An Chomhairle Comhshaoil, 04/03/2016, 4 Márta 2016

Príomhthorthaí

Ghlac 195 thír comhaontú stairiúil Pháras maidir le hathrú na haeráide, ar cor fíorchinniúnach é chun an t-ardú teochta a theorannú agus chun na rioscaí a bhaineann le hathrú na haeráide a chosc. Cuirfidh na Ballstáit i gcrích anois é trí ghníomhaíochtaí nithiúla a dhéanamh ar leibhéal an Aontais agus ar an leibhéal náisiúnta. Is mar sin a labhair Sharon Dijksma, Aire Comhshaoil na hÍsiltíre agus Uachtarán na Comhairle Comhshaoil

Comhaontú Pháras maidir le hathrú na haeráide

Phléigh na hAirí Comhshaoil an obair leantach a dhéanfar ar Chomhaontú Pháras maidir le hathrú na haeráide, agus na himpleachtaí i ndáil le beartas aeráide an Aontais Eorpaigh.  Chuir siad i dtreis gur gá an móiminteam i bPáras a choimeád sa siúl agus díriú anois ar na ceangaltaisa chur chun feidhme, lena n-áirítear iad sin a leagadh síos sna gealltanais náisiúnta. 

Measadh gur chomhartha tábhachtach é, a mhéid a bhaineann le tiomantas an Aontais Eorpaigh do chuspóirí an Chomhaontaithe i bPáras, go gcuirfí creat aeráide agus fuinnimh an Aontais don bhliain 2030 chun feidhme go tráthúil. Chuir na hAirí i dtreis chomh maith a thábhachtaí atá sé go ndéanfar daingniú pras ar an gcomhaontú. 

Déanfar achoimre ar an díospóireacht sin a thíolacadh chuig Uachtarán na Comhairle Eorpaí.

Dúirt Sharon Dijksma, Aire Comhshaoil na hÍsiltíre agus Uachtarán ar an gComhairle Comhshaoil, an méid seo: "Ghlac 195 thír comhaontú stairiúil Pháras maidir le hathrú na haeráide, ar cor fíorchinniúnach é chun an t-ardú teochta a theorannú agus chun na rioscaí a bhaineann le hathrú na haeráide a chosc. Cuirfidh na Ballstáit i gcrích anois é trí ghníomhaíochtaí nithiúla a dhéanamh ar leibhéal an Aontais agus ar an leibhéal náisiúnta."

• Amlíne - Comhaontú Pháras

An geilleagar ciorclach 

Phléigh an Chomhairle plean gníomhaíochta an Aontais maidir leis an ngeilleagar ciorclach, ar cuid de phacáiste é ina bhfuil ceithre thogra reachtacha maidir le dramhaíl freisin. Tá mar aidhm leis an bpacáiste an Eoraip a stiúradh i dtreo geilleagar ciorclach a bheidh níos inbhuanaithe agus níos iomaíche ná an tsamhail gheilleagrach atá ann faoi láthair. Tugtar isteach bearta leis, trína bhféadfar úsáid acmhainní a laghdú, dramhaíl a mhaolú agus treisiú leis an athchúrsáil.

Chuir na hAirí a dtacaíocht don phlean gníomhaíochta in iúl agus chuir siad gníomhaíochtaí tosaíochta i dtábhacht ó thaobh an chomhshaoil de. Phléigh siad bearta comhlántacha a bheidh le glacadh ar an leibhéal náisiúnta freisin agus mhaígh siad gur gá an leas is mó is féidir a bhaint as an bplean gníomhaíochta agus an dul chun cinn a fhaire go géar. Déanfar tacar Conclúidí a fhollúnú leis an díospóireacht sin agus leis an gceann a bhí ag an gComhairle Iomaíochais níos luaithe sa tseachtain, ar Conclúidí iad a bheidh in áirithe a nglactha i mí an Mheithimh.

"Caithfidh an tAontas Eorpach agus na rialtais oibriú i ndlúthchomhar le gnólachtaí agus le heagraíochtaí neamhrialtasacha chun go n-oibreoidh an geilleagar ciorclach. Bhí rath ar an bplé a rinne Airí an Aontais inniu faoin gcaoi inar féidir an t-éileamh ar earraí athchúrsáilte a chothú agus an gá atá le reachtaíocht chomhleanúnach chun an nuáil a chur chun cinn", arsa an tAire Dijksma.

Ceimiceáin réabtha iontálacha 

Ghlac an Chomhairle ráiteas a bhaineann le rialú a rinneadh le déanaí maidir le ceimiceáin réabtha iontálacha (ceimiceáin a chuireann isteach ar an gcóras hormón).  Measadh don Chúirt Ghinearálta gur loic an Coimisiún ar chritéir eolaíocha a shonrú, in am trátha, i ndáil leis na substaintí sin.

Cuirtear i bhfáth leis an ráiteas a thábhachtaí atá sé go ngníomhóidh an Coimisiún ar bhonn práinneach chun an breithiúnas agus na himpleachtaí dlíthiúla a ghabhann leis a chomhlíonadh, d'fhonn nach ndéanfar tuilleadh dóbartaíola faoi chritéir eolaíochtbhunaithe a fhorbairt i ndáil le ceimiceáin réabtha iontálacha.

Beoshruth, físeáin agus grianghraif

• Beoshruth na seisiún poiblí agus na n-imeachtaí preasa
• Grianghraif agus físeáin ón gcruinniú, an Chomhairle Comhshaoil, 4 Márta 2016