Kronoloġija - Ftehimiet ta' wara l-Brexit

Fil-Kunsill Affarijiet Ġenerali, il-ministri għall-affarijiet tal-UE ddiskutew is-sitwazzjoni attwali tar-relazzjonijiet bejn l-UE u r-Renju Unit, inkluż fir-rigward ta':

• żona sanitarja u fitosanitarja komuni (Ftehim SPS)
• sistema għall-iskambju ta' kwoti tal-emissjonijiet ta' gassijiet serra (ftehim ETS)
• ftehim dwar skema ta' esperjenza għaż-żgħażagħ
• is-sħubija għas-sigurtà u d-difiża
• ftehim dwar il-parteċipazzjoni tar-Renju Unit fis-suq intern tal-elettriku tal-UE (ftehim dwar l-elettriku)
• ftehim dwar il-kontribuzzjoni finanzjarja tar-Renju Unit għat-tnaqqis ta' diversi disparitajiet fl-UE (ftehim ta' koeżjoni)

• Kunsill Affarijiet Ġenerali, 26 ta' Mejju 2026

L-ambaxxaturi għall-UE approvaw ftehim bejn l-UE u r-Renju Unit dwar Ġibiltà, Territorju Brittaniku barra mill-pajjiż li jinsab fil-Peniżola Iberika. Il-ftehim dwar Ġibiltà jikkompleta l-qafas legali tar-relazzjonijiet bejn l-UE u r-Renju Unit stabbilit mill-Ftehim dwar il-Kummerċ u l-Kooperazzjoni.

L-objettiv ewlieni tal-ftehim dwar Ġibiltà huwa li tiġi żgurata l-prosperità futura tar-reġjun. Dan ser isir billi jitneħħew l-ostakli fiżiċi kollha għaċ-ċirkolazzjoni tal-persuni u l-merkanzija bejn Spanja u Ġibiltà, filwaqt li jiġu protetti bis-sħiħ Schengen, is-suq uniku tal-UE, u l-unjoni doganali tagħha.

Il-ftehim mistenni japplika b'mod proviżorju mill-15 ta' Lulju 2026.

• Relazzjonijiet bejn l-UE u r-Renju Unit: l-istati membri japprovaw il-ftehim bejn l-UE u r-Renju Unit dwar Ġibiltà (stqarrija għall-istampa, 1 ta' April 2026)

Il-Kunsill awtorizza formalment lill-Kummissjoni biex tiftaħ negozjati mar-Renju Unit għal ftehim dwar l-elettriku u ieħor dwar il-koeżjoni.

L-għan tal-ftehim dwar l-elettriku huwa li jippermetti lir-Renju Unit jipparteċipa fis-suq intern tal-elettriku tal-UE billi jallinja r-regoli rispettivi, u b'hekk jikkontribwixxi b'mod sinifikanti għas-sigurtà tal-enerġija għaż-żewġ partijiet, speċjalment fit-taqlib ġeopolitiku ta' bħalissa.

Il-ftehim dwar il-kontribuzzjoni finanzjarja tar-Renju Unit favur it-tnaqqis tad-disparitajiet bejn ir-reġjuni tal-UE billi tiżdied il-koeżjoni ekonomika, soċjali u territorjali tal-blokk huwa parti minn politika konsistenti tal-UE li żżewweġ l-għoti ta' aċċess għas-suq lil pajjiż terz ma' kontribuzzjoni finanzjarja ġusta li tirrifletti l-benefiċċji miksuba b'dan l-aċċess.

Il-Kunsill qabel ukoll li jippermetti lir-Renju Unit jipparteċipa fil-programm Erasmus+ tal-UE għas-sena 2027. Id-deċiżjoni tistipula t-termini u l-kundizzjonijiet speċifiċi, inkluż dawk finanzjarji, tal-parteċipazzjoni tar-Renju Unit.

• Relazzjonijiet bejn l-UE u r-Renju Unit: il-Kunsill japprova taħdidiet dwar l-elettriku u l-koeżjoni, kif ukoll il-parteċipazzjoni tar-Renju Unit f'Erasmus+ għall-2027 (stqarrija għall-istampa, 30 ta' Marzu 2026)

Il-Kunsill awtorizza lill-Kummissjoni tiftaħ negozjati mar-Renju Unit dwar ftehim għal żona sanitarja u fitosanitarja (SPS) komuni u ftehim li jikkollega s-sistema tal-UE u dik tar-Renju Unit għall-iskambju ta' kwoti tal-emissjonijiet (ETS) ta' gassijiet serra.

