Aġġornament tal-bażi tad-data tal-UE tal-marki tas-swaba'

Il-bażi tad-data tal-Eurodac

Il-bażi tad-data tal-UE tal-marki tas-swaba', il-Eurodac, bħalissa fiha l-marki tas-swaba' tal-applikanti għall-ażil u tal-migranti irregolari li ġew irreġistrati fl-istati membri tal-UE u l-pajjiżi assoċjati.

Il-bażi tad-data tiffaċilita l-implimentazzjoni tar-regolament ta' Dublin billi tgħin biex:

• jiġi vverifikat jekk applikant jew persuna li tkun qed toqgħod fi stat membru illegalment tkunx diġà applikat għall-ażil fi stat membru ieħor
• jiġi ċċekkjat jekk preċedentement applikant kienx inqabad huwa u dieħel fit-territorju Ewropew irregolarment
• jiġu applikati l-kriterji rilevanti għad-determinazzjoni ta' liema stat membru hu responsabbli biex jeżamina applikazzjoni għall-ażil

Karatteristiċi ġodda tal-bażi tad-data

Wara l-aġġornament, il-bażi tad-data tal-Eurodac ser ikollha ħafna karatteristiċi ġodda, li ser jiġbru aktar data biex jippermettu lill-UE tintraċċa aħjar il-movimenti irregolari.

Personalizzazzjoni:

reġistrazzjoni ta' persuni individwali li qed ifittxu l-ażil, minflok applikazzjonijiet

ġbir ta' data bijometrika addizzjonali, bħax-xbieha tal-wiċċ, u data personali, bħall-isem, id-data tat-twelid, in-nazzjonalità, kopja tad-dokumenti tal-identità u d-data tal-applikazzjoni

ġbir ta' data bijometrika obbligatorju għal persuni mill-età ta' sitt snin 'il fuq

Espansjoni tal-ambitu għal kategoriji ġodda:

persuni risistemati skont skemi ta' risistemazzjoni nazzjonali jew tal-UE

benefiċjarji ta' protezzjoni temporanja (għalkemm id-data tagħhom tinħażen biss sakemm idum dak l-istatus)

persuni li nqabdu b'rabta mal-qsim irregolari ta' fruntiera esterna tal-UE, kif ukoll persuni żbarkati wara operazzjonijiet ta' tiftix u salvataġġ

Karatteristiċi ta' sigurtà:

f'ċirkostanzi definiti b'mod ċar, l-istati membri ser ikunu jistgħu jirreġistraw il-fatt li ċittadin ta' pajjiż terz jista' jkun ta' theddida għas-sigurtà, u din is-sinjalazzjoni ta' sigurtà tkun tista' titneħħa biss f'konsultazzjoni ma' stati membri oħra

l-aċċess għall-awtoritajiet tal-infurzar tal-liġi ser jiġi ssimplifikat

Ħżin tad-data:

perjodi differenti ta' ħżin għal kategoriji differenti ta' individwi

id-data dwar l-applikanti għall-protezzjoni internazzjonali ser tibqa' maħżuna għal 10 snin

id-data dwar persuni ammessi skont skemi ta' risistemazzjoni u persuni li jinstabu li daħlu irregolarment jew qed joqogħdu illegalment fl-UE ser tibqa' maħżuna għal ħames snin

Ir-rwol tas-sistemi tal-IT fis-sigurtà tal-fruntieri tal-UE

L-awtoritajiet madwar l-UE jaqsmu informazzjoni permezz ta' sistemi tal-IT fuq skala kbira biex jipproteġu liċ-ċittadini, jiġġieldu l-kriminalità u jipprovdu sigurtà fil-fruntieri. Minbarra l-bażi tad-data tal-Eurodac hemm ukoll sistemi oħra tal-IT li jgħinu biex tinżamm is-sigurtà tal-fruntieri tal-UE.

Sistema ta' informazzjoni ta' Schengen

L-awtoritajiet tal-infurzar tal-liġi madwar l-UE jużaw is-sistema ta' informazzjoni ta' Schengen (SIS) biex idaħħlu jew jikkonsultaw allerti dwar persuni jew oġġetti mfittxija jew nieqsa.

Sistema ta' dħul/ħruġ

Fil-5 ta' Marzu 2025, il-Kunsill qabel dwar approċċ ġenerali għall-introduzzjoni gradwali tas-Sistema ta' Dħul/Ħruġ (EES) fuq perjodu ta' sitt xhur. Dan jippermetti lill-istati membri jibbenefikaw mis-sistema filwaqt li jagħti lill-awtoritajiet tal-fruntieri u lill-industrija tat-trasport żmien biex jaġġustaw.

Ir-regolament iqis il-ħtiġijiet differenti tal-istati membri.

• Il-Kunsill jistabbilixxi pożizzjoni għat-tnedija progressiva ta' sistema diġitali ġdida għall-ġestjoni tal-fruntieri
• Sistemi tal-IT għall-ġlieda kontra l-kriminalità u għas-sigurtà tal-fruntieri tal-UE (informazzjoni ġenerali)

Ħidma fuq il-patt dwar il-migrazzjoni u l-ażil

Fl-20 ta' Diċembru 2023, il-Kunsill u l-Parlament Ewropew laħqu ftehim dwar din ir-riforma tal-leġiżlazzjoni dwar il-Eurodac, kif ukoll dwar ħafna fajls oħra fil-patt dwar il-migrazzjoni u l-ażil.

Fit-8 ta' Frar 2024, ir-rappreżentanti tal-istati membri tal-UE approvaw il-ftehim milħuq dwar dawn l-atti leġiżlattivi f'Diċembru, kif ukoll dwar tliet liġijiet li l-Kunsill u l-Parlament kienu diġà ftiehmu dwarhom fl-2022.

Il-Kunsill adotta l-patt tal-UE dwar il-migrazzjoni u l-ażil fl-14 ta' Mejju 2024.

• Ażil u migrazzjoni: il-Kunsill japprova mandati għal negozjati dwar ir-regolament Eurodac u r-regolament dwar l-iskrinjar u 21 stat jadottaw dikjarazzjoni dwar is-solidarjetà (22 ta' Ġunju 2022)
• Il-Kunsill u l-Parlament Ewropew jagħmlu avvanz importanti fir-riforma tas-sistema tal-ażil u l-migrazzjoni tal-UE (stqarrija għall-istampa, 20 ta' Diċembru 2023)
• Ir-riforma tal-ażil u l-migrazzjoni: ir-rappreżentanti tal-istati membri tal-UE japprovaw qbil mal-Parlament Ewropew (stqarrija għall-istampa, 8 ta' Frar 2024)
• Regolament Eurodac, 9 ta' Frar 2024
• Il-Kunsill jadotta l-patt tal-UE dwar il-migrazzjoni u l-ażil (stqarrija għall-istampa, 14 ta' Mejju 2024)