstant, jagħtu inventarju tal-miżuri possibbli biex tissaħħaħ ir-reżiljenza tan-network, bħad-diversifikazzjoni tat-tipi ta' networks, l-interoperabbiltà jew ir-rwol tas-suq uniku biex jiġu mobilizzati l-investimenti. It-test iqiegħed enfasi qawwija fuq miżuri marbuta mas-satelliti, kif ukoll elementi ta' infrastruttura taħt il-baħar.
Konnettività satellitari u awtonomija strateġika tal-UE
Il-ministri kellhom skambju ta' fehmiet dwar il-konnettività satellitari bħala element kostitwenti għall-awtonomija strateġika. Filwaqt li l-enfasi tal-UE kienet primarjament fuq l-infrastrutturi terrestri (eż. 4G/5G, fibra), l-iskoperti teknoloġiċi naqqsu l-ispejjeż tal-bini u tal-illanċjar ta' satelliti.
Matul l-iskambju ta' fehmiet il-ministri enfasizzaw li l-konnettività bis-satellita tifforma komponent kruċjali tal-arkitettura tas-sigurtà tal-UE u n-networks ta' komunikazzjoni tagħha, speċjalment bħala alternattiva għan-networks fuq l-art. Huwa kruċjali li jiġi żgurat li l-UE jkollha n-network satellitari reżiljenti tagħha, b'mod partikolari fi żminijiet ta' inċertezza ġeopolitika. Diversi sistemi, bħas-satelliti u s-sistemi spazjali, il-kejbils taħt il-baħar, in-networks fissi u l-infrastruttura mobbli jiżguraw din il-konnettività u jitolbu approċċ komprensiv.
Ambjent regolatorju prevedibbli huwa essenzjali biex tingħata spinta lill-innovazzjoni u tiġi ġestita l-effiċjenza tal-ispettru. Regoli armonizzati għall-aċċess għas-suq u biex jiġu żgurati kundizzjonijiet ekwi jistgħu jagħtu spinta lill-innovazzjoni.
Affarijiet oħra
Ir-roaming mal-Ukrajna u l-Moldova (mill-Kummissjoni Ewropea)
Il-Kummissjoni ppreżentat is-sitwazzjoni attwali tal-proċess biex l-Ukrajna u l-Moldova jingħaqdu maż-żona ta' "roaming daqslikieku f'pajjiżek" (RLAH), li diġà tiżgura li l-Ewropej ikunu jistgħu jċemplu, jibagħtu messaġġi u jużaw data mobbli kullimkien fl-UE mingħajr spejjeż żejda.
Il-Kummissjoni infurmat li wara n-notifika ta' abbozz ta' liġi adottat reċentement mill-Ukrajna, dalwaqt ser tipproponi valutazzjoni u proposta li jistgħu jwasslu biex l-Ukrajna tingħaqad maż-żona RLAH mill-2026. Għall-Moldova, valutazzjoni u proposta simili jistgħu jiġu ppreżentati dalwaqt ukoll.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Eżiti tal-inizjattivi dwar is-simplifikazzjoni regolatorja (mill-presidenza Pollakka)
Taħt "affarijiet oħra", il-presidenza Pollakka ppreżentat rapport dwar l-eżiti tad-diskussjonijiet dwar l-inizjattivi li ħadet dwar is-suġġett ta' simplifikazzjoni regolatorja possibbli fil-qasam diġitali.
Ir-rapport tal-presidenza għandu l-għan li jippreżenta r-rakkomandazzjonijiet li jitqajmu bl-aktar frekwenza u dawk appoġġati b'mod ġenerali fil-qasam tas-simplifikazzjoni regolatorja, bl-għan li tingħata ħarsa rappreżentattiva ġenerali lejn il-perspettivi tal-partijiet ikkonċernati. Għandu l-għan li jidentifika għadd ta' duplikazzjonijiet regolatorji u inkonsistenzi, sfidi esperjenzati b'rabta mal-implimentazzjoni tal-leġiżlazzjoni u sfidi oħra esperjenzati mill-partijiet ikkonċernati.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