L-għan tal-ftehim SPS huwa li jiffaċilita l-kummerċ ta' prodotti agroalimentari bejn l-UE u r-Renju Unit billi jallinja r-regoli sanitarji u fitosanitarji taż-żewġ partijiet. Dan ikun jinvolvi t-tneħħija tal-ħtieġa għall-biċċa l-kbira taċ-ċertifikati u l-kontrolli fuq l-annimali, il-pjanti u l-prodotti relatati.

Il-ftehim ETS jagħmilha aktar faċli biex jiġu skambjati l-kwoti tal-emissjonijiet u b'hekk jikkontribwixxi għal għanijiet komuni ta' sostenibbiltà. Dan il-ftehim għandu jkopri b'mod komprensiv kif joperaw is-sistemi ETS kollegati u jiddefinixxi s-setturi milquta, bħall-ġenerazzjoni tal-elettriku u tas-sħana industrijali, l-industrija, l-avjazzjoni u t-trasport marittimu. Barra minn hekk, għandu jistabbilixxi proċedura għaż-żieda ta' aktar setturi fil-futur, sabiex tiġi evitata r-rilokazzjoni tal-emissjonijiet tal-karbonju u tiġi żgurata kompetizzjoni ġusta.

Iż-żewġ ftehimiet ser jirriżultaw mill-fehim komuni bejn il-Kummissjoni Ewropea u r-Renju Unit, maqbul fl-ewwel summit bejn l-UE u r-Renju Unit fid-19 ta' Mejju 2025. Ladarba jitlestew in-negozjati, il-Kunsill irid japprova ż-żewġ ftehimiet qabel ma jkunu jistgħu jidħlu fis-seħħ.

• Ir-relazzjonijiet bejn l-UE u r-Renju Unit: Il-Kunsill japprova n-negozjati dwar ftehim agroalimentari u l-kollegament tas-sistemi għall-iskambju ta' kwoti tal-emissjonijiet (stqarrija għall-istampa, 13 ta' Novembru 2025)

Meta ltaqgħu Londra, il-mexxejja tal-UE u tar-Renju Unit qablu dwar sħubija strateġika ġdida, affermaw mill-ġdid l-impenn tagħhom li jindirizzaw kwistjonijiet globali u stabbilew sħubija għas-sigurtà u d-difiża bejn l-UE u r-Renju Unit.

Iż-żewġ naħat reġgħu kkonfermaw ukoll li s-sħubija hija mirfuda mill-ftehim dwar il-ħruġ bejn l-UE u r-Renju Unit, inkluż il-Qafas ta' Windsor, u mill-Ftehim dwar il-Kummerċ u l-Kooperazzjoni. Dawn il-ftehimiet jibqgħu l-pedament, u ż-żewġ naħat ser jiżguraw l-implimentazzjoni sħiħa, f'waqtha u leali tagħhom.

• Summit UE-Renju Unit, 19 ta' Mejju 2025

Il-ministri għall-affarijiet tal-UE ddiskutew ir-relazzjonijiet bejn l-UE u r-Renju Unit bi tħejjija għall-ewwel summit bejn l-UE u r-Renju Unit fid-19 ta' Mejju 2025, b'enfasi fuq oqsma fejn tista' tissaħħaħ il-kooperazzjoni u fuq l-aħjar approċċ għall-protezzjoni kollettiva tal-interessi tal-UE.

Diversi ministri enfasizzaw l-importanza li ssir ħidma ma' sħab tal-istess fehma, bħar-Renju Unit, fil-qasam tas-sigurtà u d-difiża.

• Kunsill Affarijiet Ġenerali, 18 ta' Marzu 2025

Il-ministri għall-affarijiet tal-UE laqgħu x-xewqa tar-Renju Unit li jsaħħaħ il-kooperazzjoni strateġika mal-UE u ssottolinjaw l-importanza li ssir ħidma mar-Renju Unit bħala sieħeb tal-istess fehma u alleat.

Huma esprimew ukoll id-disponibbiltà tagħhom li jibnu fuq il-kooperazzjoni eżistenti, u li jagħmlu dan bħala pakkett. Għal dan l-għan, enfasizzaw il-ħtieġa li jiġi żgurat bilanċ ta' drittijiet u obbligi, l-indiviżibbiltà tal-erba' libertajiet tal-UE u l-awtonomija tal-proċess tat-teħid ta' deċiżjonijiet tagħha.

Filwaqt li fakkru fil-ħtieġa li jiġu implimentati l-ftehimiet eżistenti bejn l-UE u r-Renju Unit, filwaqt li jitqies ukoll il-kuntest ġeopolitiku attwali, il-ministri ddiskutew oqsma ta' prijorità differenti li jistgħu jgħinu biex javvanzaw is-sħubija mar-Renju Unit, inkluż il-politika estera u ta' sigurtà, l-iskambji taż-żgħażagħ, is-sajd u l-enerġija.

