Gwatemala
Is-sħubija bejn l-UE u l-Gwatemala hija mibnija fuq id-djalogu politiku, il-kooperazzjoni u l-kummerċ. L-UE tappoġġa l-isforzi tal-Gwatemala biex issaħħaħ id-demokrazija, tipproteġi d-drittijiet tal-bniedem u tavvanza l-iżvilupp sostenibbli u l-prosperità.
Relazzjonijiet politiċi u drittijiet tal-bniedem
L-UE u l-Gwatemala għandhom sħubija li ilha stabbilita, mirfuda mill-ftehim ta' assoċjazzjoni bejn l-UE u l-Amerka Ċentrali u memorandum ta' qbil bilaterali ffirmat fi Frar 2024.
Il-ftehim ta' assoċjazzjoni jsaħħaħ u jikkonsolida r-relazzjonijiet bejn l-UE u s-sitt pajjiżi tal-Amerka Ċentrali (il-Costa Rica, El Salvador, il-Gwatemala, il-Honduras, in-Nikaragwa u l-Panama). Huwa magħmul minn tliet pilastri: id-djalogu politiku, il-kooperazzjoni u l-kummerċ.
Filwaqt li l-pilastru tal-kummerċ ilu japplika b'mod proviżorju mill-2013, il-ftehim kollu kemm hu daħal fis-seħħ f'Mejju 2024.
- Kunsill ta' Assoċjazzjoni UE-Amerka Ċentrali, 14 ta' Lulju 2025
- UE-Amerka Ċentrali: il-Kunsill japprova l-ftehim ta' assoċjazzjoni (stqarrija għall-istampa, 12 ta' April 2024)
- L-UE u l-Gwatemala jimpenjaw ruħhom li jsaħħu r-relazzjonijiet u jiffirmaw memorandum ta' qbil (Servizz Ewropew għall-Azzjoni Esterna)
Appoġġ għad-demokrazija
L-UE tibqa' impenjata li tappoġġa d-demokrazija u d-drittijiet tal-bniedem fil-pajjiż.
Bi tweġiba għal stedina mit-Tribunal Elettorali Suprem tal-Gwatemala, l-UE bagħtet missjoni ta' osservazzjoni elettorali (MOE tal-UE) biex timmonitorja l-elezzjonijiet ġenerali f'Ġunju u Awwissu 2023, ħaġa li turi l-impenn qawwi tal-UE biex tappoġġa d-demokrazija u l-istat tad-dritt u biex tippromwovi elezzjonijiet inklużivi u trasparenti.
Fl-2024, l-UE adottat qafas iddedikat għal sanzjonijiet fid-dawl tas-sitwazzjoni fil-Gwatemala, biex tappoġġa t-tranżizzjoni demokratika u r-rieda tal-poplu tal-Gwatemala kif espressa fl-għażla tiegħu ta' gvern elett demokratikament.
Is-sanzjonijiet huma mmirati lejn individwi u entitajiet responsabbli għad-dgħajfien tad-demokrazija u l-istat tad-dritt jew għat-tfixkil tat-tranżizzjoni demokratika wara l-elezzjoni ġenerali tal-2023. Dawk sanzjonati huma soġġetti għalprojbizzjonijiet fuq l-ivvjaġġar u ffriżar tal-assi. Barra minn hekk,persuni u entitajiet tal-UE ma jistgħux iqiegħdu fondi għad-dispożizzjoni ta' dawk sanzjonati.
Is-sanzjonijiet ġew imġedda kull sena mill-2024 u ġew estiżi l-aħħar sat-13 ta' Jannar 2027.
Sigurtà u ġlieda kontra l-kriminalità organizzata
L-UE u l-Gwatemala diġà jaħdmu mill-qrib ħafna flimkien fuq kwistjonijiet ta' sigurtà u l-ġlieda kontra l-kriminalità organizzata, fil-kuntest tal-kooperazzjoni reġjonali ma' sħab mill-Amerka Latina u l-Karibew (ALK).
