Kunsill Affarijiet Ġenerali, 13 ta' Ottubru 2020

Riżultati ewlenin

Relazzjonijiet bejn l-UE u r-Renju Unit

Il-kap negozjatur tal-Unjoni, Michel Barnier, informa l-ministri dwar is-sitwazzjoni attwali tan-negozjati bejn l-UE u r-Renju Unit, l-implimentazzjoni tal-Ftehim dwar il-Ħruġ u l-isforzi ta' impenn tal-UE bil-ħsieb ta' tmiem il-perjodu ta' tranżizzjoni fil-31 ta' Diċembru 2020.

Il-ministri affermaw mill-ġdid l-appoġġ tagħhom għall-kap negozjatur u l-mandat tiegħu, u esprimew il-fiduċja tagħhom li jista' jinkiseb aktar progress. L-UE tibqa' impenjata li tikkonkludi ftehim ambizzjuż għar-relazzjonijiet futuri. Madankollu, il-ministri ssottolinjaw il-ħtieġa li n-negozji u l-pajjiżi jħejju għax-xenarji kollha.

• Negozjati bejn l-UE u r-Renju Unit dwar is-sħubija futura (informazzjoni ġenerali u kronoloġija)

Djalogu dwar l-istat tad-dritt

Il-presidenza żviluppat approċċ ġdid għad-djalogu annwali tal-Kunsill dwar l-istat tad-dritt. Il-ministri kellhom diskussjoni orizzontali dwar l-iżviluppi ġenerali, ibbażata fuq erba' pilastri: is-sistemi tal-ġustizzja, il-qafas kontra l-korruzzjoni, il-pluraliżmu tal-media, u kwistjonijiet istituzzjonali oħra marbuta ma' sistemi ta' kontrokontrolli.

L-aspetti speċifiċi għall-pajjiż ser jiġu diskussi fil-laqgħa tal-Kunsill Affarijiet Ġenerali tal-10 ta' Novembru. Hemmhekk, id-diskussjoni ser tiffoka fuq l-iżviluppi ewlenin f'ħames stati membri, skont l-ordni tal-protokoll tal-UE: Belġju, Bulgarija, Repubblika Ċeka, Danimarka u Estonja.

L-istat tad-dritt huwa valur fundamentali li l-UE hija msejsa fuqu. Id-djalogu l-ġdid tagħna huwa strument ieħor fis-sett ta' għodod li l-UE għandha l-UE biex issaħħaħ u tipproteġi l-istat tad-dritt. Għandu l-għan li jistabbilixxi dibattitu miftuħ u kostruttiv dwar is-sitwazzjoni tal-istat tad-dritt fl-istati membri kollha: it-trattament ugwali tal-istati membri kollha, in-nondiskriminazzjoni u l-kriterji oġġettivi huma ta' importanza kbira. L-għan ewlieni tagħna huwa li niksbu fehim ċar u reċiproku ta' dak li jgħaqqadna flimkien. Michael Roth, il-Ministru tal-Istat għall-Ewropa tal-Ġermanja

• L-Ewwel Rapport Annwali dwar is-sitwazzjoni madwar l-Unjoni Ewropea fejn jidħol l-Istat tad-Dritt (Kummissjoni Ewropea)

Kunsill Ewropew

Il-ministri kellhom skambju ta' fehmiet dwar l-abbozz ta' konklużjonijiet għal-laqgħa tal-Kunsill Ewropew li għandha ssir fil-15 u s-16 ta' Ottubru.

Fil-laqgħa tagħhom, il-mexxejja tal-UE ser jiddiskutu s-sitwazzjoni attwali fin-negozjati bejn l-UE u r-Renju Unit.

Huma ser ikollhom ukoll dibattitu ta' orjentazzjoni dwar it-tibdil fil-klima u ser jiddiskutu l-koordinazzjoni fir-rigward tal-COVID-19 u l-affarijiet barranin, inkluż ir-relazzjonijiet bejn l-UE u l-Afrika.

• Kunsill Ewropew, 15-16 ta' Ottubru 2020

Konferenza dwar il-Ġejjieni tal-Ewropa

Kien hemm punt ta' informazzjoni mill-presidenza dwar il-Konferenza dwar il-Ġejjieni tal-Ewropa.

L-istati membri jixtiequ li l-Konferenza dwar il-Ġejjieni tal-Ewropa tinvolvi liċ-ċittadini f'dibattitu wiesa' dwar il-ġejjieni tal-Ewropa fl-għaxar snin li ġejjin u lil hinn, inkluż fid-dawl tal-pandemija tal-COVID-19.

Il-presidenza spjegat li għadhom għaddejjin kuntatti mal-istituzzjonijiet l-oħra bil-ħsieb li jintlaħaq qbil dwar dikjarazzjoni konġunta biex titwitta t-triq għat-tnedija tal-Konferenza.

Il-qafas finanzjarju pluriennali li jmiss u l-pakkett għall-irkupru

Il-presidenza infurmat lill-ministri dwar it-taħditiet li għaddejjin fil-livell politiku mal-Parlament Ewropew u mal-Kummissjoni bil-ħsieb li jiġi żgurat l-approvazzjoni tal-Parlament għar-regolament li jistabbilixxi l-qafas finanzjarju pluriennali għall-2021-2027.

L-istituzzjonijiet tal-UE ħadmu sabiex jilħqu qbil komuni dwar għadd ta' kwistjonijiet, inkluż il-governanza tal-finanzjament taħt Next Generation EU u kwistjonijiet orizzontali bħall-protezzjoni tal-klima u l-integrazzjoni tal-perspettiva tal-ġeneri. Bdew ukoll laqgħat ta' trilogu mal-Parlament dwar il-mekkaniżmu ta' kondizzjonalità l-ġdid.

Il-presidenza qieset bħala possibbli qbil rapidu dwar il-pakkett ġenerali u enfasizzat l-urġenza li l-proċess jiġi konkluż malajr kemm jista' jkun.

Covid-19 - koordinazzjoni tal-UE

Illum il-Kunsill adotta mingħajr diskussjoni rakkomandazzjoni dwar approċċ ikkoordinat għar-restrizzjoni tal-moviment liberu b'reazzjoni għall-pandemija tal-COVID-19. Din ir-rakkomandazzjoni għandha l-għan li tevita l-frammentazzjoni u t-tfixkil u li żżid it-trasparenza u l-prevedibbiltà għaċ-ċittadini u n-negozji.

Il-pandemija tal-COVID-19 fixklet il-ħajja tagħna ta' kuljum b'ħafna modi. Ir-restrizzjonijiet fuq l-ivvjaġġar għamluha diffiċli għal xi wħud miċ-ċittadini tagħna biex imorru jaħdmu, imorru l-università jew iżuru l-għeżież tagħhom. Huwa d-dmir tagħna lkoll li niżguraw koordinazzjoni dwar kwalunkwe miżura li taffettwa l-moviment liberu u li nagħtu liċ-ċittadini tagħna l-informazzjoni kollha li jeħtieġu meta jiddeċiedu dwar l-ivvjaġġar tagħhom. Michael Roth, il-Ministru tal-Istat għall-Ewropa tal-Ġermanja

• COVID-19: il-Kunsill jadotta rakkomandazzjoni biex jiġu kkoordinati l-miżuri li jaffettwaw il-moviment liberu (stqarrija għall-istampa, 13 ta' Ottubru 2020)