• Kunsill Affarijiet Ġenerali, 17 ta' Diċembru 2024

Skont il-Ftehim dwar il-Kummerċ u l-Kooperazzjoni, l-UE u r-Renju Unit stabbilew regoli ta' oriġini dwar il-vetturi elettriċi u l-batteriji. Dawn ir-regoli jiddefinixxu r-rekwiżiti tal-kontenut lokali, miżura kummerċjali biex tingħata spinta lill-industriji, is-servizzi u l-prodotti domestiċi, billi l-vetturi elettriċi u l-batteriji b'livell minimu ta' kontenut manifatturat mill-UE jew mir-Renju Unit ikunu jistgħu jibbenefikaw minn kummerċ ħieles mit-tariffi.

Sabiex il-manifatturi fl-UE u fir-Renju Unit jingħataw aktar żmien biex jikkonformaw mar-regoli, il-Kunsill approva deċiżjoni mressqa għall-ewwel darba mill-Kummissjoni fis-6 ta' Diċembru 2023, li testendi r-regoli sal-31 ta' Diċembru 2026. Biex tgħin lill-industrija tadatta għar-regoli u tespandi l-produzzjoni tal-batteriji, il-Kummissjoni ser twarrab ukoll €3 biljun f'appoġġ taħt il-Fond għall-Innovazzjoni.

Meta r-regoli ġew miftiehma għall-ewwel darba fl-2020, l-għan kien li jitħeġġu l-investimenti fil-kapaċità tal-manifattura tal-batteriji fl-UE u fir-Renju Unit. Minn dak iż-żmien 'l hawn, il-pandemija tal-COVID-19, il-gwerra tar-Russja kontra l-Ukrajna u l-kompetizzjoni minn skemi internazzjonali ġodda ta' appoġġ għas-sussidji kellhom impatt fuq il-ktajjen tal-provvista dinjija u fuq l-industrija tal-batteriji.

• Ir-relazzjonijiet bejn l-UE u r-Renju Unit: il-Kunsill japprova l-estensjoni tar-regoli tal-oriġini attwali għall-vetturi elettriċi sa tmiem l-2026 (stqarrija għall-istampa, 21 ta' Diċembru 2023)

Il-ministri għall-affarijiet tal-UE evalwaw ir-relazzjonijiet bejn l-UE u r-Renju Unit, inkluż l-implimentazzjoni tal-ftehimiet. Huma esprimew l-appoġġ tagħhom biex jiġi sfruttat il-potenzjal sħiħ tal-Ftehim dwar il-Kummerċ u l-Kooperazzjoni għall-benefiċċju reċiproku tal-UE u tar-Renju Unit.

Il-Kunsill ta wkoll l-approvazzjoni tiegħu għall-parteċipazzjoni tar-Renju Unit fil-programmi tal-UE Orizzont Ewropa u Copernicus, u b'hekk approva l-ftehim fil-prinċipju milħuq bejn il-Kummissjoni Ewropea u l-gvern tar-Renju Unit fis-7 ta' Settembru 2023.

• Kunsill Affarijiet Ġenerali, 15 ta' Novembru 2023
• Ir-relazzjonijiet bejn l-UE u r-Renju Unit: il-Kunsill japprova l-parteċipazzjoni tar-Renju Unit fil-programmi Orizzont Ewropa u Copernicus (stqarrija għall-istampa, 15 ta' Novembru 2023)

Il-ministri għall-ġustizzja u l-affarijiet interni adottaw, mingħajr diskussjoni, deċiżjoni li tawtorizza l-ftuħ ta' negozjati mar-Renju Unit dwar il-kooperazzjoni fi kwistjonijiet ta' kompetizzjoni.

Il-ftehim li jmiss ser jissupplimenta l-ftehim kummerċjali u ta' kooperazzjoni u ser ikopri kwistjonijiet relatati mal-applikazzjoni tal-liġi tal-kompetizzjoni tal-UE.

• Kunsill Ġustizzja u Affarijiet Interni, 8-9 ta' Ġunju 2023
• Deċiżjoni tal-Kunsill dwar il-ftuħ ta' negozjati mar-Renju Unit għal ftehim ta' kooperazzjoni għall-kompetizzjoni

Il-Presidenza Ċeka tal-Kunsill u l-Parlament Ewropew laħqu qbil proviżorju dwar regolament dwar miżuri awtonomi, li jrid jiġi approvat mill-Kunsill u l-Parlament Ewropew qabel ma jiġi adottat formalment.