L-UE qed tinvesti pereżempju biex issaħħaħ il-kapaċità tal-pajjiżi ALK fil-ġlieda kontra l-użu u t-traffikar ta' drogi illeċiti permezz tal-mekkaniżmu ta' koordinazzjoni u kooperazzjoni UE-CELAC dwar id-drogi.
Il-Gwatemala tipparteċipa wkoll b'mod attiv f'diversi programmi appoġġati mill-UE:
- EL PACCTO: azzjoni konġunta kontra t-theddid ewlieni marbut mal-kriminalità organizzata tranżnazzjonali
- COPOLAD: sforzi biex jissaħħu l-osservatorji nazzjonali dwar id-drogi u biex jiġu promossi politiki dwar id-drogi bbażati fuq l-evidenza
- Programmi ta' sigurtà reġjonali tal-EUROFRONT: sforzi biex tissaħħaħ is-sigurtà tal-fruntieri fil-Gwatemala
Barra minn hekk, f'Novembru 2025, fis-summit UE-CELAC, l-UE u 18-il pajjiż ALK, inkluż il-Gwatemala, nedew l-Alleanza UE-LAC għas-Sigurtà taċ-Ċittadini, li għandha l-għan li żżid l-isforzi bireġjonali biex jiġu indirizzati l-isfidi komuni għas-sigurtà taċ-ċittadini.
Żvilupp
Il-Gwatemala u l-UE qed jaħdmu flimkien biex jippromwovu t-tkabbir sostenibbli, il-koeżjoni soċjali u l-integrazzjoni reġjonali.
L-UE allokat €193 miljun f'finanzjament bilaterali permezz ta' għotjiet għall-kooperazzjoni mal-Gwatemala għall-2021-2027, ikkomplementati minn programmi u finanzjament imħallat taħt il-Global Gateway.
Il-proġetti prijoritarji jinkludu:
- l-avvanz tat-tranżizzjoni ekoloġika
- it-trawwim tal-innovazzjoni, id-diġitalizzazzjoni u l-ħolqien tal-impjiegi
- is-sikurezza tal-ikel u n-nutrizzjoni
Kummerċ u investiment
Il-Gwatemala hija l-akbar ekonomija fl-Amerka Ċentrali, b'madwar 19-il miljun abitant. L-UE hija alleata ekonomika u ta' żvilupp ewlenija, u tikklassifika fost is-sħab kummerċjali u ta' investiment ewlenin tal-Gwatemala.
Minn mindu ġie applikat proviżorjament il-pilastru tal-kummerċ tal-Ftehim ta' Assoċjazzjoni bejn l-UE u l-Amerka Ċentrali fl-2013, il-kummerċ bilaterali kiber b'mod sinifikanti – żdied aktar mid-doppju f'dawn l-aħħar snin – u dan jirrifletti żieda fl-aċċess għas-suq u fid-diversifikazzjoni.
Multilateraliżmu u dritt internazzjonali
L-UE u l-Gwatemala jiddefendu valuri u prinċipji kondiviżi u jikkondividu impenn qawwi għal multilateraliżmu effettiv u l-primazija tal-integrità territorjali u d-dritt internazzjonali.
F'dan il-kuntest, il-Gwatemala offriet appoġġ konsistenti għal paċi ġusta u sostenibbli fl-Ukrajna u tibqa' soda fil-kundanna tal-invażjoni fuq skala sħiħa tar-Russja.
Barra minn hekk, l-UE u l-Gwatemala jappoġġaw bil-qawwa r-riforma tan-Nazzjonijiet Uniti li tippermetti lill-organizzazzjoni tirrispondi b'mod effettiv għall-isfidi tas-seklu 21.
Ara wkoll
L-aħħar reviżjoni: 31 ta' Lulju 2026