Qafas ta' risistemazzjoni tal-UE

Ir-risistemazzjoni u l-ammissjoni umanitarja jippermettu lill-persuni bi bżonn ta' protezzjoni internazzjonali jiċċaqilqu minn pajjiż mhux tal-UE fejn ikunu fittxew rifuġju għal stat membru tal-UE li jagħtihom protezzjoni.

Ir-risistemazzjoni ġeneralment titwettaq abbażi ta' riferimenti mill-Aġenzija tan-NU għar-Refuġjati (UNHCR). L-ammissjoni umanitarja tista' tiġi implimentata fuq talba ta' stat membru tal-UE u tista' tiddependi fuq riferimenti mill-Aġenzija tal-Unjoni Ewropea għall-Ażil (EUAA), mill-UNHCR, jew minn organizzazzjonijiet internazzjonali rilevanti oħra.

Fl-2016, il-Kummissjoni Ewropea pproponiet qafas permanenti tal-UE għar-risistemazzjoni u l-ammissjoni umanitarja, li jissostitwixxi l-iskemi ad hoc li qabel kienu jintużaw mill-istati membri.

Il-qafas tal-UE għar-risistemazzjoni għandu l-għan li:

• jespandi l-perkorsi sikuri u legali lejn l-UE għall-persuni li jeħtieġu protezzjoni internazzjonali
• jappoġġa l-ġestjoni fit-tul tal-migrazzjoni u jgħin biex jitnaqqsu l-wasliet irregolari
• jistabbilixxi regoli u proċeduri komuni tal-UE għar-risistemazzjoni u l-ammissjoni umanitarja
• jikkontribwixxi għal sforzi internazzjonali ta' risistemazzjoni u ta' ammissjoni umanitarja
• jappoġġa lil pajjiżi mhux tal-UE li jospitaw popolazzjonijiet kbar ta' refuġjati

Il-qafas jifforma parti mill-patt dwar il-migrazzjoni u l-ażil. Ġie adottat f'Mejju 2024 u daħal fis-seħħ fil-11 ta' Ġunju 2024. Fit-12 ta' Ġunju 2026 saret applikabbli dispożizzjoni waħda marbuta mat-tnedija operazzjonali tal-Eurodac.

Karatteristiċi ewlenin tal-qafas

Il-qafas ta' risistemazzjoni tal-UE jistabbilixxi approċċ komuni għar-risistemazzjoni u l-ammissjoni umanitarja madwar l-UE. Filwaqt li jibni fuq prattiki eżistenti, jintroduċi definizzjonijiet armonizzati, kriterji ta' eliġibbiltà, proċeduri ta' ammissjoni u raġunijiet għar-rifjut tal-ammissjoni.

Il-qafas jipprovdi konsistenza u prevedibbiltà akbar għall-istati membri, filwaqt li jsaħħaħ il-kontribut tal-UE għall-isforzi ta' protezzjoni internazzjonali.

Isaħħaħ ukoll il-kooperazzjoni ma' pajjiżi mhux tal-UE li jospitaw popolazzjonijiet kbar ta' refuġjati. Billi jipprovdi opportunitajiet ta' protezzjoni fl-UE, juri solidarjetà mal-pajjiżi sħab u jappoġġa l-isforzi internazzjonali ta' risistemazzjoni u ammissjoni umanitarja flimkien ma' atturi globali oħra.