Ir-regolament jistabbilixxi r-regoli u l-proċeduri li jippermettu lill-UE teżerċita d-dritt tagħha fl-infurzar u l-implimentazzjoni tal-Ftehim dwar il-Ħruġ u l-Ftehim dwar il-Kummerċ u l-Kooperazzjoni. Ikopri diversi miżuri li l-UE tista' tadotta f'każ ta' bżonn, inkluż:

• miżuri ta' rimedju, ta' riekwilibriju u ta' kumpens
• is-sospensjoni temporanja tat-trattament preferenzjali rilevanti ta' ċerti prodotti
• rifjut, revoka, sospensjoni, limitazzjoni jew kondizzjonament tal-awtorizzazzjonijiet jew permessi tat-trasportaturi tal-ajru u l-operat tagħhom
• miżuri li jirrestrinġu l-kummerċ u l-investiment

Il-miżuri kollha adottati jridu jkunu proporzjonati mal-objettivi segwiti u effettivi biex iwasslu għall-konformità tar-Renju Unit mal-ftehimiet rilevanti. Il-miżuri għandhom jikkonformaw ukoll mal-kriterji speċifiċi stabbiliti f'dawk il-ftehimiet.

• Ir-relazzjonijiet bejn l-UE u r-Renju Unit: il-Presidenza tal-Kunsill u l-Parlament Ewropew jilħqu qbil proviżorju dwar regolament dwar miżuri awtonomi (stqarrija għall-istampa, 30 ta' Novembru 2022)

Il-Kunsill adotta deċiżjoni li tawtorizza l-bidu ta' negozjati għal ftehim bejn l-UE u r-Renju Unit dwar Ġibiltà, inkluż id-direttivi ta' negozjati. Abbażi ta' dan, il-Kummissjoni Ewropea tista' tibda negozjati formali mar-Renju Unit fir-rigward ta' Ġibiltà.

L-għan tan-negozjati huwa li jiġi stabbilit ftehim wiesa' u bbilanċjat bejn l-UE u r-Renju Unit fid-dawl tas-sitwazzjoni ġeografika partikolari u l-ispeċifiċitajiet ta' Ġibiltà.

• Ir-relazzjonijiet bejn l-UE u r-Renju Unit: il-Kunsill jawtorizza l-bidu ta' negozjati għal ftehim fir-rigward ta' Ġibiltà (stqarrija għall-istampa, 5 ta' Ottubru 2021)

Il-Kunsill Ewropew laqa' d-dħul fis-seħħ tal-ftehim dwar il-kummerċ u l-kooperazzjoni bejn l-UE u r-Renju Unit fl-1 ta' Mejju 2021. Il-President Michel qal li l-ftehim, flimkien mal-ftehim dwar il-ħruġ u l-protokolli tiegħu, jipprovdi l-qafas għar-relazzjonijiet bejn l-UE u r-Renju Unit, u li ż-żewġ ftehimiet għandhom jiġu implimentati b'mod sħiħ u effettiv.

F'dan ir-rigward, il-Kunsill Ewropew stieden ukoll lill-Kummissjoni Ewropea biex tkompli bl-isforzi tagħha biex tiżgura l-implimentazzjoni sħiħa tal-ftehimiet, inkluż fl-oqsma tad-drittijiet taċ-ċittadini tal-UE, is-sajd u kondizzjonijiet ekwivalenti ta' kompetizzjoni.

• Laqgħa straordinarja tal-Kunsill Ewropew, 24-25 ta' Mejju 2021

Wara l-vot fil-Parlament Ewropew, il-Kunsill adotta deċiżjoni dwar il-konklużjoni tal-ftehim dwar il-kummerċ u l-kooperazzjoni bejn l-UE u r-Renju Unit u l-ftehim dwar is-sigurtà tal-informazzjoni. Dan huwa l-aħħar pass għall-UE fir-ratifika tal-ftehim ta' wara l-Brexit. Iż-żewġ ftehimiet ser jidħlu fis-seħħ fl-1 ta' Mejju 2021.

• Ftehim dwar il-kummerċ u l-kooperazzjoni bejn l-UE u r-Renju Unit: il-Kunsill jadotta deċiżjoni dwar il-konklużjoni (stqarrija għall-istampa, 29 ta' April 2021)

Il-Kunsill talab l-approvazzjoni tal-Parlament Ewropew għad-deċiżjoni tiegħu dwar il-konklużjoni tal-ftehim dwar il-kummerċ u l-kooperazzjoni bejn l-UE u r-Renju Unit u ta' ftehim dwar is-sigurtà tal-informazzjoni.

