L-UE u l-Organizzazzjoni Dinjija tal-Kummerċ

X'inhi d-WTO?

L-Organizzazzjoni Dinjija tal-Kummerċ (WTO) hija l-korp dinji responsabbli għar-regoli kummerċjali internazzjonali fil-livell multilaterali. L-objettiv ġenerali tad-WTO huwa li tespandi l-kummerċ bħala mezz kif jogħlew l-istandards tal-għajxien, jinħolqu l-impjiegi u titjieb ħajjet in-nies.

Imwaqqfa fl-1995, id-WTO hija s-suċċessur tal-Ftehim Ġenerali dwar it-Tariffi u l-Kummerċ (GATT) li rriżulta min-negozjati ta' wara t-Tieni Gwerra Dinjija dwar il-kooperazzjoni ekonomika internazzjonali.

Illum, il-ftehimiet tad-WTO jkopru diversi oqsma tal-kummerċ internazzjonali, inkluż:

• il-kummerċ tal-merkanzija
• il-kummerċ fis-servizzi
• il-protezzjoni tal-proprjetà intellettwali

• Id-WTO fil-qosor (Organizzazzjoni Dinjija tal-Kummerċ)

Funzjonijiet ewlenin tad-WTO

Id-WTO għandha tliet funzjonijiet ewlenin:

Taġixxi bħala forum għan-negozjati kummerċjali u tistabbilixxi r-regoli għall-kummerċ internazzjonali

Id-WTO sservi ta' forum fejn il-membri jinnegozjaw ir-regoli kummerċjali.

Issolvi t-tilwim kummerċjali

Meta jaħsbu li ġew miksura r-regoli tad-WTO, il-membri jużaw is-sistema multilaterali biex isolvu t-tilwim minflok jieħdu azzjoni unilaterali.

Tissorvelja l-politiki kummerċjali tal-membri

Id-WTO tirrieżamina l-politiki kummerċjali nazzjonali regolarment, biex ittejjeb it-trasparenza u tivvaluta l-impatt tagħhom.

Il-ftehimiet kollha tad-WTO huma bbażati fuq sett ta' prinċipji komuni li jirfdu s-sistema kummerċjali multilaterali:

• kummerċ mingħajr diskriminazzjoni (billi jiġu segwiti l-prinċipji tat-trattament tan-nazzjon l-aktar iffavorit u tat-trattament nazzjonali)
• tnaqqis gradwali tal-ostakli kummerċjali permezz ta' negozjati
• prevedibbiltà aċċertata permezz ta' rabtiet u trasparenza
• promozzjoni tal-kompetizzjoni ġusta
• inkoraġġiment tal-iżvilupp u r-riforma ekonomika

Id-WTO hija l-fokus ewlieni tal-UE fil-politika kummerċjali multilaterali tagħha, u r-regoli tad-WTO jiffurmaw il-bażi għar-relazzjonijiet kummerċjali tal-UE. Arranġamenti kummerċjali oħra tal-UE, bħal ftehimiet ta' kummerċ ħieles, jibnu fuq ir-regoli tad-WTO.

• Prinċipji kummerċjali

Objettivi tal-UE

L-objettivi tal-UE bħala parti mid-WTO huma li:

• issostni u ttejjeb il-kummerċ ibbażat fuq ir-regoli permezz ta' WTO riformata u msaħħa
• iżżomm is-sistema kummerċjali dinjija miftuħa, ġusta, prevedibbli u bbażata fuq regoli komuni
• timmodernizza d-WTO u tagħmilha adatta għall-iskop tagħha biex il-kummerċ u l-investiment tal-UE jkunu jistgħu jkomplu jibbenefikaw minnha
• tiżgura li membri oħra jirrispettaw ir-regoli wkoll, fost oħrajn billi tiġi restawrata sistema għas-soluzzjoni ta' tilwim li tiffunzjona sew
• tappoġġa l-integrazzjoni ta' pajjiżi li qed jiżviluppaw fl-ekonomija dinjija
• issaħħaħ l-appoġġ tad-WTO għal politiki kummerċjali sostenibbli madwar id-dinja

Modernizzazzjoni tad-WTO

L-UE kellha rwol ċentrali fl-iżvilupp tas-sistema kummerċjali internazzjonali mit-Tieni Gwerra Dinjija 'l hawn. Bħalissa, l-UE qed tesplora l-possibbiltà li timmodernizza d-WTO biex tagħmel l-organizzazzjoni adatta għall-iskop tagħha fil-kuntest tal-isfidi dejjem akbar għall-kummerċ dinji bbażat fuq ir-regoli.

Ara wkoll