Ladarba l-Parlament Ewropew ikun ta l-approvazzjoni tiegħu u ladarba l-24 verżjoni lingwistika kollha tal-ftehimiet ikunu ġew stabbiliti bħala awtentiċi u definittivi, il-Kunsill ser ikun f’pożizzjoni li jadotta d-deċiżjoni dwar il-konklużjoni tal-ftehimiet, li tippermetti d-dħul fis-seħħ tagħhom. Dan ser ikun l-aħħar pass għall-UE fir-ratifika tal-ftehimiet.

• Ftehim dwar il-kummerċ u l-kooperazzjoni bejn l-UE u r-Renju Unit: il-Kunsill jitlob l-approvazzjoni tal-Parlament Ewropew (stqarrija għall-istampa)

Il-Kunsill ta' Sħubija bejn l-UE u r-Renju Unit iddeċieda, fuq talba tal-UE, li jestendi l-applikazzjoni proviżorja tal-ftehim sat-30 ta' April 2021 biex jingħata biżżejjed żmien biex titlesta r-reviżjoni mill-ġuristi-lingwisti tal-ftehimiet fl-24 lingwa.

• Dikjarazzjoni minn Maroš Šefčovič, Viċi President tal-Kummissjoni Ewropea, wara l-Kunsill Affarijiet Ġenerali, 23 ta' Frar 2021

Il-ftehim japplika b'mod proviżorju sal-aħħar ta' Frar 2021, sakemm ma jkunx hemm qbil mill-partijiet dwar data aktar tard.

In-negozjaturi ewlenin jilħqu qbil dwar il-prinċipji għal negozjati ulterjuri.

• Prinċipji organizzattivi għal negozjati ulterjuri (Kummissjoni Ewropea)

Il-ftehim dwar il-kummerċ u l-kooperazzjoni bejn l-UE u r-Renju Unit ġie ppubblikat f’Il-Ġurnal Uffiċjali tal-Unjoni Ewropea.

Il-President tal-Kunsill Ewropew Charles Michel u l-President tal-Kummissjoni Ewropea Ursula von der Leyen iffirmaw il-ftehim mar-Renju Unit fi Brussell f'isem l-UE qabel ma d-dokumenti nġiebu f'Londra għall-iffirmar mill-Prim Ministru tar-Renju Unit Boris Johnson aktar tard dakinhar.

• L-iffirmar tal-ftehim bejn l-UE u r-Renju Unit, 30 ta' Diċembru 2020

Il-Kunsill adotta, bi proċedura bil-miktub, id-deċiżjoni dwar l-iffirmar tal-Ftehim dwar il-Kummerċ u l-Kooperazzjoni bejn l-UE u r-Renju Unit u l-applikazzjoni proviżorja tiegħu mill-1 ta' Jannar 2021, sakemm tingħata l-approvazzjoni tal-Parlament Ewropew u l-konklużjoni bid-deċiżjoni tal-Kunsill is-sena d-dieħla.

• Ftehim dwar il-Kummerċ u l-Kooperazzjoni bejn l-UE u r-Renju Unit: il-Kunsill jadotta d-deċiżjoni dwar l-iffirmar, 29 ta' Diċembru 2020

In-negozjaturi tal-UE u tar-Renju Unit fi Brussell laħqu ftehim, li huwa pass kbir 'il quddiem biex jitħarsu l-interessi Ewropej, tiġi żgurata kompetizzjoni ġusta u tiġi stabbilita kooperazzjoni mill-qrib f'oqsma ta' interess reċiproku.

• L-abbozz ta' Ftehim dwar il-Kummerċ u l-Kooperazzjoni bejn l-UE u r-Renju Unit (Kummissjoni Ewropea)
• Ftehim dwar il-Kummerċ u l-Kooperazzjoni bejn l-UE u r-Renju Unit - stqarrija għall-istampa (Kummissjoni Ewropea)

Ir-raba' laqgħa tal-Kumitat Konġunt tal-UE u r-Renju Unit saret f'Londra bejn Maroš Šefčovič, Viċi President tal-Kummissjoni Ewropea u Michael Gove, Kanċillier tad-Dukat ta' Lancaster.

• Stqarrija għall-istampa mill-Viċi President Maroš Šefčovič wara r-raba' laqgħa tal-Kumitat Konġunt tal-UE u r-Renju Unit, 19 ta' Ottubru 2020

Il-Kunsill Ewropew iddiskuta r-relazzjonijiet bejn l-UE u r-Renju Unit. Il-mexxejja stiednu lin-negozjatur ewlieni tal-Unjoni biex ikompli n-negozjati fil-ġimgħat li ġejjin, u jappella lir-Renju Unit biex jieħu l-passi meħtieġa u jagħmilha possibbli li jintlaħaq qbil.

• Kunsill Ewropew, 15-16 ta' Ottubru 2020

Il-kap negozjatur tal-Unjoni, Michel Barnier, informa l-ministri dwar is-sitwazzjoni attwali tan-negozjati bejn l-UE u r-Renju Unit, l-implimentazzjoni tal-ftehim dwar il-ħruġ u l-isforzi ta' impenn tal-UE bil-ħsieb ta' tmiem il-perjodu ta' tranżizzjoni fil-31 ta' Diċembru 2020.

• Kunsill Affarijiet Ġenerali, 13 ta' Ottubru 2020

Fi tmiem il-laqgħa, ġie pprovdut aġġornament qasir dwar in-negozjati mar-Renju Unit.

• Kunsill Ewropew Straordinarju, 1 u 2 ta' Ottubru 2020

Il-Kummissjoni Ewropea tibgħat ittra ta' intimazzjoni lir-Renju Unit talli kiser l-obbligi tiegħu skont il-ftehim dwar il-ħruġ.

• Il-Kummissjoni Ewropea tibgħat ittra ta' intimazzjoni lir-Renju Unit rigward il-ksur tal-obbligi tiegħu, 1 ta' Ottubru 2020

In-negozjaturi tal-UE u tar-Renju Unit jiltaqgħu fi Brussell biex jiddiskutu s-sħubija futura bejn iż-żewġ partijiet.

• Aġenda tan-negozjati dwar ir-relazzjonijiet futuri bejn l-UE u r-Renju Unit, mid-29 ta' Settembru sat-2 ta' Ottubru 2020

It-tielet laqgħa tal-Kumitat Konġunt tal-UE u r-Renju Unit saret fi Brussell bejn Maroš Šefčovič, Viċi President tal-Kummissjoni Ewropea u Michael Gove, Kanċillier tad-Dukat ta' Lancaster.

• Stqarrija għall-istampa mill-Viċi President Maroš Šefčovič wara t-tielet laqgħa tal-Kumitat Konġunt tal-UE u r-Renju Unit, 28 ta' Settembru 2020

Il-kap negozjatur tal-UE Michel Barnier informa lill-ministri dwar is-sitwazzjoni attwali tan-negozjati bejn l-UE u r-Renju Unit u l-implimentazzjoni tal-ftehim dwar il-ħruġ.

• Kunsill Affarijiet Ġenerali, 22 ta' Settembru 2020

Wara l-pubblikazzjoni mill-gvern tar-Renju Unit tal-abbozz ta' Liġi dwar is-Suq Intern tar-Renju Unit (''United Kingdom Internal Market Bill'') fid-9 ta' Settembru 2020, Maroš Šefčovič, Viċi President tal-Kummissjoni Ewropea, appella għal laqgħa straordinarja tal-Kumitat Konġunt UE-Renju Unit biex il-gvern tar-Renju Unit jintalab jelabora dwar l-intenzjonijiet tiegħu u jwieġeb għat-tħassib serju tal-UE. L-għada saret laqgħa f'Londra bejn il-Viċi President Šefčovič u Michael Gove, Kanċillier tad-Dukat ta' Lancaster.

• Dikjarazzjoni mill-Kummissjoni Ewropea wara l-laqgħa straordinarja tal-Kumitat Konġunt tal-UE u r-Renju Unit

In-negozjaturi tal-UE u tar-Renju Unit jiltaqgħu f'Londra biex jiddiskutu s-sħubija futura bejn iż-żewġ partijiet.

• Aġenda tan-negozjati dwar ir-relazzjonijiet futuri bejn l-UE u r-Renju Unit, 8-10 ta' Settembru 2020
• Dikjarazzjoni ta' Michel Barnier wara t-tmien ċiklu ta' negozjati għal sħubija ġdida bejn l-UE u r-Renju Unit, 10 ta' Settembru 2020

In-negozjaturi tal-UE u tar-Renju Unit iltaqgħu fi Brussell biex jiddiskutu s-sħubija futura bejn iż-żewġ partijiet.

• L-aġenda tan-negozjati dwar ir-relazzjonijiet futuri bejn l-UE u r-Renju Unit, 18-21 ta' Lulju 2020
• Stqarrija għall-istampa minn Michel Barnier wara s-seba' ċiklu ta' negozjati dwar ir-relazzjonijiet futuri mar-Renju Unit, 21 ta' Awwissu 2020

In-negozjaturi tal-UE u tar-Renju Unit iltaqgħu f'Londra biex jiddiskutu s-sħubija bejn l-UE u r-Renju Unit.

• L-aġenda tan-negozjati dwar ir-relazzjonijiet futuri bejn l-UE u r-Renju Unit, 20-23 ta' Lulju 2020
• Stqarrija għall-istampa minn Michel Barnier wara s-sitt ċiklu ta' negozjati dwar ir-relazzjonijiet futuri mar-Renju Unit, 23 ta' Lulju 2020

Il-Kummissjoni Ewropea adottat komunikazzjoni biex tgħin lill-awtoritajiet nazzjonali, in-negozji u ċ-ċittadini jħejju għall-bidliet li ser jitfaċċaw fi tmiem il-perjodu ta' tranżizzjoni. Il-bidliet ser iseħħu fi skambji transkonfinali bejn l-UE u r-Renju Unit mill-1 ta' Jannar 2021 – irrispettivament minn jekk ftehim dwar sħubija futura jkunx ġie konkluż jew le.

• Komunikazzjoni "Inħejju għall-bidliet", 9 ta' Lulju 2020 (Kummissjoni Ewropea)

L-UE u r-Renju Unit intensifikaw it-taħditiet tagħhom dwar is-sħubija futura biex jikkonkludu ftehim qabel tmiem l-2020. In-negozjaturi ewlenin miż-żewġ naħat u t-timijiet tagħhom iltaqgħu f'format ristrett biex jiżguraw il-progress fin-negozjati, qabel il-bidu tal-ħames ċiklu ta' taħditiet fl-20 ta' Lulju.

Il-konklużjonijiet ġew adottati bi proċedura bil-miktub.

• Ir-relazzjonijiet bejn l-UE u r-Renju Unit: il-Kunsill jadotta konklużjonijiet (stqarrija għall-istampa)

Il-mexxejja tal-UE u tar-Renju Unit ltaqgħu permezz ta' vidjokonferenza biex jiddiskutu r-relazzjonijiet reċiproċi. Huma qablu li jintensifikaw in-negozjati dwar is-sħubija futura, bil-ħsieb li jiġi konkluż u rratifikat ftehim sal-aħħar tal-2020.

• Vidjokonferenza ta' livell għoli bejn l-UE u r-Renju Unit, 15 ta' Ġunju 2020
• Dikjarazzjoni UE-Renju Unit wara l-laqgħa ta’ livell għoli tal-15 ta' Ġunju 2020

L-UE u r-Renju Unit qablu li jintensifikaw in-negozjati bil-ħsieb li jintlaħaq ftehim qabel tmiem l-2020. F'Lulju, f'Awwissu u f'Settembru ser isiru sessjonijiet ta' negozjati. In-negozjaturi ewlenin miż-żewġ naħat u t-timijiet tagħhom ser jiltaqgħu kif meħtieġ f'format aktar ristrett biex jiġi żgurat il-progress fin-negozjati.

• Addendum għat-termini ta' referenza dwar in-negozjati dwar ir-relazzjonijiet futuri bejn ir-Renju Unit u l-UE

Minħabba l-kriżi tal-COVID-19 li għaddejja bħalissa, in-negozjaturi tal-UE u tar-Renju Unit qablu li jaħdmu permezz ta' vidjokonferenza.

• L-aġenda tan-negozjati dwar ir-relazzjonijiet futuri bejn l-UE u r-Renju Unit, 2-5 ta' Ġunju 2020
• Dikjarazzjoni għall-istampa minn Michel Barnier wara r-raba' ċiklu ta' negozjati għal sħubija ġdida bejn l-UE u r-Renju Unit, 5 ta' Ġunju 2020

Minħabba l-kriżi tal-COVID-19 li għaddejja bħalissa, in-negozjaturi tal-UE u tar-Renju Unit qablu li jaħdmu permezz ta' vidjokonferenza.

• L-aġenda tan-negozjati dwar ir-relazzjonijiet futuri bejn l-UE u r-Renju Unit, 11-15 ta' Mejju 2020
• Stqarrija għall-istampa minn Michel Barnier wara t-tielet ċiklu ta' negozjati dwar ir-relazzjonijiet futuri mar-Renju Unit, 25 ta' Mejju 2020

Minħabba l-kriżi tal-COVID-19 li għaddejja bħalissa, in-negozjaturi tal-UE u tar-Renju Unit qablu li jaħdmu permezz ta' vidjokonferenza.

• L-aġenda tan-negozjati dwar ir-relazzjonijiet futuri bejn l-UE u r-Renju Unit, 20-24 ta' April 2020
• Stqarrija għall-istampa minn Michel Barnier wara t-tieni serje ta' negozjati dwar ir-relazzjonijiet futuri mar-Renju Unit, 24 ta' April 2020

Michel Barnier, in-Negozjatur Ewlieni tal-Kummissjoni Ewropea, u David Frost, in-Negozjatur Ewlieni tar-Renju Unit, qiesu l-ħidma teknika mwettqa mill-ewwel ċiklu ta' negozjati 'l hawn abbażi tat-testi legali skambjati miż-żewġ naħat. Huma qablu dwar il-ħtieġa li jiġu organizzati aktar ċikli ta' negozjati.

Minħabba l-kriżi tal-coronavirus, dawn iċ-ċikli ta' negozjati ser isiru permezz ta' vidjokonferenza, u jibdew fid-dati li ġejjin: l-20 ta' April, il-11 ta' Mejju, l-1 ta' Ġunju.

L-Unjoni Ewropea u r-Renju Unit, b'telekonferenza, kellhom l-ewwel laqgħa tal-Kumitat Konġunt tagħhom dwar l-implimentazzjoni u l-applikazzjoni tal-ftehim dwar il-ħruġ. Il-Kumitat Konġunt huwa kopresedut mill-Viċi President tal-Kummissjoni Ewropea Maroš Šefčovič u mill-Kanċillier tad-Dukat ta' Lancaster Michael Gove.

• Dikjarazzjoni mill-Kummissjoni Ewropea wara l-ewwel laqgħa tal-Kumitat Konġunt bejn l-UE u r-Renju Unit

Il-Kummissjoni Ewropea ppubblikat abbozz ta' ftehim legali li jkopri s-sħubija futura bejn l-UE u r-Renju Unit. Dan jikkonverti d-direttivi ta' negozjati approvati mill-Kunsill Affarijiet Ġenerali fil-25 ta' Frar 2020 f'test legali konformi mad-dikjarazzjoni politika maqbula bejn l-UE u r-Renju Unit f'Ottubru 2019.

• Abbozz ta' ftehim legali għas-sħubija futura bejn l-UE u r-Renju Unit

Il-kriżi tal-COVID-19 wasslet għall-posponiment tat-tieni ċiklu ta' negozjati skedat għal bejn it-18 u l-20 ta' Marzu 2020 f'Londra.

Bdiet l-ewwel sessjoni tan-negozjati dwar is-sħubija futura bejn l-UE u r-Renju Unit. Sessjonijiet sħaħ ta' negozjati ser isiru kull ġimagħtejn jew tliet ġimgħat u ser jalternaw bejn Brussell u Londra. Iż-żewġ partijiet ser jiltaqgħu biex jevalwaw il-progress fil-laqgħa ta' livell għoli ppjanata għal Ġunju 2020.

• Termini ta' referenza għan-negozjati dwar ir-relazzjonijiet futuri bejn ir-Renju Unit u l-UE
• Aġenda tal-ewwel sessjoni ta' negozjati dwar ir-relazzjonijiet futuri bejn ir-Renju Unit u l-UE, 2-5 ta' Marzu 2020

Il-Kunsill adotta deċiżjoni li tawtorizza l-ftuħ ta' negozjati għal sħubija ġdida mar-Renju Unit. Il-Kunsill innomina wkoll lill-Kummissjoni bħala n-negozjatur tal-UE u adotta d-direttivi ta’ negozjati li stabbilew l-ambitu tas-sħubija futura. Dan il-mandat ikopri oqsma bħall-kummerċ, is-sajd, il-politika barranija, is-sigurtà u d-difiża, l-infurzar tal-liġi u l-kooperazzjoni ġudizzjarja f’materji kriminali. Bħala l-pass li jmiss, il-Kummissjoni ser tiftiehem mar-Renju Unit dwar id-dati għall-ewwel sessjonijiet ta' negozjati.

• Relazzjonijiet bejn l-UE u r-Renju Unit: il-Kunsill jaqbel li jinbdew it-taħditiet u jadotta direttivi ta' negozjati

Il-Kummissjoni ħarġet rakkomandazzjoni lill-Kunsill biex jinfetħu negozjati dwar sħubija ġdida mar-Renju Unit. Din ir-rakkomandazzjoni hija bbażata fuq il-linji gwida u l-konklużjonijiet eżistenti tal-Kunsill Ewropew, kif ukoll fuq id-dikjarazzjoni politika maqbula bejn l-UE u r-Renju Unit f'Ottubru 2019. Hija tinkludi proposta komprensiva għal direttivi ta' negozjati, fejn huma ddefiniti l-ambitu u t-termini tar-relazzjoni futura mar-Renju Unit li qed tipprevedi l-UE.

• Proposta għal direttivi ta' negozjati għal sħubija ġdida mar-Renju Unit (Kummissjoni Ewropea)

• Brexit (informazzjoni ġenerali u kronoloġija)